Read Oku Ɛfe 6 Bible Online

Ɛfe 6 - Oku bible

Ɛfe 6

¹Ghone, ghɛn yɛ yionen se ɛbaa ə ghɛne ghene ɛnoo ə ghɛne ka ghel ə Christ. Kii nɛ̂ kine lu kenəə kɛ́ titiye se yɛ nɛɛy.

²Ghɛn yɛ ngvəmle ɛbaa ə ghɛn ghene ɛnoo ə ghɛne, kii nɛ̂ kine lu nchile yɛ̂ mbiy yɛ ɛy kiin ɛykak nɛ ɛy lu ge:

³“Ghɛne yî yɛ yio əbjuŋ, gese ki ɛychii ɛydia ɛ ketuu ntiɛ.”

⁴Ɛbaa ə ghone, ghàà ghɛn yɛ nɛɛy nɛ ghon ə ghɛne yafse ɛytem. Ghɛn lu se yɛ tiyse ghene tiysen, dine se ghene ka ghene yɛ nɛɛy əbnəə wɛ Báàba kɛŋen ge ghene yɛ nɛɛy.

⁵Əbkose, ghɛn yɛ yionen se ɛbaa ɛyfɛl nə ghɛne ghɛ́ ketuu ntiɛ fɛne. Ghɛn yɛ fane ghene, gese ngvəmle ghene nɛ̀ əbluuy wɛ əb lòòn ɛ ghɛne tetem kɛn dî-a ka ghɛne yionen se Christ.

⁶Ghɛn yɛ yionen se ghene nɛ wiy bek ka ghene kiyen ghɛn, ka ghene yɛ yio əbjuŋ se ghɛn. Ghɛn yɛ yionen se ghene ka əbkos ə Christ, nɛɛy kenəə kɛ Feyine kɛŋen nɛ̀ ɛytem ə yɛne ɛyjim.

⁷Ghɛn yɛ fɛl se ghene nɛ̀ ɛyteme, dî ka ghɛne fɛle nɛ lu se Báàba, nɛ wiy se wel.

⁸Ghɛn yɛ nɛɛy dì bek ka ghɛn keen ge Báàba yî fo əbmakte se naa ndɛ wɛ əb nɛɛyen njuŋ, kene əb lu kekos, kene əb báà se lu.

⁹Ghɛn ghɛ ɛbaa əbkose, ghɛn yɛ ki sɛy ndee ɛyjuŋ se əbkos ə wɛne. Ghàà ghɛn yɛ fanse ghene fansen. Ghɛn yɛ ke ge ghɛne ghe əbkos ə wɛne ghel ɛjim ki ba-ɛyfɛl nə ghɛn ɛ ɛyyio, nɛ lu wen wɛ əb tenen nsak se wel əbjim kɛn ghɛɛ-ghɛɛ.

¹⁰Mɛ me se ləysen ge: Ghɛn yɛ taa ka ghel ə Báàba. Ghɛn yɛ ki kediak kɛ wen wɛ əb táàn naa se ŋaŋe foon se ghɛn.

¹¹Ghɛn vii əbfua ɛyghoŋ se əbghun nɛ lu wɛ Feyine foon se ghɛn, ka ghɛne nɛ̂y teem ketaan se noo Satan ɛ əbnəə wɛ əb ghoonen nɛɛyen.

¹²Ke lu dî nɛ ghɛsen báà se noo nɛ lu wele-mesoŋ. Ghɛsen noo nɛ lu ghíì ghɛ́ saken, ghɛ ɛ́ kiin əbtaawe, ghɛ ɛ́ kiin kediak ɛ mbi nfiine; noo nɛ lu ghíì ghɛ ɛ́ kiin kediak ɛyfim kɛ ke chíàn ɛ əbfiɛf.

¹³Ke me se lu ge ghɛn vii əbfua ɛyghoŋ əbjim wɛ Feyine foon se əbghun, ka ɛ́ nɛ̂y loo lu ɛ kechii kɛ əbnəə befen é ghɛn yɛ lu kekwɛnten se softe nkfəyse sɛn se ntiɛ, se teem se yɛ lu se noo se mɛyse, se kò se yɛ tiy kɛn ɛyfeŋ.

¹⁴Ghɛn yɛ lu yi kebaaten, é əbluuy ə wɛne nɛ̂y yɛ lu ka kekuy kɛ ke ghalen wel ɛ əmnkeŋkeŋ, nɛ ɛychii yɛ́ titiye lu ka kekas kɛ wel ɛyghoŋe tɛɛken kenkaŋele ə wen so.

¹⁵Ghɛn yɛ lu kebaaten se fekte sakghɛ əbjuŋ wɛ əb gwiyen nɛ̀ əmnyiaŋe. Kii nɛ̂ kine nɛ̂y giamten wɛ̀ se jɛl ka guose ɛvəə sɛ wel ɛyghoŋ tuŋten.

¹⁶Ghɛn fó ɛytem se Feyine əbnəə nɛ̂ ghan əbjim. Kii nɛ̂ kine tɛɛke ghɛn ka nkɛ se fise ɛghoŋe Satan ghɛ ɛ́ baalen gwiyen.

¹⁷Ɛyboyse yɛ Christ nè boysen ghɛn yɛ lu ka kefol ɛyghoŋ kɛ wel ɛyghoŋe lóó əb sooy se tɛɛke ketuu ə wen so. Ghɛn liɛ sɛy giɛse Feyin ka fiak wɛ Keyioy ə Feyine foon se ghɛn è shik əbnoo vin so.

¹⁸Ghɛne lóò nɛɛy əbnəə əbjim ghɛn yɛ jem ge Feyine giamten ghɛn. Ghɛn yɛ́ jem əbliy əbjim ka Keyioy ə Feyine dinen. Ghàà ghɛn yɛ buune, è jia yɛ lu se bol se yɛ jem se ghel ə Feyine.

¹⁹Ghɛn yɛ jem sɛy se mɛ ge ɛ́ yɛ loo lu əbliy wɛ mɛ luun se suŋnen se ghele, Feyine ko fo ntum yɛ mɛ luun se loote se suŋnen nɛ̀ kediake se chiase chəm yɛ ɛy luun ɛ məme sakghɛ əbjuŋ.

²⁰Lu sakghɛ nɛ̂ vin wɛ mɛ liɛn kelike Christ se teefe se geese lii nchak. Ghɛn yɛ jem ge mɛ kó fekte nɛ̀ kediake ka mɛ luun se fekte.

²¹Taychikus wɛ wán-no ə wɛsen, wɛ ghɛsen koŋen, wel nɛ əb fo ɛytem se ɛyfɛl nə Báàba, nɛ̂y fekte sakghɛ wɛ kum mɛ se ghɛn ka ghɛne keele ka əbnəə luun ɛ mɛ jii.

²²Di ghɛy kenəə kɛ ke nɛɛy mɛ se tume wen se ghɛn ge əb gwiy è din se ghɛn ge ghɛs ghel ɛjim sɛ lu lɛɛy-a, è me lumse teteme tɛn.

²³Bay Feyin ghene Báàba ə wɛsen Jesus Christ kó fo əmnyiaŋ se ghɛne ghone-nyii, è nɛɛy é ghɛn yɛ ki ɛykoŋ, è gese fo ɛytem se wen.

²⁴Feyine kó cham ɛysene ghel ghɛ ɛ́ koŋen Báàba Jesus Christ nɛ̀ ɛykoŋe yɛ ɛy jia yî mɛy.