Read Oku Gal 2 Bible Online

Gal 2 - Oku bible

Gal 2

¹Naa se lu ɛybame nguk njio sekɛɛk ɛyvəm, mɛ kase kok ɛ Jolesalem, nè koke ghɛse Balnabas nɛ mɛ liɛ Taytus.

²Nè suuy Feyin ge mɛ kok. Mɛ kok dî, ghɛse ghel ghɛ ɛ́ nè yɛnsen ge ghele mbiy bak əbghun, mɛ nɛyte din se ghene ge lɛɛ sakghɛ əbjuŋ wɛ mɛ fekten se ghel əbtume. Mɛ nè dine se ghene dî fɛ baa yɛ lu ge ɛyfɛl yɛ mɛ nè fɛlenmen, nɛ̀ yɛ mɛ bo fɛ́len lɛy se lólò.

³Chèmè lu Taytus wɛ ghɛse wen nè luun nɛ lu wele ketum, fene wel nè báà se soote ge ɛ́ nɛyte wen.

⁴Kenəə nɛ̂ kin nè loole nɛ lu əbliy wɛ ghel ɛlee ghɛ ɛ́ been ge ɛ́ lu ghone-nyii nè nyiaken è lii ɛ ghɛse məm ge ɛ́ yɛ soŋ əbndoŋ se keele ge ghɛs sɛ chii lɛɛy ka ghel ghɛ ɛ́ boyenmen bek ka ɛ́ luun ghel ə Jesus-a? Ghene nè kɛŋe ge ɛ́ bense ghɛs ge ghɛs yɛ lu əbkos.

⁵Ghɛs jia fo nsan se ghene naa se nkan bek ka ghɛs nè kɛŋen se loote se ghale sakghɛ əbjuŋ, se fo se ghɛn ghɛɛ-ghɛɛ ka əb luun.

⁶Ghel ghɛ ɛ́ nè yɛnsen ge lu ghele mbiy chèmè nè báà gise kenəə se əbnəə wɛ mɛ nè fekten. Ɛylu ə ghene ka ghele mbiy chèmè báà se lu se mɛ ɛ shii bek ka wel əbjim lu ɛyghɛl ɛ ɛyshiɛ nə Feyine.

⁷Ghene sɛy nè yɛn nɛ lu ge Feyine nè vii sakghɛ əbjuŋ ɛ mɛ keghoo ge mɛ yɛ fekte se ghel əbtume kɛn ghɛɛ-ghɛɛ ka əb nè viin ɛ Bita keghoo ge əb yɛ fekte se ghele Juuse.

⁸Vi wɛ əb nè choken Bita ge wele ntum se ghele Juuse lu sɛy wen wɛ əb nè choken mɛ ge wele ntum se ghel əbtume.

⁹Jɛms, nɛ̀ Bita gese nɛ̀ Joon ghɛ ɛ́ nè yɛnsen ka əmkfəs əmtaa nè lô yɛn ge fo Feyin ɛyfɛl yɛ ndun nɛ̂ yin se mɛ, è me fo keghoo se ghɛse Balnabas se din ge ghɛse ghene fɛle se keghoo kemok. Ghɛse ghene me siyse ge ghɛse Balnabas yɛ fɛl ɛ əbtume məm nɛ ghene fɛle ɛ ghele Juuse məm.

¹⁰Mɛy mɛy kenəə kɛ ghene nè suuyen se ghɛs nè lu kɛn ge ghɛs yɛ kuume se yɛ giamtene ghɛ́ ketane, nɛ ko lu kenəə kɛ mɛ nè se kiin shii se yɛ nɛɛye.

¹¹Nè lô se lu ka Bita nè gwiyen ɛ Antiok, mɛ yol wen kɛn ɛ ghele ɛyshiɛ bek kejas kɛ əb nè jasen.

¹²Bita nè yiɛ ghene ghel əbtume, ghel ghɛ Jɛms nè tumen nɛy gwiy se Antiok, əb me kos əbghun ɛybam è jia gese se yiɛ ghene ghene bek ka əb nè fanen ghel ghɛ ɛ́ nè suuyen ge ɛ́ lu se yɛ nɛyte ghone-nyii ghɛ ghel əbtum.

¹³Ghele Juus ɛlee me beknen wen, è se fefse sɛy, è nɛɛy naa Balnabas se wen ə ngeŋ benle, è se nɛɛye ka ghene.

¹⁴Mɛ yɛn ge kenəə kɛ ghene nɛɛyen báà gese se lu əbluuy wɛ sakghɛ əbjuŋe dinen, è me bif se Bita ɛ ɛyshiɛ nə ghel ɛjime ge: Wɛ̀ lu wele Juus, dî chii ka wele ketum, ke gan lɛɛy ge wɛ̀ kase yɛ kante ghel əbtum ge ghene yɛ chii ka ghele Juus?

¹⁵Ghɛsen ghɛ luun ghele Juus ɛbiine, nɛ wiy ghel əbtum ghɛ ɛ́ toŋten ge ghele mbee;

¹⁶ke ge wel lu wel əbjuŋ ɛ ɛyshiɛ nə Feyine ka əb foon ɛytem se Jesus Christ nɛ wiy ge yi ka əb nɛɛyen kenəə kɛ ɛysake kɛŋen. Ghɛsen me se lu nɛ ɛ́ beeme Jesus Christ ka ɛ́ yɛ lu ghel ɛjuŋe ɛyshiɛ nə Feyine bek ɛytem yɛ ɛ́ foon se wen, nɛ wiy bek ka ɛ́ nɛɛyen əbnəə wɛ ɛysake kɛŋen. Wel wiy wɛ lòó əb yɛ lu ɛ titiy ɛ ɛyshiɛ nə Feyine ge yí ka əb nɛɛyen əbnəə wɛ ɛysake kɛŋen.

¹⁷Ghɛsen lɛ lòò, è yɛ mom se yɛ lu ghel ɛjuŋe ɛyshiɛ nə Feyine bek ka ghɛsen foon ɛytem nɛ lu se Christ, ke yɛ din ge ghɛsen lu ghele mbee fene ke se dine ge Christ se giamten ghel ge ɛ́ yɛ nɛɛye mbee-a? Ke báà se lu dì.

¹⁸Dî nɛ mɛ lòò è kase yɛ tokte əbnəə wɛ mɛ nè tunsenmen fene mɛ loote dine ge mɛ lu wel wɛ əb kolen ɛysak.

¹⁹Ɛysake lu nɛ ɛy yúymen mɛ, mɛ kuo è ben jim se kenəə kɛ kum ɛysak ka mɛ yɛ lu ghɛse Feyine.

²⁰Mɛ lu lɛ nɛ ɛ́ nè bante Christ, mɛ kuo sɛy ɛ wen ə kentam, me se lu nɛ mɛ bo chii wiy, nɛ lu Christ wɛ əb chiin ɛ mɛ məm, nɛ ɛychii yɛ mɛ chiin ɛ leenen lu nɛ ɛytem ə yome lu se wan ə Feyin wɛ əb nè koŋen mɛ fo ngeŋ ə wen è kuo bek mɛ.

²¹Mɛ báà beeme se tunse kenəə kɛ kum ɛysen yɛ Feyine chamen se ghɛsen bek ge nè lu ge wel boy bek ka əb lɛmen nchil, fene shii nè wiy wɛ Christ kuo.