Read Oku Kol 1 Bible Online

Kol 1 - Oku bible

Kol 1

¹Lu mɛ Bool wɛ Feyine nè yɛnen ge yi chok ge wele ntum nə Christ Jesus. Lu ghɛse wan-nyii wɛ Timoti.

²Ghɛse nyake ŋwaale yin se ghel ə Feyin ɛ Kolosia, ghone-nyii ghɛ ghene foon ɛytem se Christ è se lu kefaa kemok ghene ghene. Feyin wɛ ba ə wɛsen ko cham ɛysen ə yɛn, fo nzəəte se ghɛn.

³Ghɛse loo jem se ghɛn naa ɛ leghɛ, ghɛs yɛ foo bɛ́ɛ̀lè se Feyin wɛ luun Bay se Báàba ə wɛsen Jesus Christ.

⁴Ghɛse nɛɛy dì bek ɛytem yɛ ghɛs yion ge ghɛn fó se Christ Jesus, gese nɛ̀ ɛykoŋ yɛ ghɛn kiin se ghel ə Feyin ɛjim.

⁵Ghɛne nɛɛye əbnəə nɛ̂ vin bek ka ghɛne chiyten se kiile njuŋ yɛ Feyine baaten se ghɛn ɛ ɛyyio. Ghɛn nè keele kii nɛ̂ kine əbliy wɛ ghɛn nè kɛɛten è yio giɛ əbluuy yɛ luun sakghɛ əbjuŋ.

⁶Sakghɛ əbjuŋ nɛ̂ vin wɛ əb nè gwiyen se ghɛn saanken nduu ɛ mbi yin ɛyjim, kubsen ghel nɛ ɛ́ nɛɛye njuŋ kɛn ghɛɛ-ghɛɛ ka əb nè kubsen ghɛn se kɛ̀ɛ̀tè se kechii kɛ ghɛn nè yion, è keele əbluuy wɛ kum ɛycham ɛysen nə Feyine se ghele mbee.

⁷Ghɛn nè lômen yio kum ɛykoŋe Feyin nɛ̂ yin se Ebaflas wɛ luun wán-nyii wɛ ghɛse ghene fɛ́len. Əb lu nɛ əb liɛ kelik ə kɛs, è se fɛle se Christ nɛ̀ ɛyteme.

⁸Əb lu nɛ əb din se ghɛs jii yɛ Keyioy ə Feyine nɛ̀ɛ̀yèn, ghɛn se ki ɛykoŋ se ghele ɛ ten.

⁹Se lu bek kii nɛ̂ kine, ghɛse me se jeme kɛn jemen se ghɛn əbchii əbjim se kɛ̀ɛ̀tè se kechii kɛ ghɛs nè yion sakghɛ kum ghɛn. Ghɛse lone ge Feyine ko nɛɛy é ghɛn loote keele əbnəə wɛ əb kɛŋen ɛ ghɛne nchiine, è nɛɛy é ghɛn yɛ ki ɛytof se yɛ keele əbnəə əbjim wɛ Keyioy ə wene dinen.

¹⁰Ghɛse jeme lɛ ka ghɛne yɛ chii ɛychii yɛ Báàba kɛŋen, loote nɛɛye əbnəə wɛ əb koŋen, me nɛɛye njuŋ ɛ əbnəə əbjim wɛ ghɛne nɛɛyen, gese keele kenəə kɛ kum Feyin nduu ɛ mbiy.

¹¹Feyine kó liɛ kediak əbchio əbyúméné nə wen kɛ ke chian əbnəə əbjim, è nɛɛy é ghɛn yɛ taa ka ghɛne yɛ kul ɛytem, wensene əbnəə əbjim nɛ̀ ɛysaŋlee,

¹²foo bɛ́ɛ̀lè se Bay wɛ əb nɛɛyen ghɛn se lu kekwɛnten se kiile kii dii kɛ əb nè lɛmen se ghel ə wene ghɛ ɛ́ chiin ɛ ɛyban.

¹³Əb lu nɛ əb fii ghɛsen se kediak kɛ ke ghalen ghɛsen ɛ mbi nfiine, è chiase ghɛsen ɛ́ lii è ndu ɛysak nə wan ə wen wɛ əb koŋen,

¹⁴nɛ lu wan nɛ̂ vi wɛ əb nè tenen ghɛsen se ɛykuo, dii ge əb nè lɛyse mbee ə sɛsen.

¹⁵Ghɛsen yɛne Christ, me keele jii yɛ Feyine luun ɛ ten, bek ka lòó ghɛsen jia yɛn Feyin. Christ ki əbtaawe wane wɛ̂ mbiy ɛ ketuu əbfua əbjim wɛ Feyine nè bomen.

