Read Oku Gal 3 Bible Online

Gal 3 - Oku bible

Gal 3

¹Ghɛne ghɛ́ Galashia ghine jiŋte ghɛ lɛ? Ɛ́ liŋ ghɛn liŋen-a? Nɛ ko lu se ghɛn ghɛ mɛ nè nɛyten fekte kenəə ɛykuo nə Jesus Christ ɛ kentam ke se yɛnsen se ghɛn ka ghɛn nè lu fo-a?

²Mɛ kɛŋe se keele kɛn kenəə kemok se ghɛn. Feyine nè fo Keyioy Kelanene se ghɛn bek ka ghɛn nè nɛɛyen kenəə kɛ ɛysake kɛŋen moo, əb nè fo bek ka ghɛn nè foon ɛytem se kenəə kɛ ghɛn nè yion-a?

³Ghɛne jiŋte lɛ bek ghɛ? Lòó ghɛn kɛɛte lɛɛy kenəə nɛ̀ Keyioy ə Feyine, è yɛ ləysen ɛ leenen se ghɛne ngeŋse?

⁴Ke chèmè lu ge ngɛk yɛ ghɛn nè yɛnenmen ɛ məme kenəə ghan lɛymen se lólò-a? Mɛ báà se yɛne dì.

⁵Feyine lɛ báà se fóó Keyioy ə wen se ghɛn, nɛ ghɛn nɛɛye əbnəə əbchio əbyúméné bek ka ghɛn foon ɛytem se Christ, nɛ wiy bek ka ghɛne lɛmen tesak-a?

⁶Ghɛn yɛ ke ge ghɛy ka Ablaham nè foon ɛytem ə wen se Feyine, nɛ Feyine geese liɛ wen ge wel əbjuŋ.

⁷Lòó ghɛn me yɛn ge ghel ghɛ ɛ́ foon ɛytem se Feyine lu nkante ghon nə Ablaham.

⁸Ŋwaale-Feyine nè lô din ge Feyine yî liɛ ghel əbtum ge ghel ɛjuŋe nɛ lu bek ka ghene foon ɛytem se yi. Sakghɛ əbjuŋ me gwiy se Ablaham nɛ ke geese kwɛn ge: Feyine yî bose ghel ɛjim bek wɛ̀.

⁹Ke me se lu ge Feyine bose ghel ghɛ ɛ́ foon ɛytem se wen ghɛɛ-ghɛɛ ka əb nè bosen Ablaham bek ɛytem yɛ əb nè foon se wen.

¹⁰Naa ndɛ wɛ əb kwaaten ge yi lɛme kii nɛ lu ɛysak lu nɛ əb bɛɛy nɛ lu lòn bek ge ɛ́ nyakmen ge: Feyine mak lòn se naa ndɛ vi wɛ əb báà se yionene, gese lɛme wiy tesak tejim tɛ te luun ɛ ŋwaale.

¹¹Ke se loote dine ge wel wiy wɛ lòó Feyine yɛn ge wel əbjuŋ ge yi ka əb lɛmen ɛysak bek ge ŋwaale-Feyine suuy ge: “Wel wɛ əb foon ɛytem se Feyine ka əb yɛ lu wel əbjuŋe yî chii.”

¹²Ɛysake dì báà se ki kenəə se nɛɛy nɛ̀ ɛytem yɛ fó se Feyine, dî nɛ wɛ̀ lòò è yɛ yɛkte kiɛ nɛ lu ɛysak, fene wɛ̀ lu se nɛɛy əbnəə əbjim wɛ ɛysake kɛŋen se geese yɛ chii.

¹³Christ nè lô ten ghɛsen se lon sɛ ɛysake gwiyen so bek ka əb nè liɛn lòn bek ghɛsen, ka ɛ́ nè nyakenmen ɛ ŋwaale-Feyin ge: “Lon se wel vi wɛ ɛ́ banten ɛ fekak.”

¹⁴Kii nɛ̂ kine nè gan ka ghel əbtume chia əbghun nə Christ è kiile sɛy mbose yɛ Feyine nè kaken se Ablaham, é ghɛsen me kiile sɛy Keyioy Kelanen kɛ Feyine nè kakenmen bek ka ghɛsen foon ɛytem se Feyine.

¹⁵Ghone-nyii, mɛ liɛ nfek se əbnəə wɛ ghɛsen loo ɛ́ yɛ nɛɛy, wele sɛɛ foo ketef ghàà ɛ́ buuse, nɛ lòó wel jia gise kenəə se ten ɛ əbliy wɛ ɛ́ kè foonmen.

