Read Oku Gal 4 Bible Online

Gal 4 - Oku bible

Gal 4

¹Kenəə kɛ mɛ suuyen lu ge, ɛ́ lɛm wán əbtɛlɛ se nyiɛ ndaa fene ndun ndun wiy se wen ghene kekose, chèmè lu ka əbfua əbjime luun wɛ́ wene.

²Əb lu se yɛ yionen nɛ lu se ghel ghɛ ɛ́ toknen nɛ̀ wen se kok se chin se ka əb kuy è kwɛn ka ba ə wen nè kɛŋen.

³Lu ghɛɛ-ghɛɛ ka ghɛsen nè luun əbkos se tesak tɛ ghɛ́ mbi fɛne loolen so, bo chiyte chiyten əbliy wɛ ghɛsene kuy ɛ kenəə ə Feyin.

⁴Əbliy tene kwɛn, Feyine tinse wán ə wen, əbvii bii, əb se chii sɛy ɛ məme ɛysak.

⁵Əb nè gwiy se tene ghel ghɛ ɛysake nè ghalemen se əbkos, ka Feyine me liɛ ghɛsen ge kante ghon nə yi.

⁶Se lu bek ka ghɛn shiin ghon, Feyine me tum keyioy ə wan ə wen se ghɛsene tetem. Ghɛsen me se jaŋe wen ge: Bàá, Ba ə wɛs.

⁷Ke me se lu ge, Feyine nɛɛymen, wɛ̀ se lu wan bo bɛɛy wiy kekos. Bek ka wɛ̀ se shiin wán ə Feyin, wɛ̀ nɛ̂y me kiile əbfua əbjim wɛ Feyine foon se ghon ə wene.

⁸Nè lu se mbiy ɛ əbliy wɛ ghɛn nè bɛɛy ghàà yɛ ke Feyin, nɛ ghɛn lu əbkos se tesake lólò tɛ́ mbi fɛne.

⁹Leenen wɛ ghɛn keelemen Feyin, kene mɛ suuy ge keele Feyin ghɛn, kooy ghɛ wɛ ghɛn kase benle è yɛ lu əbkos se əbyioye lólò wɛ́ mbi fɛne wɛ kediake ghene buun buun, nɛ kechine ghene wiy.

¹⁰Ghɛne liɛ əbliy bame əbchii əblee, bame njoŋ selee, bame əbliy əblee ɛ məme nguk, gese bame nguk selee.

¹¹Mɛ se fane ge tam fene ɛyfɛl ə yome se ghɛn lɛymen se lólò.

¹²Ghone-nyii, kiy ghɛn, ghɛn ko maay kenəə ɛysak nɛ̂ kin ka mɛ maayen. Mɛ dì lu ka ghɛn nè yî lu. Ghɛn nè bɛɛy ghàà yì jas se mɛ.

¹³Kéné ghɛn ke ge nè nɛɛy əbghun wɛ əb nè kóòn mɛ lòlò nɛ mɛ geese fekte kenəə ə Feyin se ghɛn əbliy wɛ mbiye.

¹⁴Chèmè lu ka jii yɛ əbghune nè kóòn mɛ ten nè luun njiɛse se ghɛn, ghɛn nè báà nyakse mɛ, è jia maay mɛ. Ghɛn nè fiisen mɛ dî ka wel yɛ gee mɛ lu nchiy-ndaa-Feyin, è fiisen mɛ naa ka nè lòó ghɛn fiisen Christ Jesus se wene ngeŋ.

¹⁵Ghɛn nè fiisen mɛ nɛ̀ kechɛkle ɛ ŋaŋ dì, kooy ghɛ ɛ leenen? Mɛ ke se əbluuy ge jii nè lu fene ghɛn nè lô chokte ɛshiɛ ə ghɛn fo se mɛ.

¹⁶Mɛ chèmè suuymen əbluuy se ghɛn, è sɛɛ wel əbbaanese nə ghɛn-a?

