Read Oku 2Te 3 Bible Online

2Te 3 - Oku bible

2Te 3

¹Se yɛ mɛyse ghone-nyii, ghɛn yɛ jem se ghɛs, jeme ge sakghɛ ə Báàba kô yɛ saanken nduu kɛn ɛ mbiy, nɛ ghele fiisene nɛ̀ ɛyvəme kɛn ka ghɛn nè fiisen.

²Ghɛn yɛ jem sɛy ge Feyine fii ghɛs se ɛghoo nə ghel ghɛ ɛ́ kiin tetem tebee, momle əbnəə əbbee, bek ge báà se lu wel əbjim wɛ əb foon ɛytem se sakghɛ nɛ̂ ghan.

³Dî nɛ Báàba sɛɛ lɛm ɛykak ə wen, nɛ əb nɛ̂y nɛɛy é ghɛn yɛ tiy ketaan, è gese boyse ghɛn se ɛghoo nə Satan.

⁴Báàba nɛɛymen ghɛse jia se maanen maanen ge ghɛne chii ka ghɛs nè dinen se ghɛn, nɛ ghɛne nɛ̂y yɛ chii dì nduu kɛn ɛ mbiy.

⁵Ghɛse lone ge Báàba tiyse tetem ə tɛn é ghɛn keele jii yɛ Feyine koŋen ɛ ten è nɛɛy é ghɛn yɛ kul ɛytem kɛn ka Christ nè kulen.

⁶Ghone-nyii, ghɛse fó ɛysak se ghɛn ɛ əbtaawe nə Báàba ə wɛsen Jesus Christ ge: Ghɛn yɛ bààme ghone-nyii ghɛ ɛ́ kwenen, ghel ghɛ ɛ́ báà se nɛɛy əbnəə wɛ ghɛs nè dinten se ghɛn.

⁷Ghɛn se ghɛne ngeŋse ke ge ghɛn lu se yɛ chii ka ghɛs nè chiin. Ghɛs nè báà se kwene əbliy wɛ ghɛsen nè luun.

⁸Ghɛs nè báà yiɛ kefaa ə wel se lólò. Ghɛs nè fɛle ketaan nɛ̀ nchuy, fɛle nɛ̀ ntəke ka ghɛse jia yɛ foo ngɛk se wel se ghɛn.

⁹Ghɛs kò nè lô se ki əbtaawe se suuy ge ghɛn yɛ yiɛse ghɛs, dî è se fɛle ka ghɛne yɛn è yɛ lu se beknen.

¹⁰Ghɛn ke ge nè lu əbliy wɛ ghɛsen nè luun, ghɛs suuy se ghɛn ge: Wel tɛn se yɛ fɛl ghàà ghɛn fo kefaa ge əb yiɛ.

¹¹Ghɛse yio ge ghel ɛlee lu ɛ ghɛne məm ghɛ ɛ́ kwenen, fɛle wiy, ki shii nɛ lu əbnəə nə ghel ɛchine.

¹²Ghɛse me se kunte gese lone se ghele ten ɛ ɛyghel nə Báàba Jesus Christ ge ghene yɛ fɛle yɛ́ ghene yɛ ɛyfɛl ge nyiaŋ se yɛ kiile kefaa kɛ yiɛ.

¹³Ghone-nyii, ghàà ghɛn yî bol se yɛ nɛɛye njuŋ.

¹⁴Wel loo lu è jia yio ntef sɛ ghɛs nyaken ɛ ŋwaale fɛn, ghɛn chəysen wen, è yɛ báàmè wen ka kenghuumene koo wen.

¹⁵Dî nɛ ghàà ghɛn me liɛ wen ge wel əbbaanese nə ghɛn, ghɛn lu se tefe wen ka wán-nyii.

¹⁶Báàba se wene ngeŋ, wɛ əb fóon əmnyiaŋ kô fo ɛytem ɛyzəətene se ghɛn jii sejim, əbliy əbjim. Báàba kô yɛ lu ɛ ghɛne məm ghel ɛjim.

¹⁷Mɛ wɛ Bool nyake ɛychakte yin nɛ̀ keghoo ə kome lɛ: Lu ka mɛ sɛɛ chəysene ŋwaale ə som, nɛ lu jii yɛ mɛ sɛɛ nyak ɛ ten.

¹⁸Báàba Jesus Christ kô cham ɛysen ə yɛn ghel ɛjim.