Read Oku Ɛfe 2 Bible Online

Ɛfe 2 - Oku bible

Ɛfe 2

¹Nè lu se mbiy nɛ ghɛn lu ɛnkfə bek əbjas ə wɛn nɛ̀ mbee ə sɛne.

²Nè lu əbliy nɛ̂ fo nɛ ghɛn bo jumte jii sebee sɛ́ mbii, yionene se ba ɛyfim yɛ kediake tene kalen ɛ əbfiɛf, nɛ lu keyioy kebee nɛ̂ kine kɛ ke fɛ́len ɛ məm nə ghel ghɛ ɛ́ báà se yionene se Feyine.

³Ghɛsen ghel ɛjime nè lô se chii kɛn ka ghene, nɛɛy əbnəə wɛ əbghune nè yusen ghɛsen ge ɛ́ yɛ nɛɛy, jumte əbnəə wɛ ɛyghune nè yusen nɛ ghɛsen kwaate se yɛ nɛɛy. Ɛychii ə yɛ́sene nè se dine ge ghɛsen lu ghel ghɛ Feyine yafsen ɛytem se ghene ka əb yafsen se ghele mbee ɛjim.

⁴Se lu ka Feyine koosen ɛysen ɛ ŋaŋ, gese ki ɛykoŋ ɛ ŋaŋ,

⁵è koŋ ghɛsen nɛ ghɛsen bo bɛɛy ɛnkfə bek əbjas ə wɛsen. Əb nɛɛy ge ghɛsen kase yɛ ki ɛychii ghɛsen nɛ̀ ghe Christ. Ghɛn lu ɛboyen nɛ lu bek ɛycham ɛysen nə Feyine.

⁶Feyine nè chinten ghɛsen nɛ̀ Christ, è lose se ɛykuo, è nɛɛy ghɛsen nɛ̀ wen diom ɛ ɛyshiɛ nə Feyine ɛyyio.

⁷Əb nè nɛɛy dî ka əb yɛ yese din kechii mbi kejim ɛycham ɛysen yɛ əb kiin se ghɛsen nɛ ɛy dio nɛ lòó wel jia keele se fek. Ghele yɛne kechɛkle ə Feyin nɛ̂ kin ɛ ɛyboyse yɛ Christ nè boysen ghɛsen.

⁸Lu bek ka Feyine chamen ɛysen ə yɛn wɛ ghɛn beemen, è boy nɛ wiy bek kenəə kɛ nɛɛyen ghɛn. Di lu fomɛ ə Feyin,

⁹nɛ wiy bek ɛyfɛl ɛyjuŋe ɛylee, fɛ wel yɛ ghaŋse əbghun.

¹⁰Ghɛsen me se lu nɛ lu ɛyfɛle keghoo nə Feyine. Əb nè bom ghɛsen chia əbghun nə Christ ka ghɛsene yɛ nɛɛy ɛyfɛl ɛyjuŋe yɛ əb nè yimen baate è lɛm ge lu jii yɛ ɛ́ yɛ chii ɛ tɛn.

¹¹Ghɛn ghɛ ghel əbtume, ghɛn yɛ kuume ghel ghɛ ghɛn nè luun ɛghene se mbiy. Ghele Islaele nè toŋte ghɛn ge: Ghel ghɛ ɛ́ báà nɛyte, toŋte ngeŋse ghen ge: Ghel ghɛ ɛ́ nɛyten, nɛ ɛynɛyte yin lu kenəə nɛ nɛɛy wel ɛ wel əbghun nɛ̀ keghoo.

¹²Ghɛn kuume ge nè lu ɛ keleŋ əbliy fo nɛ ghɛne ghe Christ wiy se kefaa kemok. Ghɛn nè lu əbngwiy, è jia se lu ɛ məme ghel ghɛ Feyine nè choken ge ghíí, è jia se ke nkakma kelek kɛ Feyine nè laan ghene ghene. Ghɛn nè chii ɛ mbi fɛn ke wiy Feyin, ki wiy ɛykwaate.

¹³Se lu ɛ leenen nɛ ghɛn ghɛ ɛ́ nè yimen se lu əbtəm se Feyine se shi kefaa kemok ghɛn ghe Christ, əb kuo, əmnduŋ mə wen nɛɛy ghɛn se báksen se Feyine.

¹⁴Christ se wene ngeŋ lu nɛ əb gwiy nɛ̀ əmnyiaŋe se ghɛsen. Əb nè kuo, è nɛɛy ghele Juus ghene ghel əbtume se lu kefaa kemok. Əb chaksemen mbàŋ əbbaanese yɛ ɛy nè giabsen ghɛsen yɛ luun kenyam kɛ ke nè luun ɛ ghɛsene məm

¹⁵Əb nè mɛyse nchilse ghele Juus, nɛ̀ tesak ə ghene, gese nɛ̀ əbnəə wɛ ə́b ghalen ghene, ka ə́b chinten ghele Juus ghene ghel əbtume se wen əbghun é ghene yɛ lu ketum kefɛɛ, chii əmnyiaŋ.

¹⁶Christ nè kuo ɛ kentam, è buuse kenyam kɛ ghene nè kiin, ka ghene chinten se kefaa kemok è kase gwiy se Feyine.

¹⁷Əb nè gwiy è se fekte se ghɛn ghɛ ɛ́ nè luun ɛ əbtəm se Feyine kum əmnyiaŋ gese fekte se ghɛs ghɛ ɛ́ nè baksen se Feyine kum əmnyiaŋ.

¹⁸Lu bek Christ wɛ ghɛsen ghel ɛjim chinten è se ki ɛytem ɛymok, è kiile nsan se teem ɛ Bay ɛyshiɛ.

¹⁹Ke me se lu nɛ ghɛn ghɛ ghel əbtume bo bɛɛy wiy əbngwiy, kene ghel ghɛ ɛ́ chíàn chíàn. Ghɛn se shi ghel ɛylak nə ghele Feyine gese lu ghel ɛykfəə nə wen,

²⁰nɛ ɛ́ bakle ghɛn ɛ ketiɛ kɛ viin ghɛ́ ntum nə Christe gese nɛ̀ ghele ntum nə Feyine nɛ Christ se wene ngeŋ lu ɛytiy yɛ ɛ́ tomen ɛybuu ndaa ten so.

²¹Lu wen wɛ əb ghalen ndaa nɛ̂ yin ɛy se tiy se kefaa kemok me koke kwɛntene se ndaa yɛ ɛ́ lɛmen ndun ge yɛ̂ Bay Feyin.

²²Nɛɛy Christ ge ɛ́ baklé ghɛn é ɛ́ chinten è yɛ lu kelik kɛ Feyine chiin ɛ ten ɛ Keyioy.