Read Oku Gal 6 Bible Online

Gal 6 - Oku bible

Gal 6

¹Ghone-nyii, loo lu wele boŋ njio, ghɛn ghɛ ɛ́ jɛ́len kɛn ka Keyioy ə Feyine kɛŋen yɛ lu se tiyse wen, ɛ́ yɛ tiyse ge wɛ̀ɛ̀, toknen fɛ wel se ghɛn jas sɛy.

²Wel yɛ giamtene wel ɛ wene ngɛkse. Ghɛne nɛɛy ɛ jii nɛ̂ ghan é ghɛn me lunse ɛysak yɛ Christ nè foon.

³Loo lu wele yɛ kwaate ge yi lu kefaa kɛ əb wiyen keghene fene əb lɛɛse ngeŋ ə wen.

⁴Naa ndɛ yɛ lu se kakse se yɛn ge yi sɛ chii lɛɛy-a? Əb yɛn nɛ əb chii kejuŋ, fene əb se ki kenəə kɛ ke nɛɛy é əb yɛ ndial, ndiale nɛ lu kɛ́ ngeŋ nə wene, nɛ wiy ge yi beke se wel əblee.

⁵Bek ge kembuŋ ə wele yî yɛ yiike kɛn nɛ lu ŋwɛl.

⁶Naa ndɛ wɛ əb yiɛken kenəə ə Feyin lu se yɛ giamten sɛy ndinte ə wen nɛ̀ əbfua əbjuŋe wɛ əb kiin.

⁷Ghàà wel lɛɛse ngeŋ ə wen, lòó wel jia fefse se Feyine. Wel lem ghɛ fene lu kɛn kefaa kɛ əb nɛ̂y kaa.

⁸Wel lòò è yɛ nɛɛy nɛ lu əbnəə wɛ əbghun ə wene yusen ge əb yɛ nɛɛy fene əb nɛ̂y kiile sɛke ten nɛ lu ɛykuo, dî nɛ wel lòò è yɛ nɛɛy nɛ lu kenəə kɛ keyioy ə Feyine dinen é sɛke ten yî yɛ lu ɛychii yɛ ɛy jia yî mɛy.

⁹Ghàà ghɛsen yɛ koosene nken se yɛ nɛɛye njuŋ bek ge ghɛsen loo lu è jia bol ɛ jii, əbliye nɛ̂y kwɛn, é ghɛsen kiile əbmakte ten.

¹⁰Ke me se lu ge naa ɛ leghɛ wɛ jii yɛnsen ge ghɛsen nɛɛy njuŋ, ghɛsen nɛɛy se wel əbjim, naa ɛ ŋaŋe ŋaŋ se ghone-nyii se ɛybeeme.

¹¹Ghɛn yɛn yì ka mɛ nyaken kelik kin se ghɛn nɛ̀ keghoo ə kome nɛ ɛshiɛ ŋwaale ghake ge.

¹²Ghel ghɛ ɛ́ kanen ge ɛ́ nɛyte ghɛn lu ghel ghɛ ɛ́ kɛŋen se yɛ din nɛ lu əbghun, nɛ shii wɛ ghene nɛɛyen dì lu ka ghene kɛŋen ge ɛ́ ghàà yɛ nəkse ghene kum kenəə ɛykuo nə Christ ɛ kentam.

¹³Naa ghene ghɛ ɛ́ nɛyten ghel chèmè lɛme wiy yi ɛysak ɛyjim. Kɛ́ ghene lu kɛn ge ɛ́ nɛyte ghɛn ka ghene yɛ ghaŋse əbghun kum ghɛn.

¹⁴Lu se mɛ nɛ lòó ɛ́ jia yɛ gwiy nɛ mɛ ghaŋse əbghun ghɛy, buu kɛn ge mɛ ghaŋse kum ɛykuo Báàba ə wɛsen Jesus Christ ɛ kentam, nɛ lu bek ɛyghene yɛ əbnəə wɛ́ ketuu ntiɛ fɛne lɛyenmen se mɛ, mɛɛ mɛ lɛy sɛy se əbghene.

¹⁵Ka ɛ́ nɛyte wel, ka ɛ́ jia nɛyte, kii nɛ̂ kii wiy kenəə ghɛy. Kenəə kɛ ke luun ɛ shii lu ge wel yɛ lu wel əbfɛɛ.

¹⁶Feyine ko koosen ɛysen è fo əmnyiaŋ se ghel ɛjim ghɛ ɛ́ chiin ɛ jii yɛ mɛ dinen yin, ghene dì lu nkante ghel ə Feyin.

¹⁷Se ləysen é mɛ yɛ suuy ge, ghàà wel gese fo ngɛk san ghɛy bek ge əblas vin ɛ mɛ əbghune dine ge mɛ lu wɛ̂ Jesus Christ.

¹⁸Ghone-nyii, Báàba ə wɛsen Jesus Christ ko cham ɛysen se ghɛn ghel ɛjim Amen.