Read Oku 2Te 2 Bible Online

2Te 2 - Oku bible

2Te 2

¹Ghone-nyii, ghɛse kɛŋe se suŋnen se ghɛn kum ɛygwiye Báàba Jesus Christ gese nɛ̀ ɛychinten yɛ ghɛsen nɛ̀ ghene náà chinten è yɛ lu. Ghɛse me se lone ghɛn ge,

²ghɛn toknen fɛ ghele bvəŋse ɛytof ə yɛn é ghɛn jiŋ jiŋen ɛ kenəə kɛ ɛ́ suuyen ge kechii kɛ Báàba Jesus Christ gwiyen ɛ ten kwɛnmen. Wel chèmè lòò è yɛ teefe ntum ge ɛy lòò se Feyine, kene əb fekte nɛ̀ giɛ əbchio, kene əb dine nɛ lu ŋwaale ge ɛy lòò se ghɛs, ghàà ghɛn beeme.

³Ghàà ghɛn beeme nɛ wel lɛɛse ghɛn naa ɛ jii ɛykɛ, bek ge kechii tene jia yî gwiy buu ge ghel se ɛydio loole è yɛ tunse Feyin. Wel ɛytem ɛybee yɛnsen nɛ lu vi wɛ Feyine nɛ̂y mɛyse əbvəs.

⁴Əb nɛ̂y tunse kefaa kejim kɛ ɛ́ toŋten ge feyin, gese nɛ̀ naa ghɛ kɛ ɛ́ koksen koksen, è lose ngeŋ ə wen è me diom ɛ ndaa-ɛykokse nə Feyine, è yɛ suuy ge lu yi Feyin.

⁵Mɛ nè lô se suuy əbnəə vin se ghɛn ɛ əbliy wɛ ghɛsen nè luun, moo ghɛn bo kuume wiy-a?

⁶Kefaa lu kɛ ke ghalen wel ɛytem ɛybee nɛ̂ vin fɛ əb gwiy ɛ leenen, nɛ ghɛn ke dî. Əbliy wɛ Feyine lɛmene nɛ̂y kwɛn, é əb yɛnsen.

⁷Əbnəə əbbee nɛ̂ vi ko kɛɛtemen se gvəm, dî nɛ ke jia nɛ̂y yɛnsen ɛ ndan buu ge ɛ́ chakse vi wɛ əb keŋten se jii.

⁸Nɛ̂y yɛ lu əbliy fo é wel ɛytem ɛybee vi me yɛnsen. Báàba Jesus nɛ̂y yuy wen nɛ̀ əbfiɛf wɛ əb fəyen ɛ wen əbchio, gese nɛ̀ ɛyliak ɛyban yɛ əb gwiyen so.

⁹Wel ɛytem ɛybee vi nɛ̂y gwiy nɛ̀ əbtaawe Satane, è yɛ lɛɛse ghel ge yi nɛɛy əbnəə əbchio əbyúméné əbjim, ge yi dine əbchəyte, gese feke mbɛm,

¹⁰è yɛ nɛɛy əbnəə əblɛɛ əbbee ɛ jii sejim se lɛɛse ghel ghɛ ɛ́ lɛ́yen so. Ghene nɛ̂y lɛy bek ge ghene nè báà se koŋe se beeme kenəə kɛ́ əbluuye se boy.

¹¹Lu bek kii nɛ̂ kine kɛ Feyine nɛ̂y bvəŋse ɛytof ə ghen, é ghene yɛ beeme nɛ lu əbnəə wɛ ɛ́ yian yian,

¹²é nsake Feyin me koo ghel ɛjim ghɛ ɛ́ báà beeme əbluuy è se saŋle se yɛ nɛɛy nɛ lu mbee.

¹³Ghone-nyii, ghɛs lu se yɛ bɛ́ɛ̀lè Feyin bek ghɛn əbliy əbjim, ghɛn ghɛ Báàba koŋen, bek ka Feyine nè choken ghɛn se kenkɛɛte se boyse ghɛn əbtaawe nə Keyioy Kelanene, se nɛɛy ge ghɛn yɛ lu ghel ə Feyin ɛlanene bek ɛytem yɛ ghɛn foon se kenəə kɛ́ əbluuye.

¹⁴Feyine nè jaŋ ghɛn chia ɛ sakghɛ əbjuŋ wɛ ghɛs nè fekten se ghɛn, ka ghɛne kiile əbghaake vi wɛ Báàba ə wɛsen Jesus Christ kiin.

¹⁵Ke me se lu ghone-nyii, ge ghɛn teem ketaan, è ghal əbnəə wɛ ghɛs nè dinten se ghɛn, kene lu wɛ ghɛs nè fekte fekten, kene lu wɛ ɛ́ nè nyaken nyaken.

¹⁶Báàba ə wɛsen Jesus Christ se wene ngeŋ ghene Feyin wɛ Ba ə wɛsen wɛ əb nè koŋen ghɛsen, è cham ɛysen ə yɛ́sen, è nɛɛy ghɛsen se ki ɛytem ɛyzəətene əbliy əbjim, chii ki ɛykwaate,

¹⁷kô nɛɛy é ghɛn yɛ ki ɛytem ɛyzəətene nɛ̀ kediak kɛ yɛ nɛɛy əbnəə əbjuŋe əbjim gese suŋnen kesuŋnen kejuŋe.