Read Oku Kol 3 Bible Online

Kol 3 - Oku bible

Kol 3

¹Nè lu ka Feyine nè losen Christ se ɛykuo, əb lose sɛy ghɛn. Ghɛn me fo yi tetem ə tɛn nɛ lu əbnəə wɛ əb luun ɛ ɛyyio bene fɛ Christ koken ketiɛ əbkoy əbtaa nə Feyine.

²Ghɛn lɛm ɛykwaate ə yɛn ɛ əbnəə wɛ əb luun ɛ ɛyyio, nɛ wiy əbnəə wɛ əb luun ɛ ntiɛ.

³Ghɛn dì nè kuomen, nkante ɛychii nə ghɛn se lu ɛ Christe keghoo nɛ Feyine bo bɛɛy se din.

⁴Ka əbteŋ ɛychii nə ghɛsene luun Christ, ɛ́ yî loo lu əbliy wɛ əb kasemen din əbghun, é ghɛsen yɛnsen sɛy ɛ məm əbghaake nə wen.

⁵Ghɛn ben yi jim se əbnəə wɛ́ ntiɛ fɛne ka kenjaŋ, nɛ̀ nchiine jione, nɛ̀ shii se yɛ momle kemomle, nɛ̀ nseemese se yɛ nɛɛye əbnəə əbbee gese nɛ̀ ke mbàŋ ɛshiɛ, ke lu kɛn ka feyin fɛ bomte, è yɛ kokse.

⁶Lu bek əbnəə əbbee nɛ̂ vine wɛ Feyine yî mak ngɛk se ghel ghɛ ɛ́ nɛɛyen əbnəə nɛ̂ vin, yionen wiy se wen.

⁷Nè lu se mbiy nɛ ghɛn nɛɛye əbnəə əbbee nɛ̂ vin ɛ əbliy wɛ tetem ə tɛne nè bo bɛɛyen ɛ ten.

⁸Se lu kɛ́ leenene nɛ ghɛn lu se maay əbnəə vin naa əbjim: Ɛyyafse ɛytem, nɛ̀ doofi, nɛ̀ kenghɛke, nɛ̀ koghoŋ, è buuse əblam əbbee se ghɛn ɛychio.

⁹Ghàà wel se ghɛn yɛ yia əbbuam se wel əblee bek ka ghɛn nè maaymen jii seməə nɛ̀ əbnəə ten əbbee wɛ ghɛn nè nɛɛyen.

¹⁰Ghɛn liɛmen jii sefɛɛ. Lu ɛ jiise nɛ̂ fɛn sɛ Feyine kuysen ghɛn nɛ ghɛn lu ɛ kenfeksen nə wen wɛ əb bomen ghɛn ɛfɛɛ ka ghɛne yɛ loote ke əbnəə wɛ kum wen.

¹¹Lu ɛ ten nɛ ndun ndun bɛɛy wiy se wele ketum, nɛ̀ wele Juus, se wel wɛ ɛ́ nɛyten, nɛ̀ wɛ ɛ́ báà nɛyte, se kengwiye kene wel əbkwak, wiy se kekose, nɛ̀ wel wɛ wiyen kekos. Kenəə kejime dì lu kɛn Christ wɛ əb luun ɛ məm nə wel əbjim.

¹²Ka ghɛn luun ghel ghɛ Feyine nè koŋenmen è chok ge ghii, ghɛn me yɛ ki ɛykoosen ɛysen, ki əmngiɛl, ki ɛyngvəmle, loole ge wɛ̀ɛ̀, gese kule ɛytem.

¹³Ghàà wel se ghɛn yɛ yaŋse yafse ɛytem se wel əblee. Yɛ́ lu ge wel jas se wel, əb lɛyse kejase kɛ́ tene. Kɛn ka Báàba nè lɛysen jas ə wɛn, lu kɛn ka ghɛn luun se yɛ lɛyse jas ə ghel ɛlee.

¹⁴Ghɛn ghal ɛykoŋ, è lɛm é ɛy yɛ ndu ɛ mbiy ɛ əbnəə nɛ̂ ghan əbjim. Lu ɛykoŋ yɛ ɛy chinten əbnəə əbjim ka əb yɛ loote jɛl ɛ titiy.

¹⁵Əmnyiaŋ wɛ əb lòòn se Christ kô yɛ tiyse ɛykwaate ə yɛn bek ka Feyine nè choken ghɛn è nɛɛy ge ghɛn yɛ lu kefaa kemok ka ghɛne yɛ chii ɛyzəəte. Ghɛn yɛ foo bɛ́ɛ̀lè se wen.

¹⁶Ghɛn kô loote ghal giɛse Christ, nɛ̀ əbghaake tene é se loote lii è yɛ lu ɛ ghɛne tetem, é wel yɛ dinte se əblee gese tefe wen nɛ̀ ɛytof ɛyjime. Ghɛn yɛ yofe nyof, make əbluŋ gese yeme njàŋse, foo ɛykokse se Feyine nɛ̀ tetem ə tɛne.

¹⁷Naa ghɛ kɛ ghɛne nɛɛyen nɛ̀ naa ghɛ kɛ ghɛne suuyen, ghɛn yɛ nɛɛye kejim kɛn ka ghel ə Báàba Jesus. Ghɛne loo nɛɛy dì, ghɛn yɛ foo bɛ́ɛ̀lè se Bay Feyin ɛ əbtaawe nə Christ.

¹⁸Əbkiye, ghɛn yɛ ngvəmle ɛlum ə ghɛn bek ge ghɛy kenəə kɛ ghɛn luun se yɛ nɛɛy ka ghele Báàba.

¹⁹Ɛluumene, ghɛn yɛ koŋ əbkiy ə ghɛn è jia yɛ chɛfke se ghene.

²⁰Ghone, ghɛn yɛ yionen se ɛbaa ə ghɛne ghene ɛnoo ə ghɛne əbnəə əbjim bek ge ghɛne nɛɛy dì é Feyine yɛ saŋle.

²¹Ɛbaa ghone, ghàà ghɛn yɛ nyable nɛ̀ ghon ə ghɛne fɛ ghene yɛ kwɛsen.

²²Əbkose, ghɛn yɛ yionen se ghel ghɛ ghɛne fɛ́len se ghene ɛ ketuu ntiɛ fɛn ɛ əbnəə əbjim, nɛɛye wiy kenəə kɛn ge yi ka ba ə ɛyfɛl kè luun fô, nɛɛye wiy kenəə bek kɛn ka ghene yɛ yio əbjuŋ se ghɛn. Ghɛn yɛ fɛl nɛ̀ ɛytem ɛyjime, fane nɛ lu Feyin.

²³Wele loo fɛle naa ghɛ əb yɛ fɛl nɛ̀ ɛyteme ka əb fɛle nɛ lu se Báàba nɛ wiy se wel.

²⁴Ghɛn yɛ kuume ge Báàba yî fo əbmakte se ghɛn wɛ əb nè nɛyten è lɛm se ghel ə wene. Ghɛn dì fɛle nɛ lu se Christ.

²⁵Naa ndɛ wɛ əb nɛɛyen ngɛk yɛ ke ge Feyin yî seese ngɛke ten se wen. Feyine dì lóó sake ghel ghàà əb yɛ din əmndun-ndun.