¹⁶Feyine dì nè fo ɛykak se Ablaham ghene wan wɛ ə́b fəy ɛ wen ɛykfəə. Ŋwaale-Feyine báà se suuye ge ghon, ka wɛ̀ yɛ gee ɛ́ lu se ɛydio. Ɛy suuy ge wan nɛ dì lu wan nɛ̂ vi wen nyiŋ wɛ luun Christ.

¹⁷Kenəə kɛ mɛ suuyen lu ge: Lòó ɛysak yɛ ɛ́ nè foon ɛ ɛybame nguk ɛyviɛ ɛykɛɛk nɛ̀ əmmtalme jia me buuse nkakma yɛ Feyine nè kɛɛten è lɛm, é ɛykak yɛ Feyine nè foon me buu buun.

¹⁸Lòò è yɛ lu ge ghɛsen kiile əbfua wɛ Feyine foon ge yi ka ghɛsen lɛmen ɛysak fene báà gese se lu bek ɛykak. Feyine nè fo nɛ lu ɛykak se Ablaham.

¹⁹Shii ɛysak nè lu ghɛ? Feyine nè fo ɛysak ka ghele yɛ keele ge lɛɛ mbee yɛ ghene nɛɛyen. Ɛysak nɛ̂ yi yɛ lu dî se kok se chin se kechii kɛ wan wɛ əb nè lɛmen ɛykak nɛ̂ yin se wene gwiy. Nè gwiy nchiyse-ndaa nə Feyine nɛ̀ ɛysake, wel wɛ əb tiyen ɛ ghene ghe Feyine nsan fii è gwiy so se ghene.

²⁰Wele teem ɛ ghele nsan, yɛ lu nɛ əb siyse əbnəə ghel ɛbaa, se lu nɛ Feyine nè tiy wen nyiŋ ɛ əbliy wɛ əb nè foon ɛykak se Ablaham.

²¹Ke lɛ dine ge ɛysake tunse nkakmase Feyin-a? Ke báà se lu dî ghɛy. Nè bóy se yɛ lu ge nè lòó ɛysake fó ɛychii se ghele fene nè lòó é ghele yɛ lu ghel ɛjuŋe ɛyshiɛ nə Feyine bek ka ɛ́ lɛmen tesak.

²²Se lu nɛ ŋwaale-Feyin dinmen ge: Mbee summen mbi ɛyjim, nɛ jii yɛ lòó wel chia ɛ ten se kiile nkakma ə Feyin lu kɛn se fo ɛytem se Jesus Christ.

²³Nè lu nɛ əbliye geese kwɛn wɛ ghɛsene yɛ foo nɛ lu ɛytem se Jesus Christ nɛ ɛysake kul ghɛsen, è kiile ka ghele nchak, se kok se chin se kechii kɛ Feyine nè dinen jii yɛ ɛ́ yɛ fo ɛytem ɛ ten se wen.

²⁴Ke me se lu ge ɛysake nè lu nchiy ə yɛsen è toknen nɛ̀ ghɛsen è ndu è chin se əbliy wɛ Christ nè gwiyen ka ghɛsene me fo ɛytem se wen, è yɛ lu ghel ɛjuŋe ɛyshiɛ nə Feyine.

²⁵Leenen wɛ əbliye kwɛnenmen se ghɛsen se yɛ foo ɛytem se Jesus lu nɛ ɛysake báà gese se chiye ghɛsen.

²⁶Ghɛn ghel ɛjim me se lu ghon ə Feyin bek ka ghɛn foon ɛytem se Jesus Christ.

²⁷Ghɛn ghel ɛjim ghɛ ɛ́ nè fiinmen moo è chìntèn Christ, shi kɛn ka wen.

²⁸Ke me se lu ɛ leenen nɛ wele Juus bo bɛɛy wiy ndun se wele ketum, nɛ kekose bo bɛɛy wiy ndun se wel wɛ wiyen kekos, nɛ əbvii bo bɛɛy wiy ndun se əbluumen; ghɛn ghel ɛjim di shi kefaa kemok ghɛne ghe Christ Jesus.

²⁹Ka ghɛn se shiin ghel ə Jesus Christ, lu nɛ ghɛn se shi ghon ə Ablaham ghɛ ɛ́ nɛ̂y kiile nkakma yɛ Feyine nè kaken se wen.