Read Oku 1Ti 3 Bible Online

1Ti 3 - Oku bible

1Ti 3

¹Kenəə kɛ ɛ́ suuyen ge: Naa ndɛ wɛ əb kɛŋen se yɛ lu wele mbiy se kenchintene ghel ɛbeemene lu nɛ əb semte nɛ lu ɛyfɛl ɛyjuŋe, lu se əbluuy.

²Wele mbiy lu se yɛ lu wel wɛ əb báà se ki kenəə kɛ wel gham wen se ten, ki kɛn əbvii əbmok, loole ge wɛ̀ɛ̀, ghale ngeŋ ə wen, ki ɛyngvəmle, fiisen ghel ɛyghan gese ke se dinte əbnəə se ghele.

³Wele mbiye báà se lu se lɛme ketuu ɛynəə əmnduk, wiy se yɛ shiŋ nɛ̀ əbnəə shiŋen, dî lu ge wɛ̀ɛ̀, kume wiy əbchio, gese lɛme wiy ketuu wen ɛ əbkaa.

⁴Əb lu se yɛ lu wel wɛ əb ghalen ɛyshaa ndaa nə wen kejuŋ, nɛɛye nɛ ghon ə wene yionen se wen gese ngvəmle naa kejuŋ.

⁵Wel lɛ lu nɛ lòó əb jia ghal ɛyshaa ndaa nə wen kejuŋ, é əb ghan lɛɛy se yɛ toknen nɛ̀ kenchintene ghel ə Feyine?

⁶Əb wiy se yɛ lu wel əbfɛɛ ɛ kenəə ə Feyin, fɛ əb sooy ɛyghaŋse əbghun se ketuu é Feyine fo ngɛk se wen ka əb nè foon se Satan.

⁷Əb lu se yɛ lu wel nɛ ghel ghɛ ɛ́ chèmè wiyen ghel ɛbeemene ngvəmle wen, fɛ əb báà kiile kenchoksen è liɛ se ketam kɛ Satan maken.

⁸Ngiamtene sɛ kenchintene ghel ɛbeemene lu sɛy se yɛ ki ndee ɛyjuŋ, suuy əbluuy, lɛme wiy ketuu ɛynəə əmnduk gese lɛme wiy ketuu wen ɛ əbkaa.

⁹Ghene lu se ghal nɛ̀ ɛytem ɛylanene kii dii kɛ Feyine nè dinen se ghɛsen kum ɛybeeme.

¹⁰Ɛ́ lu se chia mbiy se mome ghene, ghene fəy kejuŋ, ɛ́ me lɛm ghene se ngiamtense ə kenchintene ghel ɛbeemene.

¹¹Əbkiy ə ngiamtense lu sɛy se yɛ ki nchiine ɛyjuŋ, make wiy koghoŋ. Ghene lu se yɛ loolè ge wɛ̀ɛ̀, suuy əbluuy ɛ əbnəə əbjim wɛ ghene nɛɛyen.

¹²Ngiamtene yɛ̂ kenchintene ghel ɛbeemene lu se yɛ ki kɛn əbvii əbmok, toknen nɛ̀ ghon ə wene gese nɛ̀ ɛyshaa ndaa nə wene kejuŋ.

¹³Ngiamten sɛ se fɛ́len kejuŋ ɛ kenchintene ghel ɛbeemene lu nɛ ghele ngvəmle ghene, nɛ ghene gese lu kekwɛnten se yɛ suŋnen kum ɛytem yɛ ghene foon se Christ Jesus fane wiy kefaa.

¹⁴Mɛ nyake ŋwaale yin se wɛ̀ lɛ ki ɛykwaate ge mɛ gwiy è yɛn wɛ̀ ɛybame keleŋ əbliy se ɛylaay.

¹⁵Yɛ lu wɛ ge mɛ jia yaŋse gwiy, fene ŋwaale yine din se ghɛn jii yɛ ghɛsen luun se yɛ chii ɛ ten ka ghel ɛykfəə nə Feyine. Ɛykfəə nɛ̂ yine lu kenchintene ghel ɛbeemene kɛ kiin Feyin Fɛ Fe chiin. Kenchinten nɛ̂ kine lu ketok kɛ ke ghalen əbluuy wɛ kum Feyin.

¹⁶Lòó wel jia yɛ maanen kenəə keghakene kɛ Feyine dinenmen se ghɛsen ka ghel ghɛ ɛ́ koksen wen. Christ nè lô gwiy ka wele-mesoŋ, Keyioy Kelanene din ge əb lu wele titiy, nchiyse-ndaa nə Feyine yɛn wen, ɛ́ fekte kenəə ə wen əbtum əbjim, ghele se foo ɛytem se wen əblik əbjim, Feyine liɛ wen è kokse se ɛyyio.