Read Oku Flb 4 Bible Online

Flb 4 - Oku bible

Flb 4

¹Ke me se lu ghone-nyii ge ghɛn teem ketaan kɛn dî è yɛ loote ghale kenəə kɛ kum Báàba. Mɛ koŋe ghɛn nɛ ghɛn gese lu mbukma ə yom. Mɛ loote koŋe ghɛn.

²Mɛ beŋte ghɛne Yuodia ghene Sintike ge, ghɛn gwiy se əbchio əbmok ka ghel ghɛ ɛ́ foon ɛytem se Báàba.

³Mɛ kô se suuy se wɛ̀ wele ngoo nə mɛ ge, wɛ̀ giamten əbkiy nɛ̂ ghin, bek ge ghɛse ghene ghe Klement gese nɛ̀ ghel ɛyfɛl ɛlee, nè lô se loole se kefaa kemok fekte nduu nɛ̀ sakghɛ əbjuŋ. Teghele ghel nɛ̂ ghin lu ɛ ŋwaale ɛyboy.

⁴Ghɛn yɛ saŋle əbliy əbjim bek ge ghɛn lu ghon ə Báàba nɛ mɛ gese biite ge: Ghɛn yɛ saŋle.

⁵Ghɛn yɛ lu ɛ jii yɛ wel əbjim keele ge ghɛne loole ge wɛ̀ɛ̀ ghɛne ghele. Ghɛn lu se yɛ ke ge əbliy wɛ Báàba gwiy ɛ ten shi ɛ keghoo.

⁶Ghàà ghɛn yɛ fof kum kenəə naa ghɛy. Ghɛn yɛ jem se Feyine, gwiye nɛ̀ əbnəə əbjime se wen, bife kenəə kɛ ghɛne kɛŋen ge əb nɛɛy se ghɛn, gese bɛ̀ɛ̀lè wen,

⁷é ghɛn lóó nɛɛy dì é Feyine me yɛ nɛɛye nɛ ghɛn ki tetem tezəətene, nɛ̀ tekwaate tejuŋe ka ghel ghɛ ɛ́ yɛkten ɛ Christ Jesus əbghun. Ɛytem ɛyzəətene yɛ fóon Feyin lu nɛ lòó wel jia keele se fek.

⁸Mɛ me se ləysen suuye ghone-nyii ge, ghɛn yɛ kwaate kɛn əbnəə wɛ əb luun ɛ əbluuy, əbnəə wɛ əb kiin ɛyvəm, lu ɛ titiy, nɛ mbee wiy ɛ ten, əbnəə wɛ əb jofen, wɛ lòó wel kiy è yɛ koŋ. Loo lu əbnəə lan lɛ è ndu fəy, əbnəə yɛ lu wɛ lòó ɛ́ yɛ bente, é ke yɛ jof ge ghɛn yɛ kwaate əbghene.

⁹Ghɛn lu se yɛ nɛɛye naa ghɛ wɛ ghɛn yiɛken san, mɛ vii ɛ ghɛne keghoo, kene lu kɛ mɛ nè suuy suuyen, kene lu kɛ mɛ nè nɛɛye nɛɛyen, é Feyin wɛ əb zəəsen tetem ə ghel yɛ lu ghɛne ghene.

¹⁰Mɛ saŋle naa se ŋaŋ ka wel wɛ əb foon ɛytem se Báàba bek ka ghɛn lu nɛ ɛ́ gese din shii wɛ ghɛn kiin se mɛ. Mɛ báà se suuye ge ghɛn nè lômen yal se yɛ ki shii san, ke lu ge jii nè wiy yɛ nè lòó ghɛn din ka ɛ́ dinen ɛ leenen.

¹¹Mɛ báà se suuy sɛy lɛ se din ge ghɛn maaymen mɛ. Mɛ keentenmen se yɛ chii, kene əbnəə lu naa ɛ jii ɛykɛ.

¹²Mɛ keelemen se yɛ chii kejuŋ ɛ əbliy wɛ kefaa chèmè wiyen san, è gese keele se yɛ chii kejuŋ ɛ əbliy wɛ mɛ kiin se ɛydio. Kene əbnəə lu ɛ jii ɛykɛ, fene mɛ lootemen keenten se yɛ chii, kene mɛ yiɛ kejuŋ, kene mɛ chii se jeŋ, kene mɛ ki se ɛydio, kene mɛ lu ɛ ketan.

¹³Lòó mɛ nɛɛy əbnəə əbjim əbtaawe nə Christ wɛ əb foon kediak san.

¹⁴Dî nɛ ke kò lu kejuŋ ka ghɛn nè giamten mɛ ɛ mɛ ngɛkse.

¹⁵Ghɛne ghɛ́ Filibi loote ke ge nè lu ghɛn ghɛ ɛ́ nè foon əbfua se yɛ giamtene mɛ so, ghɛn nè kɛɛte əbliy wɛ ghɛn nè kɛɛten yio sakghɛ əbjuŋ ɛ əbliy wɛ mɛ nè loon se Masedonia. Kenon kelee nè báà gese se lu kɛ yɛ toke mɛ buu kɛn ghɛn.

¹⁶Chèmè lu əbliy wɛ mɛ nè luun ɛ Tessalonika ghɛn nè tinse əbfua san naa ɛ kaŋ ɛ kaŋ.

¹⁷Mɛ báà se suuy lɛ ge mɛ kɛŋe se kiile kefaa. Mɛ chɛkle nɛ lu ɛylaame yɛ Feyine nɛ̂y laame ghɛn bek kenəə kɛ ghɛne nɛɛyen se mɛ.

¹⁸Mɛ kɛŋe se din ge mɛ lu nɛ mɛ kiile əbfua əbjim wɛ ghɛn nè tinsen san, əb dio è chia ka mɛ kɛŋen. Əbfua nɛ̂ vin wɛ ghɛn tinsen Ebafloditus gwiy è fo san lu nɛ əb kwɛn ka lòó əb loote giamten mɛ. Əbfua tene lu ka ɛyfô yɛ ɛy kiin keləm kejuŋe gese lu ɛynkii ntaŋle yɛ lòó Feyine fii è yɛ chɛkle.

¹⁹Feyine nɛ̂y liɛ əbfua ɛ məme ɛybose ɛyghuye yɛ ɛy luun se Jesus Christ, è fo se ghɛn é ghɛn jia bo yɛ tane kefaa.

²⁰Ghɛsen yɛ fo ɛykokse se Feyin wɛ Ba ə wɛsen əbliy əbjim nɛ ɛymɛye wiy Amen.

²¹Ghɛn chakte ghel ə Christ Jesus ɛjim ghɛ ghɛne ghene luun. Ghone-nyii ghɛ ghɛse ghene luun chakte ghɛn.

²²Ghel ə Feyin ɛjim ghɛ ghɛse ghene luun fɛne chakte ghɛn, naa nɛ̀ ghel ə Feyin ɛjim ghɛ ɛ́ luun ɛ əbfon ə Lûme ntok.

²³Báàba Jesus Christ kô cham ɛysen ə yɛn ghel ɛjim, è yɛ lu ghene keyioy kɛne.