Read Oku Flb 1 Bible Online

Flb 1 - Oku bible

Flb 1

¹Lu mɛ Bool nɛ̀ Timoti ghɛ ghɛse fɛ́len se Christ Jesus. Ghɛse nyake ŋwaale yin se ghel ə Feyin ɛjim ghɛ ɛ́ luun ɛ Filibi nɛ ɛ́ fó ɛytem se Jesus Christ, nyake sɛy se ghele mbiye se kenone ghel ɛbeemene gese nɛ̀ se ghɛ ɛ́ giamten.

²Ghɛse lone ge Feyin wɛ Ba ə wɛsen ghene Báàba Jesus Christ cham ɛysen ə yɛn è gese nɛɛy é ghɛn yɛ ki tetem tezəətene.

³Loo lu ɛ leghɛ wɛ mɛ kwaaten ghɛn, mɛ ko bɛ́ɛ̀lè Feyin.

⁴Loo lu ɛ leghɛ wɛ mɛ jemen se ghɛn ghel ɛjim mɛ yɛ jem nɛ̀ ɛysaŋlee,

⁵bek ka ghɛn nè chinten mɛ è se giamten mɛ nɛ̀ ɛyfɛle sakghɛ əbjuŋ se kɛ̀ɛ̀tè se kechii kɛ mbiye kɛ ghɛn nè yion se kok se chin lan.

⁶Mɛ me se ke se əbluuy ge Feyin wɛ əb nè kɛɛten ɛyfɛl ɛyjuŋe yin ɛ ghɛne tetem é yɛ ndu kɛn so ɛ mbiy se chin ka əb yî mɛyse ɛ kechii kɛ Jesus Christe gwiy ɛ ten.

⁷Ke lu ɛ titiy se mɛ se yɛ kwaate ɛ jii ghan kum ghɛn, bek ka ghɛn luun ɛytem ə yom se nkan. Ghɛn nè chìntèn mɛ è se kiile sɛy mbose yɛ Feyine nè se foon san, ɛ leenen wɛ mɛ luun ɛ nchak nɛ̀ se əbliy wɛ mɛ nè bo ghanen fekten ge sakghɛ əbjuŋ lu əbluuy.

⁸Feyine ke ge kenəə kɛ mɛ suuyen lu se əbluuy. Jii yɛ ɛykoŋe lunen ɛ mɛ ɛytem kum ghɛn lu kɛn ka Christ Jesus se wene ngeŋ koŋen ghɛn.

⁹Mɛ jeme ge ghɛn yɛ koŋe ngeŋ ə sɛn nduu kɛn ɛ mbiy, gese jeme ge ghɛn yɛ loote ke əbnəə gese ke se tayte əbnəə,

¹⁰ka ghɛne keele jii yɛ lòó ghɛn chok kenəə kɛ ke luun ɛ titiy, Jeme ge ghɛn yɛ lu ghel ɛlanene nɛ kenəə wiy kɛ ɛ́ yɛ ghame ghɛn se ten se ndu se chin se kechii kɛ Christ gwiyen ɛ ten.

¹¹É ghɛn loo lu dî, è me yɛ ki nchiine ɛyjuŋ yɛ ɛy lòòn nɛ lu se Jesus Christ, nɛ ghele yɛne ngvəmle Feyin gese foo ɛykokse se wen.

¹²Ghone-nyii, mɛ kɛŋe se nɛɛy ge ghɛn keele ge kenəə kɛ ke ganen se mɛ lu nɛ ke sɛy nɛɛy ge sakghɛ əbjuŋ yɛ ndu nɛ lu ɛ mbiy.

¹³Lu bek kii nɛ̂ kine kɛ ghel ɛyghoŋ ɛjim ghɛ ɛ́ chiyen ntok gese nɛ̀ wel əbjim keelenmen ge mɛ lu ɛ nchak bek ka mɛ fɛ́len se Jesus Christ.

¹⁴Ɛylu ə yom ɛ nchak lu nɛ ɛy nɛɛy ndio ghone-nyii loote teem ketaan ɛ kenəə nə Báàba, è se fekte kenəə ə Feyin bo fane wiy.

¹⁵Mɛ ke ge ghene ɛlee fekte kenəə Christ, nɛ ɛ́ ghɛke mɛ ghɛken gese kɛŋe nɛ lu ɛvəə ə ghom, dî nɛ ɛlee fekte nɛ̀ ɛytem ɛyjuŋe.

