Read Oku Ɛfe 5 Bible Online

Ɛfe 5 - Oku bible

Ɛfe 5

¹Ke me se lu ge ghɛn ka ghon ə Feyin ghɛ əb koŋen ɛ ŋaŋ yɛ nɛɛy əbnəə ka wen.

²Ghɛn yɛ chii ɛychii yɛ ɛy dinen ɛykoŋ kɛn ka Christ nè koŋen ghɛsen è fo ngeŋ ə wen bek ghɛsen, nɛ lu fomɛ əbləkten wɛ əb nè taŋlen ghɛsen so se Feyine.

³Ghɛn ka ghel ə Feyine yɛ ke fɛ wel yèŋte kenəə kɛ kum kenjaŋ kene ɛychii buose naa ɛ jii ɛykɛ, kene keŋwɛy ɛ ghɛne məm naa se nkan.

⁴Ke báà jof naa se nkan ge əblam əbbee, nɛ̀ əblame lólò gese nɛ̀ kenwɛyse yɛ fəy ɛ ghɛn ɛychio. Ghɛn yɛ fo nɛ lu bɛ́ɛ̀lè se Feyine.

⁵Ghɛn keele se əbluuy ge wel wɛ əb jaŋen kenjaŋ, kene wel əbbee, kene wel wɛ əb baŋen ɛshiɛ əbfua, (Wel wɛ əb baŋen ɛshiɛ əbfua se kokse nɛ lu əbfua ten.) Lòó əb jia yɛ ki kelik ɛ ɛysak nə Christ ghene Feyine.

⁶Ghɛn yɛ ke fɛ wel lɛɛse ghɛn kum əbnəə nɛ̂ vin. Lu əbnəə nɛ̂ vin wɛ əb nɛ̂y nɛɛy é Feyine yafse ɛytem è mɛyse ghel ghɛ ɛ́ báà se yionen se wen.

⁷Ghàà ghɛn yɛ ki kenəə se nɛɛy ghɛne ghe ɛynkii ghel nɛ̂ ghane.

⁸Nè lu se mbiy nɛ ghɛn chii ɛ nfiine, se lu ɛ leenen nɛ ghɛn se chii ɛyban ka ghel ə Báàba. Ghɛn me yɛ chii ka ghel ghɛ ɛ́ shiin ɛ ɛyban.

⁹Wele lóó chii ɛyban, əb yɛ nɛɛy kɛn əbnəə wɛ əb luun ɛ titiy nɛ̀ əbjuŋe gese nɛ̀ wɛ́ əbluuye.

¹⁰Ghɛn mom se keele kenəə kɛ Báàba koŋen ge ghɛn yɛ nɛɛy.

¹¹Ghàà ghɛn vii keghoo ə kɛn se əbnəə lólò wɛ ghel ghɛ ɛ́ chiin ɛ nfiine nɛɛyen. Ghɛn lu se din nɛ ghene yɛn ge əbnəə wɛ́ tene báà jof.

¹²Loote lu kenghuumen se chèmè se yɛ fiɛl əbnəə nɛ̂ vi wɛ ghene nɛɛy ɛ kenlete.

¹³Dî nɛ loo lu əbliy wɛ ɛ́ fəysenmen əbnəə əbjim è gwiy so ɛyban é ghele me loote yɛn ɛynkii əbnəə wɛ́ tene.

¹⁴Kefaa lòò è yɛ lu ɛ ngɛngɛ fene lu ɛyban. Ke lu dî kɛn ghɛɛ-ghɛɛ ka ɛ́ nè suuymen ge: Wɛ̀ vi wɛ wɛ̀ buunen, kamke, loole se ɛykuo, é Christ fó ɛyban se ghɛn.

¹⁵Ghɛn yɛ toknen ge ghɛn sɛ chii lɛɛy-a. Ghàà ghɛn yɛ chii ka əbngoo, ghɛn yɛ chii ka ghel ɛtofene.

¹⁶Ghàà ghɛn yɛ vəse nɛ əbliye chia se lólò. Wel yɛ loo lu se nɛɛy kenəə əb nɛɛy nɛ əbliye bo bɛɛy bek ge mbi befmen.

