Read Oku 1Ti 2 Bible Online

1Ti 2 - Oku bible

1Ti 2

¹Ketuu kenəə kɛ mɛ kɛŋen ge ghɛn yɛ nɛɛy lu ge ghɛn yɛ jem se Feyine, lone se wen, beŋte ge əb giamten ghel, gese bɛɛle wen se əbnəə wɛ əb nɛɛyen se ghel ɛjime.

²Ghɛn yɛ jem se tefone ghene ghel ghɛ ɛ́ saken, ka ghɛsene yɛ chii əmnyiaŋ, lu ge wɛ̀ɛ̀, foo ɛyvəm se Feyine gese ngvəmle ghel ɛjim.

³Se yɛ jem se ghene dì lu kenəə kejuŋe se yɛ nɛɛy, kenəə nɛ Feyin wɛ mboyse ə yɛ́sen saŋle se ten.

⁴Əb kɛŋe ge wel əbjim boy, è keele əbluuy.

⁵Ke lu dî bek ka Feyine luun kɛn Femok, nɛ lu kɛn wel əbmok wɛ əb tiyen ɛ nsan nə Feyine ghene wele-mesoŋ, nɛ wel nɛ̂ vin lu Christ Jesus.

⁶Əb nè fo ngeŋ ə wen se tene wele-mesoŋ. Kii nɛ̂ kine kɛ əb nè nɛɛyen ka əbliye nè kwɛnen nè lu se loote se din ge Feyine kɛŋe ge wel əbjim kiile ɛyboy.

⁷Me se lu bek kii nɛ̂ kine kɛ Feyine nè choken mɛ se wele ntum ge mɛ ndu è yɛ fekte gese dinte sakghɛ əbluuy wɛ kum ɛybeeme se ghel əbtume. Mɛ suuy əbluuy, yia wiy nɛ lu əbbuam.

⁸Mɛ kɛŋe ge ghɛn yɛ loo konen naa ghááy, ɛluumene yɛ jem, ɛluumen ghɛ ɛ́ kiin ɛychii ɛylanene yɛ jem, nɛ wel yafse wiy ɛytem gese yole wiy ɛyyol.

⁹Mɛ gese kɛŋe ge əbkiye yɛ laf ɛ jii ɛyjuŋ ka ghel ɛtofene nɛ wiy ge ɛ́ yɛ yese vii əbtuu gese báà ɛ jii kensaa əbghun, kene vii əmnchak mɛ ɛ́ tion nɛ̀ ɛytiane, kene dzəəse əbfua se kendoŋ, kene make ndəyse əbkaa əbtaa.

¹⁰Ghene lu se yɛ nɛɛy nɛ lu əbnəə əbjuŋe wɛ əb dinen ge ghene lu ghel ə Feyin.

¹¹Əbkiye lu se yɛ yióté kɛn ɛ chichi kenəə kɛ ɛ́ dinten se ghene, yiote nɛ̀ ɛyngvəmle jii sejim.

¹²Mɛ báà beeme ge əbkiye yɛ dinte əbnəə se ɛluumene kene sake ghene. Ghene lu se yɛ lu kɛn ɛ chichi.

¹³Ke lu se yɛ lu dî bek ge Feyine nè kɛɛte bom Adam se geese bome Ev.

¹⁴Satan nè báà lɛɛse nɛ lu Adam, əb nè lɛɛse əbvii əb kol ɛysak ə Feyin.

¹⁵Ka kɛ́ əbvii luun se yɛ bii ghon lu nɛ əb yî boy ɛ lefɛ əb foon ɛytem ketaan se Feyine è se dine ɛykoŋ se ghele, chii ɛychii ɛylanene gese loole ge wɛ̀ɛ̀.