Read Oku Flb 2 Bible Online

Flb 2 - Oku bible

Flb 2

¹Mɛ ke ge ghɛn chintenmen Christ əb se lumse tetem ə tɛn, ɛykoŋ yɛ əb koŋen ghɛne me se foo ɛyzəəte se ghɛn. Mɛ gese se ke ge ghɛne ghe Keyioy Kelanene wiysenmen əbghun, naa ndɛ ɛ ghɛne məm gese se ki ɛytem ɛyjuŋe, gese koosen ɛysen se ngeŋ ə sɛne.

²Ka ke luun dî, ghɛn nɛɛy é mɛ yɛ loote saŋle. Ghɛn yɛ ki ɛykwaate ɛymok ki əmngiɛl ɛ ghɛne məm, lu se əbchio əbmok, chio ntaŋ ɛymok.

³Ghàà ghɛn yɛ nɛɛye əbnəə nɛ wel taŋe nɛ lu kɛn ketuu ə wen, è gese jia yɛ ghaŋse əbghun. Wel yɛ ki ɛyngvəmle se ghel ɛlee yɛne ge chia ghene yi.

⁴Wele loo nɛɛye kenəə, ghàà əb yɛ nɛɛye kɛn ge ke giamten nɛ lu yi, əb yɛ nɛɛy ge ke giamten ghel ɛlee.

⁵Ndee yɛ ghɛn luun se yɛ ki lu ɛynkii ndee yɛ Christ Jesus nè kiin.

⁶Əb nè lu kɛn naa Feyin è jia se yɛne ge yi gok è yɛ lu kɛn Feyin

⁷è sɛy liɛ ngeŋ ə wen ka kefaa lólò è se lu əblame kekos ɛ́ bii wen kɛn naa ka wele-mesoŋ

⁸Əb se lu ka wele-mesoŋ dî, è səkse ngeŋ ə wen è se yionen se Feyine, è beeme se kuo naa ɛykuo nɛ lu yɛ kentame.

⁹Bek kii nɛ̂ kine, Feyine lose wen è lɛm ɛ kelik kengaŋtene, è buk wen nɛ̀ ɛyghel yɛ ɛy chian teghel tejim.

¹⁰Ka wel əbjim ɛ ɛyyio, nɛ ɛ ketuu ntiɛ gese nɛ̀ ghɛ ɛ́ nè kuonmen yî təm ɛləy ɛ Jesus ɛyshiɛ.

¹¹Wel əbjime yî suuy nɛ̀ əbchio ə wene ge Jesus lu Báàba, é Bay Feyin me yɛ ki ɛykokse.

¹²Ke me se lu é sun ə some ge ka ghɛn nè yionen se Feyine əbliy wɛ mɛ nè luun ghɛsen, ke lu ɛ shii se ŋaŋ ge ghɛn ko yɛ yionen se wen ɛ leenen wɛ mɛ wiyen ghɛsen. Ghɛn yɛ nɛɛye əbnəə wɛ əb luun ɛ titiy, fane, chiŋe fɛ wel fɛy ka ghel ghɛ Feyine chokenmen.

¹³Ghɛn yɛ ke ge lu Feyin wɛ əb nɛɛyen nɛ ghɛn ki shii ghene kediake se yɛ nɛɛye əbnəə wɛ əb koŋen.

¹⁴Ghɛne yɛ loo nɛɛy naa ghɛ, ghàà ghɛn yɛ vək gese beke wiy mbek,

¹⁵ka ghele jia yɛ ghame ghɛn é ghɛn me yɛ lu ghon ə Feyin ɛjuŋe ɛ məme mbi yɛ ghel ɛbee luun ɛ ten se ɛydio nɛɛye jione se ŋaŋ. Ghɛn lu se yɛ liak ɛ ghene məm ka əmnjesme liak ɛyyio mbàk,

¹⁶ka ghɛne fekten sakghɛ əbjuŋ wɛ əb fóon ɛychii yɛ ɛy jia yî mɛy. Ghɛn loo nɛɛy dì, é náà lóó lu ɛ kechii kɛ Christe kase gwiyen ɛ ten, é mɛ yɛ saŋle ge ɛyfɛl ə yome nè báà lɛy se lólò.

¹⁷Chèmè lu nɛ mɛ nɛ̂y yɛn ngɛk è kuo bek ka mɛ fekten sakghɛ əbjuŋ ghɛɛ-ghɛɛ ka ghɛne yɛ́nen ngɛk bek ka ghɛn beemen əbghen fene mɛ yɛ chɛklee gese saŋle ghɛsen.

¹⁸Lu ghɛɛ-ghɛɛ ka ghɛn luun se yɛ chɛkle gese saŋlee ghɛsen.

¹⁹Mɛ shi se tume Timoti se ghɛn ɛ lefɛ Báàba Jesus beemen, ka mɛ nɛ̂y yio sakghɛ wɛ əb lòòn se ghɛn, é ɛytem ə yome yɛ lu ɛyzəəten.

²⁰Mɛ báà se ki wel əblee ka wen wɛ əb loote kiin ghɛn ɛ ɛytem.

²¹Mɛ suuye lɛ bek ge naa ndɛ fɛn luŋe kɛn nɛ̀ kenəə ə wene, ki wiy shii se əbnəə wɛ kum Jesus Christ.

²²Ghɛn ko ke ka ndee ə Timoti jofen. Ghɛse wen nè jɛle fekte sakghɛ əbjuŋ, nɛ əb giamten mɛ ghɛɛ-ghɛɛ ka wan sɛɛ giamtene bay.

²³Mɛ kwaate se tume wen se ghɛn naa ɛ leghɛ wɛ mɛ keelen kenəə kɛ ke luun kum mɛ.

²⁴Mɛ lu nɛ mɛ samse naa ketaan ge Báàba nɛɛy, é mɛ se mɛ ngeŋ yaŋse gwiy, è yɛn ghɛn.

²⁵Mɛ yɛnmen ge ke lu ɛ shii ge mɛ tinse wán-no ə wɛsen wɛ Ebafloditus se ghɛn, əb fɛle ghɛse wen noo ketaan ka wel ɛyghoŋ ge ɛyfɛle yɛ ndu ɛ mbiy. Lu wen wɛ ghɛn nè tumen ge əb gwiy è yɛ giamtene mɛ.

²⁶Mɛ tinse wen lɛ bek ge əb nè se ki shii se yɛne ghɛn ghel ɛjim, nɛ ke foo ngɛk se wen ka ghɛn nè yionmen ge əb yafe.

²⁷Ke lu se əbluuy ge əb nè lô yaf è boy se kuo, dî Feyine cham ɛysen ə wen, è cham sɛy yome fɛ əb kuo é ngɛk ə some gise.

²⁸Mɛ me se loote ki shii se tinse wen se ghɛn ka ghɛne gese yɛn wen, è yɛ saŋle, é ɛytem ə yome zəəte sɛy.

²⁹Ke me se lu ge ghɛn fiisen wen nɛ̀ ɛysaŋle ɛyghakene ka ghel ə Báàba. Ghɛn yɛ ngvəmle ɛynkii ghel ka wen,

³⁰bek ge əb nè lô boy se kuo bek ɛyfɛl ə Christ, è beeme se sote se gwiy se yɛ nɛɛye ɛyfɛl yɛ nè lòó ghɛn jia nɛɛy se mɛ.