¹⁷Ke me se lu ge ghàà ghɛn yɛ ngoole. Ghɛn yɛ tof ka ɛ́ yɛ ke kenəə kɛ Báàba kɛŋen.

¹⁸Ghàà ghɛn yɛ nəə əmnduk mɛ əm koo ghɛn é ghɛn yɛ momle əbnəə wɛ əb bese ghɛn. Ghɛn vəse nɛ lu Keyioy Kelanene é ke lunse tetem ə tɛn.

¹⁹Kenfiɛl ə kɛne lu se yɛ lu nyof nɛ̀ əbluŋe gese nɛ̀ njàŋ sɛ yem è kokse Feyin nɛ̀ tetem ə tɛne.

²⁰Ghɛn yɛ foo bɛ́ɛ̀lè se Bay Feyin se əbliy əbjim ɛ ɛyghel nə Báàba ə wɛsen Jesus Christ.

²¹Wel se ghɛn yɛ ngvəmle əblee se din ge ghɛne vəme Christ.

²²Əbkiye, ghɛn yɛ ngvəmle ɛlum ə ghɛn kɛn ghɛɛ-ghɛɛ ka ghɛne ngvəmlen Báàba.

²³Ghɛn yɛ ke ge əbvii lu ɛyshas nə lum ghɛɛ-ghɛɛ ka kenchintene ghel ə Feyine luun ɛ ɛyshas nə Christ. Kenchinten nɛ̂ kine lu əbghune wen nɛ əb nè lô fo ngeŋ ə wen se boyse keghene.

²⁴Əbkiye me yɛ ngvəmle ɛlum ə ghen ɛ əbnəə əbjim kɛn ka kenchintene ghel ə Feyine ngvəmlen Christ.

²⁵Ɛluumene, ghɛn yɛ koŋ əbkiy ə ghɛn kɛn ka Christ nè koŋen kenchintene ghel ə Feyin è fo ngeŋ ə wen è kuo bek keghene.

²⁶Əb nè kuo dî se nɛɛy ge kenchinten nɛ̂ kine yɛ lu kelanen, nɛ ɛ́ suu nɛ̀ moome gese nɛ̀ giɛ.

²⁷Əb nè suu dî ka əb loo gwiy nɛ̀ kenchinten nɛ̂ kine ge ke baksen yi, è yɛ gwiy so nɛ ke njantee, laane, ki wiy fentik kene kelas nɛ teghone wiy ɛ ten naa se nkan.

²⁸Ɛluumene yɛ koŋ əbkiy ə ghen ɛ jii nɛ̂ ghan kɛn ka ghene koŋen ɛyghune ghen. Wel wɛ əb koŋen wiy ə wen koŋe ngeŋ ə wen.

²⁹Ka ke chèmè kè luun naa lɛɛy fene wel né bɛɛy ghàà ban ngeŋ ə wen. Əb loo əb yɛ yiɛse ngeŋ ə wen, toknen nɛ̀ ketuu wene. Lu kɛn ɛyghɛl ka Christ toknen nɛ̀ kenchintene ghel ə wene.

³⁰Lu kɛn naa ghɛsen əblik əbghun nə wen wɛ́ tene.

³¹Lu dî kɛn ɛyghɛl ka ŋwaale-Feyine suuyen ge: Wele yî vəse ba ə wen ghene no ə wen é ghene wiy ə wen chinten é ghɛ ɛbaa nɛ̂ ghine me yɛ lu se kefaa kemok.

³²Kelike ŋwaale nɛ̂ kine dine chəm ɛylee yɛ ɛy nè loote lu naa ɛyleten, nɛ mɛ ke ge chəm tene dine nɛ lu kenəə Christ ghene kenchintene ghel ə Feyine.

³³Dî nɛ əbluumen əbjim lu se yɛ koŋe wiy ə wen kɛn ka əb koŋen ngeŋ ə wen, nɛ əbvii əbjim ngvəmle lum ə wen.