Read Oku 1Te 2 Bible Online

1Te 2 - Oku bible

1Te 2

¹Ghone-nyii, ghɛn se ghɛne ngeŋse ke ge ɛyghan yɛ ghɛs nè shiken se ghɛn nè báà lɛy se lólò.

²Ghɛn ko ke ka ghɛs nè yɛnen ngɛk, ɛ́ nəkse ghɛs ɛ Filibi. Ghɛs nɛy me gwiy è yɛn ghɛn ɛ Tessalonika. Feyin ə Fɛsene giamten, ghɛs kul ɛytem, è fekte sakghɛ əbjuŋ se ghɛn wɛ əb nè lòòn se wen, chèmè lu ka ghele nè koŋen wiy ge ghɛs fekte.

³Ghɛs dì lóò lon ge ghɛn ko beeme sakghɛ əbjuŋ ghàà yɛ lu nɛ ghɛs jase jasen, ki wiy tekwaate tebee, gese lofte wiy ghɛn loften.

⁴Ghɛse lóó ɛ́ yɛ suŋnen ɛ jii yɛ Feyine kɛŋen ge ghɛs yɛ suŋnen bek ge əb lu nɛ əb chok ghɛs, è vii sakghɛ əbjuŋ ɛ ghɛse keghoo. Shii ə wɛs báà se lu se nɛɛy ge yɛ saŋle wele-mesoŋ, əb lu se nɛɛy ge yɛ saŋle Feyin wɛ əb kaaken əbnəə wɛ ghɛse kwaaten.

⁵Ghɛn loote ke ge ghɛs nè báà yi yɛ lofte ghɛn nɛ̀ giɛse kenyeme, lele wiy tək ge ɛ́ səəke əbfua ə wɛn, nɛ Feyine ke kii nɛ̂ kine,

⁶è gese jia se kɛŋe ge wel bente ghɛs, kene bente ghɛn kene naa ndɛ, dî nɛ ka ghɛs luun ghele ntum nə Christ, nè lòó ghɛs lon əbfua se ghɛn;

⁷se lu nɛ nè lu əbliy wɛ ghɛs nè luun ghɛsen, ghɛs babte ghɛn ka no-wan ɛ əbliy wɛ əb toknen nɛ̀ ghon ə wene.

⁸Lu bek kii nɛ̂ kine kɛ ghɛs nè luun kebaaten se fekte sakghɛ əbjuŋ se ghɛn wɛ əb lòòn se Feyine, nɛ̀ se gese se foo ngeŋ ə sɛs se ghɛn. Ghɛs nè koŋe ghɛn naa ɛ jii ɛylee ndun.

⁹Ghɛn ke se əbluuye ghone-nyii, ka ghɛs nè fɛ́len, yɛne ngɛk. Ghɛs nè fɛle nɛ̀ nchuy, fɛle nɛ̀ ntəke ka ghɛse jia yɛ lu kediile se ghɛn ɛ əbliy wɛ ghɛs nè fekten sakghɛ əbjuŋ se ghɛn wɛ əb lòòn se Feyine.

¹⁰Ghɛn ke əbnəə vin se əbluuy nɛ Feyine gese ke ge nchiine ə yɛ́s se ghɛn ghɛ ghel ɛbeemene nè lu ɛyjuŋ, lu ɛ titiy, gese ki wiy fentik.

¹¹Ghɛn ke ge ghɛs nè ghale ghɛn kɛn ɛ jii yɛ bàá sɛɛ ghale ghon ə wen ɛ ten,

¹²Ghɛs nè lumse tetem ə tɛn, gese zəəse tetem ə tɛn, lone ge ghɛn yɛ chii ɛ jii yɛ Feyine kɛŋen, lu wen wɛ əb nè choken ghɛn ge ghɛn yɛ ki kelik ɛ yi məme ɛysak, nɛ̀ se yi əbghaake.

¹³Kenəə kelee kɛ ghɛse bɛɛlen Feyin se ten əbliy əbjim lu ge, nè lu əbliy wɛ ghɛs nè gwiyen nɛ̀ kenəə ə Feyine se ghɛn, ghɛn yio è beeme ge loote lu kenəə ə Feyin nɛ wiy kɛ́ wele. Ke me se fɛle ɛ ghɛn ghɛ ghel ɛbeemene ɛ məm.

¹⁴Ghone-nyii əbnəə wɛ əb ganen se ghɛn lu sɛy əbnəə wɛ əb nè ganen se əbnchintene ghel ə Feyin ɛ Judea; ghel ə Christ. Ghel ɛylak nə ghɛne nè lô se nəkse ghɛn, ghɛɛ-ghɛɛ ka ghele Juus nè nəksen ghene.

¹⁵Ghele Juus ghɛ ɛ́ nè yuyen Báàba Jesus, ka ɛ́ ko nè yuyten ghele ntum nə Feyine, se nəkse ghɛs ɛ leenen. Ghene nɛɛye nɛ Feyine yafse ɛytem, gese lu ghele əbbaanese nə ghel ɛjime,

¹⁶ɛ jii yɛ ghene momen ketaan se yɛn ge ghàà ghɛs fekte kenəə ə Feyin se ghel əbtume fɛ ghene kiile ɛyboy. Lu ɛ jii nɛ̂ ghan yɛ mbee ə ghen se dion nduun kɛn ɛ mbiy, Feyine me yafse ɛytem è mak ngɛk se ghene ketuu.

¹⁷Ghone-nyii, nè lu ka ɛ́ nè giabsen ghɛsen se feleeŋese əbliy, (dî nɛ ɛ́ giabsen kɛn se kechak əbghun, nɛ wiy se keyioy), bek shii wɛ ghɛs nè kiin se yɛne ghɛn, ghɛs me se mome naa ketaan ge ɛ́ gwiy.

¹⁸Ghɛs nè kɛŋe ge ɛ́ kase gwiy è ghan ghɛn. Mɛ se mɛ ngeŋ mom naa ketaan ɛ kaŋ ɛ kaŋ, Satan jia fo nsan se ghɛs,

¹⁹nɛ lu bek ghɛn wɛ ghɛse chiin, ki ɛykwaate, saŋlee, gese lu se náà se yɛ ndial ka ghel ghɛ ɛ́ yiɛnmen ɛ ɛyshiɛ nə Báàba ə wɛsen Jesus ɛ əbliy wɛ əb kase gwiyen.

²⁰Ke lu se əbluuy nɛ nɛɛy ghɛn ge ghɛs yɛ ndial gese saŋlee.