Read Oku Flb 3 Bible Online

Flb 3 - Oku bible

Flb 3

¹Ghone-nyii, kenəə kɛ lòó mɛ bo suuy lu kɛn ge ghɛn yɛ saŋle bek ka ghɛn luun ghon ə Báàba, nɛ lòó mɛ jia tan shii se gese se nyak kenəə nɛ̂ kin se ghɛn. Mɛ nyake lɛ ka ke yɛ tɛɛke ghɛn.

²Ghɛn yɛ toknen kum ghel ghi ghɛ ɛ́ befen ka buose. Ghel ghi ghɛ ɛ́ momlen əbnəə əbbee. Lu ghene ghɛ ɛ́ tenten əblik əbghun nə ɛluumene.

³Ghɛsen loote lu ghel ghɛ ɛ́ nɛytenmen ɛ ndee nə Feyine, ghii dii ghɛ ɛ́ koksen Feyin nɛ̀ kediak kɛ Keyioy ə wene fóon. Ghɛsen lu ghii ghɛ ɛ́ saŋlen bek ka ghɛsen luun ghele Christ Jesus. Ghɛsen lu ghii ghɛ ɛ́ báà se lɛme ɛytem nɛ lu ɛ ndee ɛylak.

⁴Mɛ se mɛ ngeŋ kè lòó mɛ yɛ ki əbnəə wɛ lòó əb nɛɛy é mɛ yɛ lɛm ɛytem ə yom ɛ ndee ɛylak, yɛ́ lu ge wel yɛ́ kwaate ge yi ke kenəə kɛ lòó ke nɛɛy é yi yɛ lɛm ɛytem ɛ ndee nɛ̂ fo, fene mɛ lu wele wɛ mbiy.

⁵Ɛ́ nè nɛyte mɛ ɛybam əbwɛy əbful ka ɛ́ biin mɛ. Mɛ lu wele Islael, ɛ ɛykfəə nə Benjamin. Mɛ loote lu Heblu se ɛybii, nɛ ɛbaa ghome lu Hebluse. Lu se nchil ə Moses nɛ mɛ lɛme ka wele kenone Falisee.

⁶Mɛ nè lô loote fo ɛytem se kenəə nɛ̂ ghan ɛ jii yɛ mɛ nè nəksen ghel ɛbeemene, gese loote lɛme nchil ɛ jii yɛ nè lòó wel jia gham mɛ.

⁷Dî nɛ əbnəə əbjim wɛ mɛ nè taŋen ge lu əbnəə wɛ lòó əb giamten mɛ lu nɛ mɛ yɛn ɛ leenen ge lu kenlɛy bek ka mɛ yɛ lu ghɛse Christ.

⁸Kenəə kɛ ke gese luun lu ge mɛ liɛmen naa əbnəə ten ge lu kenlɛy, ka mɛ loote keele wel wɛ luun Báàba ə wom Christ Jesus. Kii nɛ̂ kine chia əbnəə əbjim. Lu bek wen wɛ mɛ mayen əbfua əbjim, liɛ əbghene əbjim ge lu yafse ka mɛ kiile Christ ka sɛk ə wom,

⁹é ghɛse wen chinten è yɛ lu kefaa kemok nɛ mɛ bo yɛne wiy ge lu kediak ə kom kɛ lòó ke nɛɛy, é mɛ yɛ lu ɛ titiy ɛ ɛyshiɛ nə Feyine ge yi ka mɛ lɛmen nchil. Lu wen wɛ Christ wɛ əb nɛɛyen mɛ se lu ɛ titiy ɛ ɛyshiɛ nə Feyine. Ghɛy jii yɛ əb liɛn wel ge wele titiy bek ka əb foon ɛytem se Jesus Christ.

