Read Oku Ɛfe 3 Bible Online

Ɛfe 3 - Oku bible

Ɛfe 3

¹Se lu bek əbnəə wɛ Feyine nɛɛyen nɛ̂ vin, mɛ wɛ Bool wɛ mɛ luun ɛ nchak bek ɛyfɛle Christ Jesus yɛ mɛ fɛ́len se ghɛn me se jeme se ghɛn ghɛ ghel əbtum.

²Mɛ ke ge ghɛn nè yiomen ka Feyine nè chamen ɛysen è vii ɛyfɛl nɛ̂ yin ɛ mɛ keghoo yɛ mɛ fɛ́len se yɛ giamtene ghɛn.

³Mɛ kè lô nyak se ghɛn ge Feyine nè lômen din əbnəə wen se mɛ wɛ əb nè siysen ə́b se lu ɛ kenlete.

⁴Ghɛne lóó jaŋe ŋwaale yin, è me yɛn ge mɛ ke əbnəə wɛ əb luun ɛ kenlete kum Christ.

⁵Nè lu se mbiy nɛ Feyine báà nɛɛy ge wele-mesoŋ keele chəm nɛ̂ yì, se lu ɛ leenen nɛ Keyioy ə wene nɛɛymen ghɛ́ ntum nə Christ ghɛ əb nè choken gese nɛ̀ ghɛ́ ntum nə wene keele.

⁶Kenəə nɛ̂ kin kɛ ke nè luun ɛ kenlete lu ge: Sakghɛ əbjuŋ lu nɛ əb nɛɛy, ghel əbtume chinten ghele Juus se kiile əbtik wɛ Feyine foon se ghon ə wene, è chinten se yɛ lu ɛybee əbghun nə Christ ɛylee, è chinten se kiile kii dii kɛ Feyine nè kaken ge Jesus Christ yî gwiy so.

⁷Mɛ lu wel əbfɛlen ɛ məme sakghɛ nɛ̂ ghan bek ka Feyine nè chamen ɛysen, è nɛɛy nɛ̀ kediak ə wen ge mɛ yɛ lu.

⁸Chèmè lu ka mɛ laayen chian naa kenləysene wel ɛ məm nə ghel ə Feyine, nɛ Feyine kò nè lômen din ɛykoŋ, è nɛɛy ge mɛ yɛ fekte se əbtume kum əbghaake wɛ Christe gwiyen so wɛ lòó wel jia keele se fek,

⁹nɛɛy ge wel əbjim keele jii yɛ Feyin wɛ əb nè bomen əbfua əbjim nè siysen se fɛl nɛ̀ chəm nɛ̂ yin yɛ əb nè letemen se nguk.

¹⁰Shii ə Feyin nè lu se chia əbghun nə kenchintene ghel ɛbeemene se din əbfee ə wen wɛ əb luun ɛ jiise jiise se ghɛ ɛ́ saken gese nɛ̀ ghɛ ɛ́ kiin əbtaawe ɛyyio.

¹¹Feyine nè nɛɛy əbnəə nɛ̂ vin kɛn ka əb nè yimen siyse se kenkɛɛte, nɛ əb nè nɛɛy chia əbghun nə Báàba ə wɛsen Christ Jesus.

¹²Lu bek ka ghɛsen luun kefaa kemok ghɛsen nɛ̀ ghe Christ gese nɛ̀ ka ghɛsen foon ɛytem se wen wɛ ghɛsen kiin jii sɛ yɛ gwiy se Feyine nɛ̀ ɛyteme bo fane wiy kefaa.

¹³Mɛ me se lone ge ghàà ghɛn koosen nken bek ngɛk yɛ mɛ yɛ́nen fɛn bek ghɛn. Mɛ yɛne ngɛk lɛ ka ghɛne yɛ koknen.

¹⁴Lu bek əbnəə nɛ̂ vin wɛ mɛ təmen ɛləy ɛ Bay ɛyshiɛ è se jeme.

¹⁵Lu wen wɛ əb luun Bay se tekfəə tejim ɛ ɛyyio nɛ se ketuu ntiɛ.

¹⁶Mɛ jeme ge Feyin wɛ əb kiin əbghaake əbchio əbyúméné kô nɛɛy é Keyioy Kelanene fó kediak se ghɛn ka ghɛne yɛ taa ɛ ghɛne tetem.

¹⁷Jeme ge ghɛn yɛ loote ki ɛytem se Feyine, ka Christe yɛ chii ɛ ghɛne məm, lone ge ghɛn yɛ loote ki ɛykoŋ nɛ ɛy loote yiɛte əbghun ɛ ghɛne tetem,

¹⁸ka ghɛne ghel ə Feyine ɛjime chinten è yɛ ki əbtaawe se keele jii yɛ ɛykoŋe Christ luun ɛ ten jii sejim nɛ lòó wel jia fek.

¹⁹Mɛ jeme ge ghɛn keele ɛykoŋ Christ nɛ̂ yi, ɛykoŋ nɛ lòó wele-mesoŋ jia keele, ka nchiine ə Feyine me loote kok è lun ɛ ghɛne tetem.

²⁰Ghɛsen fó ɛykokse se Feyin wɛ əb fɛ́len ɛ ghɛsene məm nɛ̀ əbtaawe ə wene. Lu wen wɛ lòó əb nɛɛy əbnəə əbjim wɛ ghɛsen bifen se wen è nɛɛy naa è chia ka ghɛsen kè lòó ɛ́ yɛ ki ɛ ghɛsen ɛykwaate.

²¹Ɛykokse yɛ lu se Feyine bek kenone ghel ɛbeemene ghene ghe Christ ntem sejim, nɛ̀ se əbliy əbjim nɛ ɛymɛye wiy. Amen.