Read Oku Gal 5 Bible Online

Gal 5 - Oku bible

Gal 5

¹Christ boysemen ghɛsen ka ghɛsene boy se kekos. Ghɛn teem yi ketaan, è jia bo bééme ge wel kase ghɛn se əbkos.

²Ghɛn yióté! Mɛ wɛ Bool suuye se ghɛn ge: Ghɛn lòò è beeme ge ɛ́ yɛ nɛyte ghɛn é kenəə kɛ Christ nè nɛɛyen jia bo yɛ ki ɛyfɛl se ghɛn naa se nkan.

³Mɛ gese kunte se ghɛn ge naa ndɛ wɛ əb beemen ge ɛ́ nɛyte yi lu se me se yɛ lɛm ɛysak naa ɛyjim.

⁴Ghɛn ghɛ ɛ́ momen se yɛ lu ghel ɛjuŋe ɛyshiɛ nə Feyine ge yi ka ɛ́ nɛɛyen kenəə kɛ ɛysake kɛŋen lu nɛ ghɛn bɛɛy wiy ghel ə Christ, nɛ jii bɛɛy wiy yɛ lòó Feyine bo cham ɛysen se ghɛn.

⁵Se lu se ghɛs nɛ ghɛse foo nɛ lu ɛytem se Christ Jesus, Keyioy ə Feyine se foo kediak, nɛ ghɛs chiyte nɛ̀ shii ka Feyine nɛɛy é ghɛs mɛyse è yɛ lu ghele ghɛ́ titiye.

⁶Ka ɛ́ nɛyte wel, ka ɛ́ jia nɛyte, kii nɛ̂ kine báà se ki kenəə se nɛɛy nɛ̀ ɛylu ə yɛ́sen nɛ̀ Christe. Kenəə kɛ ke luun ɛ shii lu ɛybeeme yɛ wel kiin nɛ ɛy dine əbghun ɛykoŋ yɛ əb kiin se ghele.

⁷Ghɛn nè jɛle kejuŋ! Jefse ndɛ ghɛn fɛ ghɛn yɛ jumte əbluuy?

⁸Wel wɛ əb lobten ghɛn ɛ jii ghane báà se lu wel wɛ əb nè choken ghɛn.

⁹Ghɛn yɛ ke ge ɛ́ liɛ kembɛke keban kengwɛyene, è wiyte keban so, é ntone kebane ten me ngwɛy ɛjim.

¹⁰Mɛ loote ke se əbluuy ge Báàba nɛ̂y nɛɛy é ghɛn yɛ ki kɛn ɛykwaate yɛ mɛ kiin, nɛ naa ndɛ wɛ əb fəmsen ghɛn lu nɛ Feyine náà nəkse wen.

¹¹Ghone-nyii, lɛ kè boy se yɛ lu ge mɛ bo fekte ge ɛ́ yɛ nɛyte ghel, fene lɛ kè lòó ɛ́ kase yɛ nəkse mɛ-a? Nɛ ke kè lòò è yɛ lu dî, é ghele jia bo yɛ yio ɛyyaf kum ɛyfekte yɛ mɛ fekten ge Jesus nè kuo ɛ kentam.

¹²Kè mɛy se mɛ fene ghel nɛ̂ ghi ghɛ ɛ́ foon ngɛk se ghɛn ge ɛ́ nɛyte ghɛn ndu ɛ mbiy, è fəyse ngeŋse ghen fəysen.

¹³Ghone-nyii, Feyine nè chokmen ghɛn è boyse se kekos. Ghàà ghɛn sɛ̂y boy dì se yɛ nɛɛye əbnəə wɛ əbghune yusen ge ghɛn yɛ nɛɛy. Ghɛn lu se yɛ koŋnen gese fɛle se wel nɛ̀ wel.

¹⁴Kenəə kejim kɛ ɛysake suuyen jiole è se lu kɛn kenəə kemok, nɛ lu ge: Wel lu se yɛ koŋe wel əblee kɛn ka əb koŋen ngeŋ ə wen.