¹⁰Mɛ kɛŋe se yɛ loote ke Christ gese kɛŋe ge kediak ə wen wɛ əb nè loolen se ɛykuo yɛ fɛl ɛ mɛ əbghun, koŋe se chintene wen se yɛ yɛne ngɛk ka əb nè yɛnen ɛ fekake kentam, se yɛ lu ka wen ɛ jii yɛ əb nè kuon ɛ ten,

¹¹ka chèmè nɛɛy ghɛ é mɛ náà yɛ lu sɛ̂y wel əblee wɛ ɛ́ yî lose se ɛykuo.

¹²Ke báà se lu ge mɛ kiilemen vii nɛ̂ vine əbjim, nɛ wiy sɛy ge mɛ shi kekwɛnten. Mɛ bo fáyte fayten nduu ɛ mbiy ka mɛ nɛ̂y kiile kii dii kɛ Jesus nè liɛn mɛ ge mɛ yɛ ki.

¹³Ghone-nyii, ke báà se lu ge mɛ tesemen kiile, dî nɛ mɛ kɛŋe se lɛysen əbnəə wɛ əb chianmen, se yɛ luŋe ndu se kiile kii kɛ ke luun ɛ mbiy.

¹⁴Mɛ bo nyiŋe nduu kɛn ɛ mbiy se ndu se chin ghaa mɛ mɛyse kenyiŋen, ka mɛ kiile əbmakte wɛ luun ɛychii yɛ ɛy luun ɛ ɛyyio yɛ Feyine nè tumen Christ Jesus ge əb jaŋ mɛ é mɛ kiile.

¹⁵Ghɛsen ghɛ ɛshiɛ yionmen ɛ kenəə ə Feyin lu se yɛ ki ɛynkii ɛykwaate nɛ̂ ghan. Dî nɛ wel ki ɛynkii ɛykwaate ɛychine, é Feyine nɛ̂y din jas ə wen se wen.

¹⁶Kenəə kɛ ke luun ɛ shii lu ge, ghɛsen yɛ chii kɛn ɛ jii yɛ Feyine nɛɛymen ghɛsen keele əbnəə è ndu chin.

¹⁷Ghone-nyii, ghɛn yɛ ki kɛn ɛynkii nchiine yɛ mɛ kiin, è beknen ɛychii ə ghel ghɛ ɛ́ chiin ka ghɛs nè dinen se ghɛn.

¹⁸Ghele lu se ɛydio ghɛ ghene chiin ka ghene bane ntum yɛ ɛy suŋnen kum ɛykuo Christ ɛ kentam. Lu ghel nɛ̂ ghin ghɛ mɛ lóó mɛ yɛ suŋnen kum ghene se ghɛn ɛ kaŋ ɛ kaŋ, è kò gese se suŋnen ɛ leenen kum ghene nɛ̀ əmshiɛme ɛshiɛ.

¹⁹Ghene nɛ̂y kuo è ndu kɛn ɛ əbvəs. Feyin fɛ ghene koksen lu əbchio ɛyyiɛ. Ghene nɛɛye əbnəə əbbee chèmè ghuumen wiy se nkan, sɛ́y ghaŋse nɛ lu əbghun. Ghene lɛme ɛytof ə ghen kɛn ɛ əbfua wɛ̂ mbi fɛne.

²⁰Ghɛsen lu kɛ́sene ghele ketume kɛ ɛyyio nɛ ghɛsen chiyte vi di wɛ ə́b loo ghô, è gwiy, è boyse ghɛsen se ngɛkse. Wel nɛ̂ vi lu Báàba ə wɛsen wɛ Jesus Christ.

²¹Əb náà kubsen ɛyghun ə yɛ́sen yin yɛ luun əbfua lólò, ɛy yɛ lu ɛyghun yɛ ɛy jofken gese taa kɛn ka wɛ́ wene. Əb náà kubsen ɛyghene nɛ̀ kediak kɛ ə́b liɛ əbfua əbjim so, əb yɛ lu ɛ wen ɛyshaa ɛysak.