Read Oku 1Te 5 Bible Online

1Te 5 - Oku bible

1Te 5

¹Ghone-nyii, shii báà se lu se yɛ nyak se ghɛn chio kechii kene əbliy wɛ Báàba nɛ̂y kase gwiy ɛ ten.

²Ghɛn se ghɛne ngeŋse loote ke ge kechii kɛ Báàba nɛ̂y gwiy ɛ ten nɛ̂y yɛ lu ka əbchoŋ ɛ lefɛ əb sasen è gwiy nɛ̀ ntəke.

³Ɛ́ náà lóó lu əbliy wɛ ghele suuyen ge əmnyiaŋe lu, nɛ ngɛkse wiy, é ngɛkse sasen è gwiy se ghene ka se əbvii wɛ əb luun nɛ̀ əblɛɛ è me sasen è se lume. Ke nɛ̂y lóó lu dì é wel jia yɛ lu se boy.

⁴Se lu se ghɛne ghone-nyii, nɛ ghɛn chii wiy ɛ nfiine, nɛ kechii nɛ̂ kine jia nɛ̂y tum è fəy se ghɛn ka əbchoŋ,

⁵bek ge ghɛn ghel ɛjime lu ghel ɛyban, nɛɛy əbnəə ə wɛn nɛ̀ nchuy. Ghɛsen báà se lu ghele ntək, nɛɛye wiy əbnəə ɛ nfiine.

⁶Ke me se lu ge ghàà ghɛsen yɛ buune ka ghel ɛlee, ghɛsen ghal ngeŋ ə sɛsen è gese yɛ lu kebaaten.

⁷Lu nɛ̀ ntəke wɛ ghele buunen, nɛ̀ gese lu nɛ̀ ntəke wɛ ɛ́ nəən əmnduk nɛ əm koo.

⁸Se lu nɛ ka ghɛsen luun ghele nchuy, ghɛsen ghal ngeŋ ə sɛsen nɛ ɛ́ fó ɛytem se Feyine, è se koŋe ghel ɛlee, é vii nɛ̂ vine me tɛɛke ghɛsen ka kekas kɛ wel ɛyghoŋe sɛɛ tɛɛke kenkaŋele ə wen so. Ghɛsen fó ɛytem è yɛ chiyte ka Feyine boyse ghɛsen, é kii nɛ̂ kine tɛɛke ɛychii ə yɛ́sen ka kefole kekas kɛ wel ɛyghoŋe sɛɛ sooy.

⁹Feyine nè báà chok ghɛsen è lɛm ge yi mak ngɛk se ghɛsen bek ɛyyafse ɛytem nə wen. Əb dì nè chok ghɛsen ka ghɛsene kiile ɛyboy chia əbghun nə Báàba ə wɛsen Jesus Christ,

¹⁰wɛ əb nè kuon bek ghɛsen, ka ghɛsen nɛ̀ ghene náà me yɛ lu əbliy wɛ əb kasen gwiy, kene ghɛsen yɛ́ lu nɛ ɛ́ kuomen, kene ɛ́ bo kume ɛyyio.

¹¹Ghɛn me yɛ lumse tetem ə tɛn gese giamten ngeŋ ə sɛn, kɛn ka ghɛn se nɛɛyen.

¹²Ghone-nyii, ghɛse lone ge ghɛn yɛ ngvəmle ghel ghɛ ɛ́ fɛ́len ɛ ghɛne məm ka ghele mbiy tefe ghɛn, gese dinte ka ghɛne yɛ chii ka ghel ɛbeemene.

¹³Ghɛn yɛ loote ngvəmle ghene gese koŋe ghene bek ɛyfɛl yɛ ghene fɛ́len. Ghɛn yɛ ki əmnyiaŋ ɛ ghɛne məm.

¹⁴Ghɛse lone ghɛne ghone-nyii, ge ghɛn yɛ tefe ghel ghɛ ɛ́ luun se lólò, lumse teteme ghel ghɛ ɛ́ fanen ɛyfan. Ghɛn yɛ giamtene ghel ghɛ ɛ́ boolen, gese kul ɛytem se wel əbjim.

¹⁵Ghɛn toknen fɛ wel seese mbee nɛ̀ mbee. Ghɛn yɛ mom se yɛ nɛɛye njuŋ se ngeŋ ə sɛne, gese nɛ̀ se wel əbjim.

¹⁶Ghɛn yɛ saŋle əbliy əbjim,

¹⁷jeme əbliy əbjim,

¹⁸bɛ́ɛ̀lè Feyin se kenəə kejim kɛ ke ganen, bek ge ghɛy kenəə kɛ Feyine kɛŋen ge ghɛn yɛ nɛɛy ka ghel ghɛ ɛ́ shiin kefaa kemok ghene ghe Christ Jesus.

¹⁹Ghàà ghɛn yɛ chil ɛyfɛle Keyioy Kelanene.

²⁰Ghàà ghɛn yɛ kiye kenəə kɛ ghele ntum nə Feyine teefen lòlò.

²¹Dî nɛ ghɛn yɛ kaake əbnəə əbjim, me lɛme əbjuŋe.

²²Ghɛn yɛ bààme ɛynkii əbnəə əbbee əbjim.

²³Ghɛse me se lone ge Feyin wɛ əb fóon əmnyiaŋ se ghɛsen ko nɛɛy é ghɛn yɛ lu kelanen jii sejim; lone ge keyioy ə kɛne nɛ̀ ɛychii ə yɛne, gese nɛ̀ kechak əbghune, yɛ lu ghàà jas ɛ əbliy wɛ Báàba ə wɛsen Jesus Christ nɛ̂y kase gwiy.

²⁴Feyin wɛ əb choken ghɛne sɛɛ lɛm ɛykak ə wen, nɛ əb nɛ̂y nɛɛy əbnəə nɛ̂ vin se ghɛn.

²⁵Ghone-nyii, ghɛn yɛ jem sɛy se ghɛs.

²⁶Ghɛn chakte ghone-nyii lɛ ɛjim, è bamnen ka ghel ɛbeemene.

²⁷Mɛ suuy se ghɛn ɛ əbtaawe nə Báàba ge ghɛn ko jaŋ ŋwaale yin se ghel ɛbeemene ɛjim.

²⁸Báàba ə wɛsen Jesus Christ kô cham ɛysene yɛn.