¹⁷Ghele ghii dii dine shii se ghɛn se ŋaŋ, dî nɛ ɛykwaate ə ghene wiy ɛyjuŋ. Kɛ ghene lu ge ɛ́ giabsen ghɛsen ka ghɛne yɛ ki shii se ghene chia ka ghɛn kiin se mɛ.

¹⁸Ghɛn lòò è yɛ ki shii se wel bek kenəə kejuŋe é yɛ jof ge ghɛn yɛ ki əbliy əbjim nɛ wiy kɛn ɛ əbliy wɛ mɛ luun ghɛsen.

¹⁹Ghon ə ghome, mɛ kasemen se yɛne ngɛk bek ghɛn ka əbvii əbliy wɛ əb lumen wan, se ndu se chin ka ghɛne yɛ ki nchiine nɛ lu yɛ̂ Christ.

²⁰Wel liɛ ge mɛ kè lu ɛ ghɛne məm ka mɛ nate kenəə kɛ mɛ suuyen. Mɛ suuy lɛ bek ge əbchio yúme mɛ bek jii yɛ ghɛne nɛɛyen ɛ ten.

²¹Ghɛn ghɛ ɛ́ yɛkten nɛ lu əbghun ɛysak nə Moses, ghɛn lɛ maa kenəə kɛ ɛysake suuyen-a?

²²Ŋwaale-Feyine dine ge, Ablaham nè ki ghon ɛbaa, ɛluumen ɛluumen. Əb nè bii əblee ghene əbvii wɛ əb nè fɛ́len nɛ lu kekos, è bii əblee ghene wiy ə wen wɛ nɛ wiyen kekos.

²³Wan wɛ əb nè biin ghene kekose lu nɛ əb nè bii ɛykwaate nə wele-mesoŋ, nɛ wan wɛ əb nè biin ghene əbvii wɛ wiyen kekos lu nɛ əb nè bii ɛykak nə Feyine.

²⁴Əbkiy ghin lu nfek kum nkakma sɛ Feyine nè foon sebaa. Əbvii wɛ əb nè biin wan se kekos lu Haga, nɛ əb dine nkakma yɛ̂ kfən Sinai.

²⁵Kine me se dine ge Haga lu kfən Sinai yɛ ɛy luun ɛ Alabia. Əb lu ka Jolesalem wɛ̂ leenen wɛ ghele ghɛ fóò luun əbkos.

²⁶Dî nɛ Jolesalem wɛ əb luun ɛ ɛyyio wiy kekos, nɛ lu vi nɛ̂ vi wɛ luun no ə wɛsen.

²⁷Kɛn ka ɛ́ nyaken ɛ ŋwaale-Feyin ge: “Əbvii wɛ luun kekan, wɛ̀ vi wɛ wɛ̀ nè bɛɛy ghàà yi yɛ ki wan, yɛɛ saŋlee. Kuom nɛ̀ ɛychɛke è yɛ foo felək, chèmè lu ka wɛ̀ nè bɛɛy ghàà yi lum wan! Bek ge ghon ə əbvii wɛ ɛ́ nyaŋenmen chianmen ghɛ əbvii wɛ lum nè bɛɛy ghàà loo se wen ɛybee.”

²⁸Ke lu é ghone-nyii nɛ ghɛn lu ghon ə Feyin ghɛ əb nè kaken kɛn ka Ayzek nè luun.

²⁹Nè lu əbliy nɛ̂ fo nɛ wan wɛ ɛ́ nè biin ɛ ɛykwaate nə wel nəkse wan wɛ ɛ́ nè biin ɛ kediak nə Keyioy ə Feyine, se lu kɛn ghɛɛ-ghɛɛ ka ke luun ɛ leenen se ghɛsen.

³⁰Dî nɛ ŋwaale-Feyin suuy ge ghɛ? Ɛy suuy ge: “Jume əbvii wɛ kekos ghene wan ə wen; bek ge wan kekose jia yî yiɛ əbtik ghene wan ə əbvii wɛ wiyen kekos.”

³¹Ke me se lu é ghone-nyii nɛ ghɛsen wiy ghon ə kekos, ghɛsen dì lu ghon əbvii wɛ wiyen kekos.