¹⁵Dî nɛ ghɛn lòò è yɛ nyamnen, lumnen ngeŋ ə sɛn ka buose, ghɛn yɛ toknen fɛ ghɛn sɛ́y nɛ̂y yuyté ngeŋ ə sɛn yúytén.

¹⁶Mɛ me se tefe ge ghɛn yɛ jɛl kɛn ka Keyioy Kelanene kɛŋen, è loo jɛl dì, è jia bo yɛ nɛɛy əbnəə wɛ əbghune koŋen ge ghɛn yɛ nɛɛy.

¹⁷Ke lu ɛ jii nɛ̂ ghan bek ge kenəə kɛ əbghune koŋen ge wel yɛ nɛɛy lu nɛ Keyioy ə Feyine báà beeme, nɛ kenəə kɛ Keyioy ə Feyine koŋen ge wel yɛ nɛɛy lu nɛ əbghune báà se beemee. Ghene ghɛ ɛbaa me se noo noon ɛ wele məm. Di ghɛy kenəə kɛ wɛ̀ lóó wɛ̀ yɛ mom lolo se yɛ nɛɛy kenəə kɛ wɛ̀ yɛnen ge ke lu ɛ titiy se nɛɛy.

¹⁸Dî nɛ ghɛn lòò è yɛ jɛl ka Keyioy ə Feyine dinen é ɛysake jia bo kul ghɛn.

¹⁹Əbnəə wɛ əbghune lòó əb yɛ yus se yɛ nɛɛy lu vine ge: Kenjaŋ, nɛ̀ tekwaate tebee, nɛ̀ ɛynɛɛy yɛ yɛ́ nɛɛy ka buose,

²⁰nɛ̀ ɛykokse əmnyine, nɛ̀ ɛykfəle kevəŋe, nɛ̀ əbbaanese, nɛ̀ əbnoo, nɛ̀ kenghɛke, nɛ̀ ɛyyafse ɛyteme, nɛ̀ keŋwɛye, nɛ̀ əbngiabsene, nɛ̀ ɛylu ə yɛ yɛ́ lu əbnkakten əbnkakten,

²¹nɛ̀ ke mbàŋ ɛshiɛ, nɛ̀ əmnduk mɛ nəə é əm koo, nɛ̀ ɛynɛɛye kengane, gese nɛ̀ əbnəə əblee ka vii nɛ̂ vine. Mɛ tefe ghɛn ka mɛ nè tefenmen se mbiy ge: Naa ndɛ wɛ əb chiin ɛynkii ɛychii nɛ̂ ghane jia yî yɛ ki kelik ɛ məme ɛysak nə Feyine.

²²Dî nɛ əbnəə wɛ Keyioy ə Feyine nɛɛyen ge ghele yɛ nɛɛy lu vine ge: Se yɛ ki ɛykoŋ, saŋlee, lɛme əmnyiaŋ, kule ɛytem, ki ɛytem ɛyjuŋe se ghele, ki nchiine ɛyjuŋ, suuye kenəə liɛ,

²³loole ge wɛ̀ɛ̀ gese ghale ngeŋ ə sɛn. Wɛ̀ chii ɛ jii nɛ̂ ghan é ɛysake jia yɛ lu yɛ ghal wɛ̀ bek kii nɛ̂ kine.

²⁴Ghel ghɛ luun ghɛ́ Christe lu nɛ ɛ́ bantemen əbnəə wɛ ɛyghune yusen ge ghene yɛ nɛɛy nɛ̀ nseeme sɛ ghene kiin ɛ kentam, əb lɛy.

²⁵Leenen ka ghɛsen se chiin ka Keyioy ə Feyine kɛŋen, ghɛsen me yɛ jɛl ka ke dinen.

²⁶Ghàà ghɛsen yɛ ghaŋse əbghune lólò, shike wiy əmlaa, gese ghɛke wiy ghel ɛlee.