Read Oku 2Te 1 Bible Online

2Te 1 - Oku bible

2Te 1

¹Ŋwaale yin lòò se Bool, Silas nɛ̀ Timoti, ɛy nduu se ghɛne kenchintene ghel ɛbeemene kɛ́ Tessalonika ghɛ luun ghel ə Feyin wɛ Ba ə wɛsen ghene Báàba Jesus Christ.

²Bay Feyin ghene Báàba Jesus Christ kô cham ɛysen ə yɛn, è fo ɛytem ɛyzəətene se ghɛn.

³Ghone-nyii, ghɛs lu se yɛ bɛ́ɛ̀lè Feyin əbliy əbjim bek ghɛn. Ke lu ɛ titiy ge ghɛs yɛ bɛ́ɛ̀lè dì bek ka ɛybeeme ə yɛne loote kuyen, nɛ ɛykoŋ yɛ ghɛn kiin se ngeŋ ə sɛne kuye nduu ɛ mbiy.

⁴Me se lu bek kii nɛ̂ kine kɛ ghɛse ndialen kum ghɛn se əbnone ghel ɛbeemene nə Feyine. Ghɛse ndiale kum jii yɛ ghɛne kulen ɛytem, gese foo ɛytem se Feyine nduu kɛn ɛ mbiy ɛ məme nəkse wɛ ɛ́ foon se ghɛn gese nɛ̀ ɛ məme ngɛk sɛ ghɛne yɛ́nen.

⁵Ghene nɛɛy dì nɛ ke dine ge Feyine sake ghel kɛn ɛ titiy, nɛ ghɛne nɛ̂y me yɛ lu ghel ɛlee ɛ məme ɛysak nə Feyine yɛ ghɛne yɛ́nen ngɛk bek ɛyghene.

⁶Feyine saay njio nɛ əb nɛ̂y mak ngɛk se ghel ghɛ ɛ́ foon ngɛk se ghɛn,

⁷è fo nzəəte se ghɛn ghɛ ɛ́ yɛ́nen ngɛk, è fo sɛy se ghɛs, ɛ əbliy wɛ Báàba Jesus yɛnsen ɛ ɛyyio ghene nchiyse-ndaa nə wene sɛ se kiin əbtaawe əbchio əbyúméné.

⁸Əb nɛ̂y yɛ gwiy ɛ məme keleeme əbvəs, gwiye se nəkse ghel ghɛ ɛ́ tunsen Feyin, ghel ghɛ ɛ́ báà se yionen kenəə sakghɛ əbjuŋ wɛ kum Báàba ə wɛsen Jesus.

⁹Ghene yî lii ɛ ngɛk yɛ ɛy jia yî mɛy, è jia yî yɛn Báàba əbliy wɛ əb saken əbfon ə wen nɛ̀ əbtaawe əbchio əbyúméné.

¹⁰Əb náà gwiy ɛ kechii nɛ̂ fo é ghel ə wen ɛlanene yɛ foo ɛykokse se wen, nɛ ghel ɛjim ghɛ ɛ́ foon ɛytem se wen lu nɛ̀ ɛykane. Ghɛne náà yɛ lu ɛ ghene məm bek ka ghɛn nè foon ɛytem se sakghɛ wɛ ghɛs nè fekten se ghɛn.

¹¹Ghɛse loo kuume kenəə kɛ ke yî kooy ɛ kechii nɛ̂ fo, ghɛs me yɛ jem se ghɛn əbliy əbjim, lone ge Feyine kô nɛɛy é ghɛn yɛ chii ɛychii yɛ əb nè jaŋen ghɛn se ten, gese lone ge əb fó kediak se ghɛn, é ghɛn mɛyse nɛɛy əbnəə əbjuŋe əbjim wɛ ghɛne kɛŋen, è mɛyse ɛyfɛl yɛ ghɛn foon ɛytem se Feyine è se nɛɛye,

¹²ka ghɛne yɛ foo ɛykokse se Báàba Jesus, nɛ Feyine nɛɛye nɛ ghɛn kiile ɛyvəm kɛn ka Feyin ə Fɛsen ghene Báàba Jesus Christ chamen ɛysene yɛn.