Read Oku 1Ti 4 Bible Online

1Ti 4 - Oku bible

1Ti 4

¹Keyioy Kelanene suuy ɛ dɛɛne ge əbliye gwiye wɛ ghel ɛlee maay ɛybeeme ə ghen, è yɛ yio nɛ lu se əbyioy wɛ əb yian əbbuam, è gese yɛ nduu ɛybame teyiɛke tɛ luun tɛ́ ɛyfime.

²Teyiɛke tɛ tene lòò se ndintese əbbuam sɛ se lɛɛsen ghel, ndintese nɛ̂ shine lu nɛ teteme shi tenyoksen, bo fɛle wiy kejuŋ.

³Ghene suuy ge ke báà se lu ɛ titiy ge wel yɛ ki əbvii, gese suuy ge ghàà ɛ́ yɛ yíɛ́ tenkii əbfua-əbyíɛ́ne əblee. Feyine nè bom əbfua-əbyíɛ́ne ge ghele yɛ yiɛ, nɛ ghel ghɛ ɛ́ ɛbeemene se wen è se ke əbluuy, bɛɛle wen se ten me yiɛ.

⁴Kefaa kejim kɛ Feyine nè bomen lu kejuŋ, nɛ wele báà se lu se tunse kelee, ɛ lefɛ əb bɛɛlen Feyin se ten se geese yiɛ,

⁵bek ge giɛ ə Feyin nɛ̀ ɛyjeme nɛɛy nɛ əbfua-əbyíɛ́ne nɛ̂ vine lu əblanen.

⁶Wɛ̀ lòò è yɛ foo ntef shin se ghel ɛbeemene é wɛ̀ yɛ lu wel ɛyfɛl nə Christ Jesus əbjuŋ, ka wɛ̀ yíɛ́ əbfua-əbyíɛ́ne keyioy wɛ luun giɛ sɛ se nɛɛyen nɛ ghɛsen foo ɛytem se Christ gese nɛ̀ ɛyyíɛ́ke əbluuy yɛ wɛ̀ nè se jumten, é wɛ̀ mɛyse yiɛte ngeŋ ə yiɛ ɛ kenəə ten.

⁷Fiile se ɛybam əmngaan əmyum, mɛ əm báà se ki kenəə se nɛɛy nɛ̀ Feyine, è yiɛke se yɛ chii nɛ lu ɛ jii yɛ Feyine kɛŋen.

⁸Ɛyyíɛ́ke se yaŋse əbghun ə viɛ ge ə́b yɛ lu əbtaa jofe, dî nɛ ɛyyíɛ́ke yɛ ɛy siysen keyioy ə kiɛ jofe chia bek ge ɛy giamten wɛ̀ se ɛychii yɛ́ leenene ko gese giamten se ɛychii yɛ ɛy bo gwiyen.

⁹Kenəə kɛ ɛ́ suuyen nɛ̂ kin lu əbluuy se loote se ghal.

¹⁰Ghɛsen luŋe gese fɛle ketaan se kiile ɛychii nɛ̂ yin bek ka ghɛsen lɛmen ɛykwaate ə yɛ́sen ɛ Feyin Fɛ Fe chiin əbghun. Lu wen wɛ əb boysen ghel ɛjim, ɛ ŋaŋ ɛ ŋaŋ ghel ghɛ ɛ́ foon ɛytem se wen.

¹¹Dinte əbnəə nɛ̂ vin, è kwante é wel əbjim keele.

¹²Yɛɛ ke fɛ wel yɛ kiye wɛ̀ lolo ge yi ka wɛ̀ bo bɛɛy wándɛ. Yɛɛ suŋnen ɛ jii ɛyjuŋ, ki ndee ɛyjuŋ, dine ɛykoŋ se ghele nɛ wɛ̀ gese fo ɛytem se Feyine, è se chii ɛychii ɛylanene ka wɛ̀ yɛ lu əbchəyte se ghel ɛbeemene.

¹³Wɛ̀ lu se yɛ liɛ əbliy jaŋe ŋwaale-Feyin se ghele ɛ keluune, fekte gese dinte əbnəə se chin se ka mɛ nɛ̂y gwiy.

¹⁴Ghàà maay fomɛ vi wɛ Keyioy Kelanene nè foon se wɛ̀ ɛ əbnəə wɛ ghɛ́ ntum nə Feyine nè teefen kum wɛ̀ əbliy wɛ chɛɛ sɛ kenchintene ghel ɛbeemene nè lɛmen ɛghoo ɛ wɛ̀ ketuu.

¹⁵Fó ngeŋ yiɛ, è yɛ nɛɛye ndu nɛ̀ əbnəə nɛ̂ vine ketaan ka ghel ɛjime yɛ yɛn ka ɛyfɛl ə yiɛ kuyen.

¹⁶Yɛɛ tome kevəə ə kiɛ feke, foo ɛyyíɛ́ke toknene bek ka wɛ̀ nɛɛyen dì, é Feyine boyse ghɛne ghel ghɛ ɛ́ yioten kenəə kɛ wɛ̀ dinten.