Read Oku 1Te 4 Bible Online

1Te 4 - Oku bible

1Te 4

¹Ke me se lu ɛ ghone-nyii, nɛ ghɛs beŋte ghɛn, lone əbtaawe ɛyghel nə Báàba Jesus ge ghɛn yɛ chii ɛ jii yɛ Feyine yɛ saŋle kɛn ka ghɛs nè dintenmen se ghɛn. Lu ka ghɛne chiin, nɛ ghɛn yɛ chii dì nduu kɛn ɛ mbiy.

²Ghɛn ko ke ntef sɛ ghɛs nè foon se ghɛn ɛ əbtaawe nə Báàba Jesus.

³Feyine kɛŋe ge ghɛn yɛ lu ghel ɛlanene, ge ghɛn maay ɛychii kenjaŋ.

⁴Wel se wene ketuu yɛ ke ka lòó əb ghal ngeŋ ə wen ɛ jii ɛylanen, gese nɛ̀ ɛyvəme,

⁵è jia yɛ lum əbghun se yɛ jaŋe kenjaŋ ka ghel ghɛ ɛ́ keen wiy Feyin.

⁶Ghàà wel jas ɛ kenəə nɛ̂ ghan se wan-nyii, bek ka Báàba náà nəkse ghel ghɛ ɛ́ nɛɛyen ɛynkii əbnəə nɛ̂ ghan kɛn ka ghɛs nè chiisenmen se ghɛn.

⁷Feyine dì nè báà chok ghɛsen ge ɛ́ yɛ chii ɛychii jione, əb nè chok ge ɛ́ yɛ chii ɛychii ɛylanene.

⁸Ke me se lu ge naa ndɛ wɛ əb tunsen ɛyyíɛ́ke yin, əb báà tunse nɛ lu wel, əb tunse nɛ lu Feyin Fɛ Fe foon Keyioy Kelanene se ghɛn.

⁹Se lu kum ɛykoŋ yɛ wel yɛ ki se wan-nyii nɛ shii báà se lu wɛ ghɛs kô yɛ nyak nyaken se ghɛn, bek ka Feyine dintenmen se ghɛn ge ghɛn lu se yɛ koŋe ngeŋ ə sɛn.

¹⁰Kɛ́ əbluuye, ghɛn nè se koŋe ghone-nyii naa ɛjim ghɛ ɛ́ luun ɛ ɛylake Masedonia, ghɛse me se lone ghɛne ghone-nyii ge ghɛn yɛ koŋ dì nduu kɛn ɛ mbiy.

¹¹Ghɛn yɛ mom ketaan se yɛ chii ɛychii yɛ nyiaŋ, vii wiy əbchio se ghele əbnəə, me fɛle nɛ̀ ɛghoo ə ghɛne se yɛ giamtene ngeŋ ə sɛn kɛn ka ghɛs nè suuyenmen se ghɛn.

¹²Ghɛne chii ɛ jii nɛ̂ ghan é ghel ghɛ báà se lu ghel ɛbeemene yɛ vəme ghɛn, é ghɛn jia yɛ kiy ge wel fó fóón kefaa se ghɛn kɛ ghɛne shiin.

¹³Ghone-nyii, ghɛse kɛŋe ge ghɛn keele əbluuy kum ghel ghɛ ɛ́ nè kuonmen, fɛ ghɛn baa yɛ diy ka ghel ghɛ ɛ́ chiin ki wiy ɛykwaate kum ɛyloole se ɛykuo.

¹⁴Ka ghɛsen kiin ɛybeeme ge Jesus nè lô kuo, è kase loole se ɛykuo, lu ghɛɛ-ghɛɛ ka əb náà lóó gwiy, é Feyine kase gwiy nɛ̀ ghel ghɛ ɛ́ nè kuon nɛ ɛ́ fó ɛytem se Jesus.

¹⁵Kenəə kɛ ghɛse suuyen se ghɛn ɛ leenen lu kɛ ke lòòn se Báàba ge: Ɛ́ náà yɛ lu ɛ kechii kɛ Báàba gwiyen ɛ ten é ghɛsen ghɛ ɛ́ bo kumen ɛ ɛyyio jia ndu ɛ mbiy nə ghel ghɛ ɛ́ nè kuonmen.

¹⁶Ɛ́ náà lóó lu ɛ kechii nɛ̂ fo, é Báàba se wene ngeŋ yɛ səəke gwiy ɛ ɛyyio wame ɛ giɛ ɛytaa, nɛ nchiy-ndaa-Feyin ɛyngaŋten jaŋe suuy kenəə, nɛ ɛyshoŋ ə Feyine suŋnene, é ghel ghɛ ɛ́ nè kuon nɛ ɛ́ fó ɛytem se Christ me loole se mbiy,

¹⁷é ghɛsen ghɛ ɛ́ kumen ɛ ɛyyio, nɛ ɛ́ bo goke ɛybam, me baksen ghene ɛ mbàkse, é ghɛsen nɛ̀ ghene me baksen Báàba ɛyyio vəəy; é ghɛsen nɛ̀ ghe Báàba me yɛ lu əbliy əbjim.

¹⁸Ghɛn me yɛ zəəse tetem ə tɛn nɛ̀ giɛ nɛ̂ shine.