Read Oku 1Te 1 Bible Online

1Te 1 - Oku bible

1Te 1

¹Ŋwaale yin lòò se mɛ Bool nɛ̀ Silas nɛ̀ Timoti, ɛy nduu se kenchintene ghel ɛbeemene kɛ́ Tessalonika kɛ luun ghel ə Bay Feyin ghene Báàba Jesus Christ. Feyine kô cham ɛysen ə yɛn è fo ɛytem ɛyzəətene se ghɛn.

²Ghɛse bɛ́ɛ̀lè Feyin əbliy əbjim bek ghɛn ghel ɛjim, jeme se ghɛn əbliy əbjim,

³kuume ɛyshiɛ nə Bay Feyin nə ghɛsen, ɛyfɛl yɛ ghɛne fɛ́len bek ka ghɛn foon ɛytem se Báàba Jesus, nɛ̀ əbnəə wɛ ghɛne nɛɛyen bek ɛykoŋ yɛ ghɛn kiin se wen, kuume ka ghɛn tiyen ketaan bek ka ghɛne foon ɛytem se ɛygwiy nə Báàba ə wɛsen Jesus Christ.

⁴Ghone-nyii, ghɛs ke ge Feyine koŋe ghɛn, nɛ əb chokmen ghɛn ge ghel ə ghi,

⁵bek ge nè lu əbliy wɛ ghɛs nè gwiyen nɛ̀ sakghɛ əbjuŋ se ghɛn, ghɛs dì nè báà fekte kɛn se guose əbchio. Ghɛs nè fekte nɛ̀ əbtaawe, fekte ɛ kediak nə Keyioy Kelanene, ke se əbluuy ge sakghɛ nɛ̂ vin lu əbluuy. Ghɛn ke jii yɛ ghɛs nè chiin ɛ ten ɛ ghɛne məm. Ghɛs nè chii kɛn ɛ jii yɛ lòó ghɛs giamten ghɛn.

⁶Ghɛn me se chii ka ghɛs, gese chii ka Báàba, nɛ chèmè lu ka ghɛn nè yɛnen ngɛk lɛɛy, ghɛn nè lô kò fiisen sakghɛ nɛ̂ vin nɛ̀ ɛysaŋle yɛ ɛy lòòn se Keyioy Kelanene.

⁷Ghɛn me se lú əbfek se ghel ɛbeemene ɛjim ghɛ́ Masedonia nɛ̀ ghɛ́ Akaia.

⁸Ghele yiomen sakghɛ əbjuŋ bek ghɛn nɛ wiy kɛn ɛ Masedonia nɛ̀ se Akaia. Ɛ́ keelemen əblik əbjim jii yɛ ghɛn foon ɛytem se Feyine ɛ ten. Me se lu nɛ kenəə bo bɛɛy wiy kɛ ghɛse yɛ suuy,

⁹bek ge ghene se ghene ngeŋse fiɛle jii yɛ ghɛs nè gwiyen ghɛn fiisen ghɛs ɛ ten, fiɛle ka ghɛn nè fiilen se ɛybame əmnyin se yɛ kokse Feyin əbluuy Fɛ Fe chiin,

¹⁰nɛ ka ghɛne chiyten wán ə wen wɛ əb luun se gwiy ɛ ɛyyio, vi wɛ əb nè losen se ɛykuo, Jesus wɛ əb boysen ghɛsen se ngɛk yɛ Feyine nɛ̂y mak.