Read Oku Kol 2 Bible Online

Kol 2 - Oku bible

Kol 2

¹Mɛ kɛŋe ge ghɛn keele ge mɛ luŋe naa se ŋaŋ ɛ ghɛne kenəə gese nɛ̀ se ghele Laodisea, gese nɛ̀ se ghel ɛlee naa ɛjim ghɛ ɛ́ chèmè nè bɛɛy ghàà yi yɛn mɛ sɛy.

²Shii ə wom lu ge mɛ nɛɛy é tetem ə ghene yɛ taa, nɛ ghene gese lu kefaa kemok ɛ jii yɛ ghene koŋen ngeŋse ghen ɛ ten, é ghene me yɛ ki əbghaake əbjim wɛ əb luun se wel wɛ əb lootemen keele kenəə kɛ kum Christ è jia gese se maanen kenəə. Di ghɛy ka lòó ghene loote keele chəm ə Feyin yɛ luun Christ se wene ngeŋ.

³Əbnəə əbjim wɛ kum ɛytof ə Feyin lu ɛ Christe məm ka Feyine leten.

⁴Mɛ suuy lɛ bek ka mɛ báà se koŋe ge wel yî lobte ghɛn nɛ̀ giɛ seyume ge yí ka yi keen mbek.

⁵Chèmè lu ka mɛ báà se lu ghɛsen se kechak əbghun, dî nɛ mɛ lu se keyioy, saŋle se yɛne jii yɛ ghɛne chiin ɛ ten kejuŋ gese saŋlee bek ka ghɛn foon ɛytem se Christ ketaan.

⁶Se lu ka ghɛn fiisenmen Christ Jesus ge Báàba, ghɛn me yɛ chii ghɛne ghe wen se kefaa kemok.

⁷Ghɛn nɛɛy é ɛghaŋ ə ghɛne tuuy ɛ wene məm, é ɛychii ə yɛne yɛkte nɛ lu ɛ wen əbghun. Ghɛn yɛ loote taa ɛytem yɛ ghɛn foon se wen kɛn ka ɛ́ nè dinten se ghɛn. Ghɛn yɛ foo bɛ́ɛ̀lè se Feyine naa se ŋaŋ.

⁸Ghɛn yɛ toknen fɛ wel lobte ghɛn è koo nɛ̀ ɛytof əbnəə əbyume. Əbnəə nɛ̂ vine yɛkte nɛ lu ɛ ndee ɛylak, nɛ əb lòò nɛ lu se əbyioy wɛ əb bɛɛn ɛ mbi fɛn, nɛ wiy se Christ.

⁹Ngeŋ Feyin lɛ ɛyjim nè chinten è se lu ɛ məm nə Christ əbliy wɛ əb nè chiin ɛ ketuu ntiɛ ka wele-mesoŋ.

¹⁰Se lu ɛ leenen nɛ ghɛn shi kekwɛnten ka ghɛn shiin kefaa kemok ghɛne ghe Christ wɛ luun ketuu se əbfua əbjim wɛ əb saken gese ki əbtaawe.

¹¹Ghɛne ghe Christ nè loo lu se kefaa kemok, Feyine nɛyte ghɛn. Əb nè báà nɛyte ɛ jii yɛ ɛ́ lóó ɛ́ yɛ nɛyte ghon ɛ ten. Ke nè gan ka Christ nè buusen kediak əbnəə wɛ əbghune yusen ge ghɛn yɛ nɛɛy.

¹²Nè lu əbliy wɛ ghɛn nè fiin moo ke se dine ge ɛ́ lu nɛ ɛ́ gvəəme ghɛn kɛn ka ɛ́ nè gvəəmen Christ, ɛ́ kase lose ghɛn kɛn ka ɛ́ nè losen Christ. Ɛ́ nè lose ghɛn bek ɛytem yɛ ghɛn foon se kediak nə Feyine wɛ əb nè losen Christ se ɛykuo.

