Read Oku Kol 4 Bible Online

Kol 4 - Oku bible

Kol 4

¹Ghɛn ghɛ ɛ́ kiin əbkos, ghɛn yɛ ghal əbkos ə wɛn ɛ jii ɛyjuŋ, nɛɛye kejuŋ se ghene, kuume ge ghɛn ki sɛ́y Ba ɛyfɛl ɛ ɛyyio wɛ ghɛne fɛ́len se wen.

²Ghɛn yɛ jem kɛn jemen, bole wiy, foo bɛ́ɛ̀lè se Feyine.

³Ghɛn yɛ jem sɛy se ghɛs ge Feyine kô din jii se ghɛs yɛ ghɛse fekte chəm yɛ kum Christ yɛ mɛ luun ɛ nchak bek ɛyghen,

⁴ka mɛ lóóte fekte ɛ jii yɛ mɛ luun se fekte ɛ ten.

⁵Ghɛne loo lu ghɛne ghel ghɛ ɛ́ bɛɛy ghàà tese beeme, ghɛn yɛ fiɛle nɛɛy njuŋ se ghene, vəse wiy nɛ keleŋ əbliy kelee chia se lólò.

⁶Kenfiɛle kɛne lu se yɛ zəəle kɛn zəəlen əbliy əbjim, leme ka fengwaŋ, é ghɛn me yɛ ki jii yɛ fise naa ndɛ wɛ əb bifen ɛybif.

⁷Wan-nyii wɛ Taychikus wɛ ghɛse koŋen naa se ŋaŋ nɛ̂y fo sakghɛ se ghɛn kum mɛ. Əb lu nɛ əb fó ɛytem, ghɛse ghene se fɛle se Báàba Jesus.

⁸Mɛ tume wen se ghɛn kɛn ge əb gwiy è fekte əbnəə wɛ əb ganen se ghɛs ka ɛytem ə yɛne yɛ lu ɛ nzəəte.

⁹Əb gwiye ghene Onesimus, wán-nyii nɛ ghɛs koŋe se ŋaŋ, nɛ əb loote fo ɛytem se Jesus Christ, nɛ lu wel əblee ɛ ghɛne kenon. Ghene nɛ̂y nɛɛy é ghɛn keele əbnəə əbjim wɛ əb liɛn kelik fɛn.

¹⁰Alistalkus wɛ ghɛse wen luun ɛ nchake chakte ghɛn, nɛ Mak wɛ wan jɛmte Ba ə Balnabas chakte ghɛn. Lu Mak nɛ̂ vin wɛ mɛ nè suuyen ge əb gwiy ghɛn loote fiisen wen.

¹¹Jesus vi wɛ ɛ́ toŋten ge Justus chakte sɛ̂y ghɛn. Lu kɛn ghel nɛ̂ ghin ɛtal ghɛ luun ghele Juus ghɛ ɛ́ luun ɛ məme ghel ghɛ ghɛse ghene fɛ́len kum ɛysak ə Feyin. Ghene lu nɛ ɛ́ giamten mɛ naa kejuŋ.

¹²Ebaflas wɛ luun wele ngoo nə ghɛn, gese fɛle se Christe chakte ghɛn. Əb loo jem naa ɛ leghɛ əb yɛ kuume ghɛn naa kejuŋ, lone ge Feyine ko nɛɛy é ghɛn teem ketaan è loote lun ɛ ghɛn ɛybeeme ɛ jii yɛ Feyine kɛŋen.

¹³Mɛ suuy kenəə kɛ́ əbluuy se ghɛn ge əb fɛle naa ketaan kum ghɛn nɛ̀ se ghele ghɛ Laodisea gese nɛ̀ se ghele ghɛ́ Hielabolise.

¹⁴Luk wɛ wel əbchuken wɛ ghɛse koŋen naa se ŋaŋ ghene Demase chakte ghɛn.

¹⁵Ghɛn chiase ɛychakte ə yɛ́s se ghone-nyii ghɛ ɛ́ luun ɛ Laodisea, gese nɛ̀ se Nimfa, gese nɛ̀ kenchintene ghel ɛbeemene kɛ ke konen ɛ wen ə ndaa.

¹⁶Ghɛne jaŋ ŋwaale yin ɛ leghɛ, ghɛn yɛn ge ɛ́ lu nɛ ɛ́ jaŋ sɛy ɛ kenchintene ghel ɛbeemene kɛ́ Laodisea, é ghɛn jaŋ sɛy yɛ ghele ghɛ́ Laodisea chiase se ghɛn.

¹⁷Ghɛn suuy se Alkibbus ge: Alkibbus, yɛn ge wɛ̀ lu nɛ wɛ̀ mɛyse ɛyfɛl yɛ Báàba nè foon se wɛ̀.

¹⁸Mɛ wɛ Bool nyake ɛychakte yin se ghɛn nɛ̀ keghoo ə kome. Ghàà ghɛn yɛ lɛysen ge mɛ lu ɛ nchak. Feyine kô cham ɛysen ə yɛn.