Read Oku 1Ti 5 Bible Online

1Ti 5 - Oku bible

1Ti 5

¹Wɛ̀ yɛ loo suuy kenəə se ngɛsewel, ghàà wɛ̀ yɛ wamnen wen wamnen, wɛ̀ lu se yɛ suŋnen se wen ɛ giɛ ɛybonen ka lòó wɛ̀ suŋnen se ba ə viɛ. Yɛɛ toknen nɛ̀ ghondɛɛ nsume ka ghone-no ə viɛ.

²Yɛɛ toknen nɛ̀ ngɛyse əbkiy ka ɛnoo ə ghiɛ, toknen nɛ̀ ghondɛɛ ngone ka jɛmte ə shiɛ, ki ɛytem ɛylanene se ghene ɛjim.

³Yɛɛ toknen nɛ̀ əbkiye nkfə ghɛ ɛ́ báà se ki ghel ghɛ ɛ́ yɛ toknen nɛ̀ ghene.

⁴Dî nɛ wiy-nkfə lòò yɛ ki ghon, kene ghon ə ghon, fene ghene lu se chia mbiy se yɛ toknen nɛ̀ wen. Kii nɛ̂ kine lu ɛyfɛl ə Feyin ka ghene nɛɛyen ɛ ghene ɛyshaa-ndaa, me kase seese ɛyfɛl yɛ ɛnoo ə ghene, kene ɛnoo-ɛnoo ghene nè fɛ́len se ghene. Lu əbnəə wɛ ɛ́ loo nɛɛy Feyine yɛ saŋle.

⁵Nkante wiy-nkfə wɛ əb báà se ki wel wɛ əb yɛ toknen nɛ̀ wen yɛkte nɛ lu ɛ Feyin əbghun, jeme nɛ̀ ntəke, jeme nɛ̀ nchuy ge Feyine giamten yi.

⁶Dî nɛ wiy-nkfə wɛ əb foon ngeŋ ə wen se yɛ yiɛ əbghun ə wen lu nɛ əb kuomen se keyioy, chèmè lu ka əb bo chiin.

⁷Dinte əbnəə nɛ̂ vin se ghene fɛ ghene yɛ́ nɛɛy əbnəə wɛ ɛ́ yɛ́ ghame ghene se ten.

⁸Wel lòò è jia yɛ toknen nɛ̀ ghel ka ghine ɛ ghene ɛykfəə, se chemte ge ghel ɛyshaa-ndaa nə wen, fene əb maaymen ɛybeeme ə wen, è bef è chia wel wɛ əb nè bɛɛy ghàà yɛ ke Feyin.

⁹Ghàà gise wiy-nkfə se kenone əbkiye nkfə nɛ əb bɛɛy ghàà chin ngukse əmtuufe, nɛ ko lu se yɛ lu əbvii nɛ wel nè bɛɛy ghàà tese lɛm.

¹⁰Əb lu se yɛ lu əbvii nɛ ghele bensen wen se wen ɛyfɛl ɛyjuŋe, ka əb nè kuysen ghone wen ɛ jii ɛyjuŋ, fiisen ghel ɛ wen ə ndaa, giamten ghel ɛbeemene ɛlee, giamten ghel ghɛ ɛ́ kiin ngɛkse, nɛ əb gese fo ngeŋ ə wen se yɛ nɛɛy əbnəə əbjuŋe jii sejim.

¹¹Ke fɛ wɛ̀ gise əbkiy-nkfə ghɛ ɛ́ bɛɛy ghàà chin ngukse əmtuufe se kenone əbkiy-nkfə fɛ əbtəke nɛ̂y yio, əbghune loo yuse ghene, é ghene loo kɛŋ ɛlum, è me vəse kenəə Christ.

¹²Ke gan dì fene ghene makmen ngɛk se ghene əbtuu bek ge ghene vəsemen ɛykak yɛ ghene nè kɛɛten lɛm se Christ.