¹⁶Ghel ghɛ ɛ́ fekten nɛ̀ ɛytem ɛyjuŋe fekte bek ka ɛ́ koŋen mɛ gese ke ge nè nɛɛy Feyin ge mɛ yɛ lu ɛ nchak fɛn, ka mɛ yɛ din ge sakghɛ əbjuŋ lu əbluuy.

¹⁷Nɛ ghɛ́ kenghɛk ghii, fekte Christ nɛ̀ kentáŋe, nɛ lu nɛ̀ ɛytem ɛybee, kwaate ge ghɛy jii yɛ lòó ghene nɛɛy é ɛyteme yɛ foo ngɛk san ɛ leenen wɛ mɛ luun ɛ nchak.

¹⁸Kii nɛ̂ kii lɛ kume mɛ se nkan-a? Mɛ saŋle kome saŋlen bek ge, ka ghene yɛ fekte nɛ̀ ɛytem ɛybee, kene ɛ́ yɛ fekte nɛ̀ ɛyjuŋe, fene kɛ ke luun lu ge ɛ́ fekte kenəə kɛ kum Christ.

¹⁹Nɛ mɛ lu se yɛ saŋle bek ge mɛ ke ge ka ghɛne jemen se mɛ nɛ Keyioy Kelanene nə Jesus Christ giamtene lu nɛ kenləysen əbnəə nɛ̂ ghan əbjime yɛ lu ge mɛ boy boyen.

²⁰Kenəə kɛ mɛ kɛŋen naa ketaan, gese kwaate lu ge lòó mɛ jia yî yɛ ki kenchoksen ɛ mɛ ɛyfɛl, dî è yɛ ki ɛytem se yɛ nduu ɛ mbiy nɛ̀ ɛyfɛle ka mɛ liɛ ngeŋ ə yom ɛyjim è fo ɛykokse so se Christ ɛ leenen nɛ̀ naamen ɛ leghɛ, kene mɛ taa taan, kene mɛ kuo kuon.

²¹Mɛ suuye lɛ bek ka mɛ goken əbtaa é mɛ yɛ kokse Christ, mɛ kuo é ke jof jofen san.

²²Mɛ lòò è gok əbtaa, è jia kuo kuon é mɛ yɛ fɛl ɛyfɛl yɛ ɛy yɛ giamtene ghel, se lu nɛ mɛ báà se ke ge mɛ sɛ chok ke kɛ-a?

²³Mɛ tiy ɛ feteten ɛ feteten ke wiy ge mɛ sɛ ndu jii ghááy-a? Mɛ semte se ndu se yɛ lu ghɛse Christ bek ge kii nɛ̂ kii jofe chia.

²⁴Se lu bek ghɛn, ke me se lu kejuŋ ge mɛ gok əbtaa.

²⁵Mɛ loote ke se əbluuy ge mɛ nɛ̂y gok ghɛsen è yɛ giamtene ghɛn ka ghɛne yɛ kuy gese saŋle ka ghel ghɛ ɛ́ foon ɛytem se Jesus Christ,

²⁶é mɛ gese lóó lu ghɛsen é ghɛn mɛyse è fo ɛykokse se Christ Jesus bek ka mɛ kasen è gwiy.

²⁷Kenəə ketaa lu ge ɛychii ə yɛne yɛ lu kɛn ghɛɛ-ghɛɛ ka sakghɛ əbjuŋ wɛ kum Christe suŋnen, ka mɛ loo lu è gwiy se ghɛn é ke yɛ lu kejuŋ, yɛ lu wɛ mɛ jia gwiy, é mɛ yɛ yio ge ghɛn tiy ketaan, lu se əbchio əbmok, ki ɛytem ɛymok gese loolè se kefaa kemok se yɛ din əbluuy wɛ kum sakghɛ əbjuŋ.

²⁸Ghàà ghɛn yɛ fane ghel ghɛ ɛ́ banen ghɛn naa se nkan. Kii nɛ̂ kine lu əbchəyte se din se ghene ge ɛ́ mɛyse ghene mɛysen è boyse ghɛn bek ge kejime lu se Feyine.

²⁹Ke lu dî bek ge Feyine nɛɛymen ge ghɛn jia beeme kɛn Christ beemen, dî è yɛ lu se yɛ yɛne ngɛk bek wen.

³⁰Leenen lu nɛ ghɛne chinten mɛ é ghɛsen yɛ loolè kebiine kemok se yɛ noo əbnóò wɛ ghɛn nè yɛnen nɛ mɛ noo nɛ ko bo bɛɛy əbghene wɛ ghɛne yion ge mɛ bo noo.