¹³Nè lu se mbiy nɛ ghɛn lu ka ghel ɛkuone bek ka ghɛn nè luun ghele mbee nɛ ɛ́ bɛɛy ghàà fəyse nseemese əbnəə əbbee se ghɛn ɛyghun. Se lu ɛ leenen nɛ Feyine nɛɛymen ghɛn se chii ka ghel ə Christ. Feyine nè lɛyse mbee ə sɛsen naa sejim.

¹⁴Əb nè lô buuse njio sɛ ghɛsen nè boŋen bek nchil yɛ ghɛsen nè kolen. Əb nè buuse bek ɛybante yɛ ɛ́ nè banten Jesus Christ ɛ kentam.

¹⁵Lu ɛ jii nɛ̂ ghan yɛ Feyine nè buusen kediak əbyioy wɛ əb saken gese ki kediak. Əb nè taa è chia ghene nɛ̀ ɛykuo yɛ Christ nè kuon ɛ kentam è choksen ghene ɛ dɛɛne.

¹⁶Ke me se lu ge ghàà ghɛn beeme ge wel yɛ sake ghɛn kum kefaa kɛ ghɛne yiɛn kene kenəəne, ge yi ka ghɛne yiɛn wiy əbchii əbghakene, kene wɛ əbchio njoŋe gese lɛme wiy əbchii ɛybam.

¹⁷Əbnəə nɛ̂ vin əbjim lu əbchəyte əbnəə wɛ əb bɛɛyen se náà se gwiy, dî nɛ loote kenəə kɛ́ tene lu Christ.

¹⁸Ghàà ghɛn beeme ge wel yɛ kiye ghɛn lolo ge yí ka fekɛɛy ə fii ngaŋten, bek kuumese sɛ se koon yi, me taa taan ge ghele liɛ ngeŋse ghen ɛ ntiɛ, è yɛ kokse nchiyse-ndaa nə Feyine. Ɛyghaŋse əbghun nɛ̂ yi lu bek ɛykwaate ɛyyume yɛ əb kiin ka wele-mesoŋ.

¹⁹Əb lu nɛ əb sosenmen se Christ əbghun wɛ luun ketuu se kenchintene ghel ɛbeemene kɛ luun əbghun ə wen. Lu Christ wɛ əb toknen nɛ̀ əbghun nɛ̂ vine ge əb yɛ kiile əbfua-əbyíɛ́ne; yuŋte əblik əbghun nɛ̂ ghan ka əb yɛ lu kefaa kemok, nɛ Feyine me nɛɛye nɛ əb kuye.

²⁰Ke dine ge ghɛn lu nɛ ɛ́ kuo ghɛne ghe Christ, è boy se ɛghoo nə əbyioy wɛ əb saken mbi yin. Ke ghan lɛ́ɛ́y nɛ ghɛn yɛ chii dì ka ghele ghɛ́ mbi fɛne? Lu bek ghɛ wɛ ghɛne lɛmen tesake lólò tɛ ge:

²¹Ghàà ghal kefaa kin, ghàà mom kii dii, ghàà kum kine.

²²Tesak nɛ̂ tin tejim lu kum əbfua wɛ ɛ́ fɛ́len so ɛ leghɛ nɛ əb befkee, nɛ ɛ́ me maaylee. Tesak nɛ̂ tine lu kɛn tekwaate ə ghel ka ɛ́ siyen è se kwanten ghel so, gese dinte se ghele.

²³Tesak nɛ̂ tine yɛnsen di-a ka ɛytofe lu ɛ ten nɛ lu bek jii ɛykokse yɛ ghene nəken əbghun ge ɛ́ kokse Feyin ɛ ten nɛ̀ ɛyngvəmlee, nɛ̀ ɛynyafle yɛ ghene nyablen nɛ̀ əbghune, dî nɛ kenəə wiy ɛ ten kɛ lòó ke giamten wel é əb ghal ngeŋ ə wen è yɛ chii ɛychii yɛ́ titiye.