¹³Baa mɛy kii nɛ̂ kii, ghene lóó ɛ́ yɛ yese se lólò, jɛle ndaa nɛ̀ ndaa, wiy kɛn se lólò, make koghoŋ, vii əbchio se ghele əbnəə gese suuy əbnəə wɛ kè lòó ghene jia yɛ suuy.

¹⁴Mɛ me se kɛŋe ge əbkiy-nkfə ghɛ ghondɛɛ ngone kase kiile ɛlum, è yɛ bii ghon, toknen nɛ̀ tesaa ndaa nə ghene ka mbanen ə sɛsene jia yɛ ki nsan se yɛ suuy əbnəə əbbee kum ghɛsen.

¹⁵Mɛ suuy lɛ bek ge ghene ɛlee benlemen, è se jumte nɛ lu Satan.

¹⁶Loo lu əbvii əbbeemen yɛ ki əbkiy-nkfə ɛ wen ɛyshaa ndaa, əb yɛ toknen nɛ̀ ghene; ghàà əb kokse kediile ten ɛ ketuu nə kenchintene ghel ɛbeemene. Kenchintene ghel ɛbeemene lu se yɛ toknen nɛ̀ əbkiy-nkfə ghɛ ɛ́ báà se ki ghel ghɛ ɛ́ yɛ toknen nɛ̀ ghene.

¹⁷Ghɛn lu se yɛ loote toknen nɛ̀ chɛɛ sɛ se fɛ́len ɛ kenchintene ghel ɛbeemene kejuŋ, ɛ ŋaŋ ɛ ŋaŋ ghii dii ghɛ ɛ́ fekten kenəə ə Feyin gese dinte əbnəə se ghele.

¹⁸Ke lu dî bek ge ŋwaale-Feyine suuy ge: “Ghàà wel kul əbchio nyam nɛ ɛy jɛɛle ɛsaŋ” gese suuy ge: “Wel əbfɛlen shii əblaake ə wen.”

¹⁹Wele suuy kenəə kebee kum chɛɛ kenchintene ghel ɛbeemene, ghàà wɛ̀ yiote, buu ge əb suuy dì nɛ ghele lu ɛbaa kene ɛtal toke wen.

²⁰Loo lu chɛɛ nɛɛy mbee, wɛ̀ yol wen ɛ dɛɛne ka ghel ɛlee yɛ fan se nɛɛye mbee.

²¹Mɛ tiy ɛ ɛyshiɛ nə Feyine ghene Christ Jesus gese nɛ̀ nchiyse-ndaa nə Feyine se lanene suuy se wɛ̀ ge, wɛ̀ loo ghal ntef shin ghàà wɛ̀ yɛ din əmndun ndun, nɛɛye wiy se wel əblee ndun ge yi ka wɛ̀ koŋen wen.

²²Ghàà yɛ gel gelen nɛ̀ ɛghoo ghɛ lɛm ɛ wele ketuu è jem ge əb shi wel ɛyfɛl nə Feyine. Yɛɛ ke se yɛ tokte mbee sɛ wele nɛɛyen. Yɛɛ chii ɛychii ɛylanene.

²³Ghàà yɛ nəə kɛn nɛ lu moo, yɛɛ loo wɛ̀ ko nəəte əmnduk se ɛylaay se yaŋse əblɛɛ ə viɛ bek ka wɛ̀ moote yafen.

²⁴Ghel ɛlee nɛɛy mbeese nɛ se me yɛnsene kɛn se əbliy dine ge Feyine shi se sake ghene, dî nɛ ɛlee nɛɛye nɛ se yɛnsen nɛ shi se ɛybam.

²⁵Lu kɛn ghɛɛ-ghɛɛ ka ghel ɛlee nɛɛyen əbnəə əbjuŋe nɛ əb me yɛnsen kɛn se əbliy, dî əb kè lòò è jia yɛ yɛnsen, é əb jia yî gok ɛ kenlete.