¹⁶Ke lu dî bek ka Feyine nè bomen əbfua əbjim ɛ ɛyyio ghene se ntiɛ ɛ kediak nə Jesus Christ, əbfua wɛ əb yɛnsen, nɛ̀ wɛ əb báà se yɛnsene, kene wɛ əb saken, nɛ̀ wɛ əb kiin kediak nɛ̀ əbtaawe. Feyine nè bom əbfua əbjim ɛ wen ə kediak, è bom nɛ lu se wen.

¹⁷Nɛ Feyine geese bom əbfua əbjim nè lu nɛ Christ lu, nɛ siyse wen əbfua əbjim ge əb yɛ lu ɛ titiy.

¹⁸Christ lu ketuu se kenchintene ghel ɛbeemene ɛjim kɛ luun əbghun ə wen. Ɛychii kenchinten nɛ̂ kine lòò nɛ lu se wen, lu wen wele wɛ́ mbiy wɛ Feyine nè losen se ɛykuo ka əb yɛ lu ɛ mbiy əbfua əbjim.

¹⁹Nè koŋ Feyin ge wan vi loo lu ɛ ketuu ntiɛ è yɛ lu ka yi luun jii sejim,

²⁰ka əb nɛɛy é ghel ɛjim ɛ ɛyyio nɛ̀ se ntiɛ, fiile se yi. Feyine ghene ghele me se fəye kejuŋ bek əmnduŋ mə ɛykuo nə wen ɛ kentam.

²¹Nè lu se mbiy nɛ ghɛne ghe Feyine lu ɛgiabsen. Ghɛne ghe Feyine nè fəye wiy fo bek ka ghɛn nè kiin tekwaate tebee gese nɛɛye əbnəə əbbee.

²²Se lu ɛ leenen nɛ Feyine nɛɛymen ghɛne ghene se fəye fo bek ɛykuo ə Christ se kechak əbghun ka ghɛne me yɛ lu ghel ɛlanene ghàà njio, nɛ wel gese wiy se ghame ghɛn ɛ ɛyshiɛ nə Feyine.

²³Ghɛy ka lòó ke yɛ lu se ghɛn ɛ əbliy wɛ ghɛne foon ɛytem se kenəə ə Feyin nduu kɛn ɛ mbiy nɛ ɛ́ teem ketaan, è softe nkfəyse, è jia se shiken ɛ ɛykwaate ɛyjuŋe yɛ sakghɛ əbjuŋ nè kiin se ghɛn. Lu sakghɛ nɛ̂ vin wɛ ɛ́ fektenmen kal se wel əbjim ɛ mbi, nɛ lu əbghen wɛ mɛ wɛ Bool fɛ́len ɛ ten.

²⁴Mɛ me se saŋlee kɛ́ leenene bek ka mɛ yɛ́nen ngɛk bek ghɛn, mɛ mɛyse yɛnen ngɛk yɛ Christ nè yɛnen, yio ɛylum ɛ mɛ əbghun bek əbghun ə wen wɛ luun kenchintene ghel ɛbeemene.

²⁵Feyine nè chok mɛ è vii ɛyfɛl nɛ̂ yin ɛ mɛ keghoo ge mɛ yɛ fekte kenəə kin se ghɛn ka mɛ nɛɛy é ghɛn keele kenəə ə wen kejim kejim.

²⁶Feyine nè lô lete sakghɛ nɛ̂ vin se ngukse se ɛydio se ghele ghɛ́ mbiye-mbiye, se lu ɛ leenen nɛ əb dinmen se ghel ghɛ luun ghɛ́ wene.

²⁷Feyine nè liɛ ge yi náà din kenəə kɛ əb leten kum əbghaake əbchio əbyúméné nə wen se əbtume. Kenəə nɛ̂ kin dì lu ge Christ lu ɛ ghɛn ghel ɛjime məm, nɛ lu wen wɛ əb nɛɛyen ge ghɛsen yɛ loote ke ge ghɛsen yî yɛ lu sɛ̂y ɛ məme əbghaake nə Feyine.

²⁸Ghɛse me se fekte kenəə kum Christ se wel əbjim nɛ̀ ɛytof yɛ Feyine foon ɛyjim, tefe ghene gese dinte əbnəə se ghene ka ghɛse liɛ ghene é ghene gwiy ɛ Feyine ɛyshiɛ ka ghel ghɛ ɛ́ shiin ghel ə Christ.

²⁹Mɛ fɛle ɛ kenəə nɛ̂ ghan naa ketaan, luŋe nɛ̀ kediak kejime kɛ Christ foon se mɛ, nɛ kediak nɛ̂ kine yɛnsen ɛ mɛ ɛyfɛl ɛ jii ɛytaa.