Read Oku Ɛfe 4 Bible Online

Ɛfe 4 - Oku bible

Ɛfe 4

¹Mɛ wɛ mɛ luun ɛ nchak bek ka mɛ fɛ́len se Báàba lone ge ghɛn yɛ chii ɛychii yɛ ɛy luun ɛ titiy ka ghel ə Feyin.

²Ghɛn səkse ngeŋ ə sɛn, è yɛ loolè ge wɛ̀ɛ̀, gele wiy, è yɛ wensen nɛ̀ ɛykoŋe ɛ ngɛk sɛ ghele gwiyen so.

³Ghɛn mom ketaan è yɛ chii əmnyiaŋ, ka ghɛne yɛ yese chii se kefaa kemok ka Keyioy ə Feyine nɛ̀ɛ̀yèn ghɛn se lu, yese lu se kefaa kemok.

⁴Əbghun vi wɛ ghɛsen luun ɛ ten əbmok nɛ̀ Keyioy ə Feyine kɛ ghɛsen kiin lu kemok kɛn ka ɛykwaate luun ɛymok yɛ Feyine nè choken ghɛn se ten.

⁵Ghɛsen ki Báàba əbmok, ki ɛybeeme ɛymok, fii moo bek kenəə kemok.

⁶Feyine lu Femok, nɛ lu Ba ə wel əbjim, sake ghel ɛjim, fɛle ɛyfɛl ə wen chia ɛ wel əbjim əbghun, gese lu ɛ wel əbjime məm.

⁷Se lu nɛ wel se ghɛsen se wene ketuu kiilemen kɛ́ wene kɛ kenəə kɛ Christ feken è fo se wen.

⁸Ghɛy kenəə kɛ ŋwaale-Feyin suuyen ge: “Nè lu əbliy wɛ əb nè koken è yiake ɛyyio, koke nɛ̀ ngoo yɛ əb nè kooten, əb fo əbfua se ghel ə wene.”

⁹Ɛ́ suuy ge əb nè kok koken fene kii nɛ̂ kine dine gee ghɛ? Fene ke dine ge əb kò nè lô səəken è yim ɛ ntiɛ.

¹⁰Se lu wen nɛ̂ vi wɛ əb nè səəken, lu sɛy wen wɛ əb nè koken è yiake ɛyyio ɛyjim ka əb yɛ kiynen əblik əbjim ɛ mbi.

¹¹Lu wen wɛ əb nè giaten əbnəə se ghele ge ɛlee yɛ lòò ntum ə wen, nɛ ɛlee teefe ntum ə Feyin, nɛ ɛlee jɛle fekte se ghel ghɛ ɛ́ nè bɛɛy ghàà yio, nɛ ɛlee lu ghel ghɛ ɛ́ toknen nɛ̀ kenone ghel ə Feyine, gese dinte əbnəə se ghene.

¹²Əb nè nɛɛy dî se siyse ghel ə Feyin ge ɛ́ yɛ fɛl, bakle əbghun ə Jesus Christ,

¹³nɛ ə́b kuye koke se chin se ka ghɛsene chinten è yɛ lu kefaa kemok ɛ ghɛsen ɛybeeme gese ke wán ə Feyin. Ke loo lu dî é ghɛsen me yɛ lu nɛ ɛ́ kuymen è loote kwɛn ɛ əbfek wɛ ə́b luun kɛn ka Christ.

¹⁴Ghɛsen bɛɛy wiy se yɛ lu ghon ghɛ əbfiɛf ɛyyiɛke ɛybee lòòn ghááy, é əb fɛf è yɛ lenlen so. Kenəə nɛ̂ kin lu nɛ nɛɛy ghel ghɛ ɛ́ fefsen, lobten ghɛsen nɛ̀ ɛyfɛle fenlɛɛse yɛ ghene nɛɛyte fɛ́len.

¹⁵Ghɛsen yɛ suuy nɛ lu kɛn əbluuy nɛ̀ ɛykoŋe, kuye koke jii sejim se yɛ lu ka Christ wɛ luun ketuu.

