Read Oku 1Te 3 Bible Online

1Te 3 - Oku bible

1Te 3

¹Nɛy se lu nɛ ke ghakmen ghɛs se yɛ lu nɛ ɛ́ báà yɛn ghɛn, ghɛs me liɛ ge ghɛse gok kɛse Atens,

²è me tum wán-nyii Timoti se ghɛn. Əb fɛle se Feyine, fekte sakghɛ əbjuŋ wɛ kum Christ. Ghɛs nè tum wen ge əb ndu è giamten ghɛn è nɛɛy é ɛybeeme yɛne yɛ taa,

³fɛ wel se ghɛn maay ɛybeeme ə wen bek ɛynəkse yɛ ɛ́ nəksen ghɛn. Ghɛn se ghɛne ngeŋse ke ge əbnəə nɛ̂ vine lu se yɛ gan se ghɛsen.

⁴Nè lu əbliy wɛ ghɛs nè luun ghɛsen, ghɛs se suuye ge ɛ́ náà nəkse ghɛsen, se lu nɛ ke kwɛnmen, nɛ ghɛn ke dî.

⁵Ghɛy kenəə kɛ ke nɛɛyen mɛ tum Timoti bek ka nɛ lòó mɛ jia bo keele se wensen. Mɛ nè tum wen ge əb gwiy è yɛn ge ghɛn kò bo foo ɛytem se Feyine-a. Mɛ nè fane ge sɛ lòó yɛ lu nɛ Satane momsemen ghɛn, ɛyfɛl ə yɛ́se lɛy se lólò-a!

⁶Se lu ɛ leenen nɛ Timoti kasemen fiile nɛ̀ sakghɛ nɛ əb jofe ge kum ɛytem yɛ ghɛn foon se Feyine, gese nɛ̀ ɛykoŋ yɛ ghɛn kiin. Əb lu nɛ əb suuy se ghɛs ge ghɛne kuume ghɛs əbliy əbjim, gese ki shii se yɛne ghɛs kɛn ɛ jii yɛ ghɛs kiin shii se yɛne ghɛn ɛ ten.

⁷Ke me se lu ɛ ghone-nyii, nɛ ghɛs saŋlee bek ɛytem yɛ ghɛn foon se Feyine chèmè lu ka ghɛse yɛ́nen ngɛk yio ɛylum.

⁸Se lu ɛ leenen nɛ ghɛse yɛ chii nɛ̀ ɛysaŋlee bek ka ghɛs keen ge ghɛn tiy ketaan ghɛne ghe Báàba.

⁹Kɛ́ leenene lu nɛ lòó ghɛs yɛ bɛ̀ɛ̀lè Feyin naa se ŋaŋ bek ghɛn. Ghɛse bɛ́ɛ̀lè wen bek ka ghɛn nɛɛyen ghɛs se saŋle ɛ wen ɛyshiɛ.

¹⁰Ghɛse jeme se Feyine nɛ̀ ɛyteme əbliy əbjim, ge əb nɛɛy é ghɛs yɛn ghɛn nɛ̀ ɛykeke, è yɛ lu se dinte əbnəə se ghɛn wɛ ghɛn bo shiin ɛ ghɛn ɛybeeme.

¹¹Ba ə wɛsen wɛ Feyin ə Fɛsen se wene ngeŋ ghene Báàba ə wɛsen Jesus kô nɛɛy é ghɛs kiile nsan yɛ gwiy è yɛn ghɛn.

¹²Ghɛse lone ge Báàba kô nɛɛy é ghɛn yɛ loote koŋnen, gese koŋe ghel ɛlee nduu kɛn ɛ mbiy kɛn ka ghɛse koŋen ghɛn.

¹³Əb kô nɛɛy é tetem ə tɛne yɛ taa, è nɛɛy é ghɛn náà yɛ lu ghàà njio gese laane ɛyshiɛ nə Bay Feyin nə ghɛsen ɛ əbliy wɛ wen wɛ Báàba Jesuse yî gwiy ɛ ten ghene ghel ə wene.