¹⁶Lu wen wɛ əb siysen əblik əbghun əbjim nɛ əb wiysen əbghun se yɛ lu kefaa kemok, foo wen əbyuŋ wɛ əb chinten əblik əbghun əbjim əb se tiy se kefaa kemok fɛle ka ə́b luun se yɛ fɛl, nɛ əbghun əbjime me kuye, bakle əbghun nɛ̀ ɛykoŋe.

¹⁷Mɛ me se nɛyte kunte se ghɛn ɛ əbtaawe nə Báàba ge, ghàà ghɛn gese yɛ chii ka əbtume chiin nɛɛye əbnəə lólò wɛ əb luun ɛ ghene tekwaate.

¹⁸Tekwaate ghene jiɛmen ka əbtək, jii jia se lu yɛ lòó ghene kiile ɛychii yɛ Feyine foon bek ka tekwaate ghene fenenmen, ghene se taa ketuu se wen.

¹⁹Ghene bo ghuumen wiy kenəə naa se nkan, è màày ngeŋse ghen è se chii ka buose, ki shii se yɛ nɛɛy ndu kɛn nɛ̀ əbnəə wɛ əb laanen wiy.

²⁰Ghɛn nè báà yiɛke se yɛ ke Christ se yɛ nɛɛy nɛ lu əbnəə nɛ̂ vin.

²¹Kɛ́ əbluuye lu ge, ghɛn nè lô yio kum Jesus, ɛ́ dinte əbnəə wɛ kum wen se ghɛn nɛ lu əbluuy wɛ əb yɛnsen ɛ məm nə wen.

²²Ɛ́ nè din ge ghɛn maay ɛychii yɛ ghɛn nè chiin se mbiy, ɛychii ɛybee yii yɛ ghɛn nè chiin, nɛɛye əbnəə wɛ əbghune nè yusen ge ghɛn yɛ nɛɛy,

²³é Feyine kubsen tetem ə tɛn é ghɛn yɛ ki tekwaate tefɛɛ.

²⁴Ghɛn sum əbghun əbfɛɛ wɛ Feyine nè nɛɛyten ɛ wene kenfeksen è yɛ nɛɛy əbnəə wɛ́ titiye wɛ əb kiin ɛylan; dì ghɛy nkante ɛychii yɛ luun ndee ə Feyin.

²⁵Ke me se lu ge ghɛn màày əbbuam, é ghɛn ghel ɛjim yɛ suuy nɛ lu kɛn əbluuy se ghone-ɛnoo ə ghɛsene bek ka ghɛsen ɛjim chinten è se lu əbghun əbmok.

²⁶Kenəə yaf wɛ̀, wɛ̀ yɛ toknen se nɛɛye mbee, ghàà wɛ̀ vəse ge əbtəke kal è jiɛ nɛ wɛ̀ bo yafsee.

²⁷Ghɛn yɛ ke se foo nsan se Satan wɛ wel əmnaŋ.

²⁸Ɛchoŋe lu se yal əbchoŋ se yɛ tul, fɛle nɛ̀ ɛghoo ghene ka ghene loo ki è yɛ giamten sɛy ghel ghɛ ɛ́ tanen.

²⁹Ghɛn yɛ ke fɛ əblam əbbee yɛ fəy ɛ ghɛn ɛychio. Ghɛn yɛ suuy nɛ lu kɛn kii kɛ lòó ke yɛ bàklè baklen, suuy nɛ lu kɛn əbnəə wɛ əb luun ɛ shii ka giɛ sɛne yɛ giamtene ghel ghɛ ɛ́ yioten ghɛn.

³⁰Ghɛn yɛ ke se nɛɛy nɛ Keyioy ə Feyin Kelanene yɛ yio ɛyyaf se ghɛn, Keyioy kɛ ɛ́ nè chəysenmen ghɛn so se din ge kechii gwiye kɛ ghɛne boy.

³¹Ghɛn maay ɛytem ɛylikene, è jia yɛ yafse ɛytem, chɛfke wiy, è maay ɛykum əbchio kene ndiy se tɛylene nɛ̀ əbbaanese jii sejim.

³²Ghɛn yɛ chɛkle, ki ɛytem ɛyjuŋe se ngeŋ sɛne, é wel yɛ lɛyse əbjas ə wel əblee kɛn ka ghɛn nè lóó lu ghele Christ Feyine lɛyse əbjas ə wɛn.