Read Oku 1Ti 6 Bible Online

1Ti 6 - Oku bible

1Ti 6

¹Ghel ghɛ luun əbkos lu se yɛ ngvəmle ɛbaa ɛyfɛl nə ghen jii sejim ka ghele jia yɛ suŋnen kebee kum ɛyghel ə Feyin, gese nɛ̀ əbnəə wɛ ghɛsen dinten.

²Əbkos wɛ ɛbaa ɛyfɛl nə ghene luun ghel ɛbeemene báà se lu se yɛ kiye ghene lolo ge yi ka ghene ghel ɛjime luun ghel ɛbeemene. Ghene sɛy lu se yɛ fɛl se ghene naa kejuŋ bek ge ghel ghɛ ɛ́ kiilen sɛk ɛyfɛl nə ghen lu ghel ɛbeemene ghɛ ghene koŋen. Yɛɛ dinte gese fekte əbnəə nɛ̂ vin.

³Wel lòò è yɛ dinte əbnəə nɛ əb lu ndun, beeme wiy nkante ɛyyiɛke nə Báàba ə wɛsen Jesus Christ nɛ̂ yin, nɛ̀ ɛyyiɛke yɛ giamten ghel ge ɛ́ yɛ chii ka ghel ə Feyin,

⁴fene əb saa əbghune lólò, ke wiy kenəə. Wel nɛ̂ vine lóó əb yɛ ki shii ɛ mbek kum giɛ sɛ se gwiyen nɛ lu nɛ̀ ngɛkse, kume əbchio əbnəə wɛ ə́b gwiyen nɛ̀ kenghɛke nɛ̀ əbngiabsene, nɛ̀ koghoŋ gese nɛ̀ tekwaate tɛ ge wel əblee báà jof,

⁵gese nɛ̀ əbchio ɛ ghele məm. Əbnəə nɛ̂ vine lóò se ghel ghɛ tekwaate ghene bo nduun wiy ɛ titiy, ghel nɛ ɛ́ bo suuy wiy əbluuy, kwaate kɛn ge kenəə ə Feyine lu jii ɛykɛŋ nə ghen.

⁶Dî nɛ wel fɛle se Feyine, lu kekulen nɛ̀ kɛ ghɛye kɛ əb kiin, fene lu əbghaake se wen.

⁷Ghɛsen di nè báà gwiy nɛ̀ kefaa ɛ mbi fɛn, nɛ lòó ɛ́ jia yî lòò nɛ̀ kefaa.

⁸Nɛ ghɛsen kè lòò è yɛ ki əbfua-əbyíɛ́ne gese nɛ̀ ndəy sɛ yɛ mak, ghɛsen yɛ lu kekulen nɛ̀ kii nɛ̂ kii.

⁹Ghel ghɛ ɛ́ jumen ɛ ɛybame əbghaake lóó ɛ́ me lii se ɛymomse, è liɛ se ketam è me yɛ nɛɛy əbnəə kengoo se ɛydio, ki nseeme sɛ se gwiyen nɛ̀ ngɛkse, se mɛyse ghene mɛysen.

¹⁰Ɛykoŋ əbkaa lu ɛghaŋe əbnəə əbbee əbjim. Ghel ɛlee lu nɛ ɛ́ lɛmen ketuu ɛ kenəə əbkaa se ŋaŋ è me maay ɛybeeme, è mak ngɛkse se ketuu se ɛydio.

¹¹Dî nɛ wɛ̀ ka wele Feyin lu se nyiŋ se ɛybam əbnəə nɛ̂ ghan əbjim se yɛ chii ɛychii yɛ̂ titiye, chii ka Feyine kɛŋen, foo ɛytem se Feyine, ki ɛykoŋ, tiy ketaan gese loole ge wɛ̀ɛ̀.

¹²Yɛɛ noole ketaan ɛ ɛyfɛl ɛyjuŋe nɛ̂ ghan yɛ wɛ̀ foon ɛytem se Feyin se yɛ fɛl. Kô yɛ ghal ɛychii yɛ ɛy jia yî mɛy yɛ Feyine nè jaŋen wɛ̀, wɛ̀ kiile ɛ kechii kɛ wɛ̀ nè beemen nɛ̀ əbchio ə viɛ kejuŋ ɛ ɛyshiɛ nə ghele se ɛydio.

¹³Mɛ me se tiy ɛ ɛyshiɛ nə Feyine wɛ əb foon ɛychii se əbfua əbjime, tiy ɛ ɛyshiɛ nə Christ Jesus wɛ əb nè teem ɛ Bontius Bailɛt ɛyshiɛ è suŋnen kejuŋ nɛ̀ əbchio ə wene kum ngeŋ ə wen, suuy se wɛ̀ Timoti ge:

¹⁴Yɛɛ lɛme ɛysak yin naa kejuŋ jase wiy se chin se kechii kɛ Báàba ə wɛsen Jesus Christ kase gwiyen.

¹⁵Əb yî kase gwiy ɛ əbliy wɛ Feyine nè lɛmen, Feyine ɛykokse, wen wɛ əb saken, lu əbfone tefon, gese lu Bay se ɛbay ɛjim.

¹⁶Lu kɛn wen wɛ əb jia yî kuo, chii ɛ məme ɛyban yɛ lòó wel jia kokte è baksen. Wel nè bɛɛy ghàà yɛn wen, nɛ lòó wel jia yɛn wen. Ghɛsen yɛ kokse gese bune wen wɛ əb kiin əbtaawe əbliy əbjim. Amen.

¹⁷Suuy se ghel ghɛ ɛ́ kiin əbghaake wɛ́ mbi fɛne ge ghàà ghene yɛ ghaŋse əbghun, yɛkte nɛ lu ɛ əbfua nɛ̂ ghan wɛ əb nɛ̂y mɛy. Ghene lu se yɛ yɛkte nɛ lu ɛ Feyine əbghun wɛ əb foon əbfua nchɛk nchɛk ge ghɛsen yɛ yio əbjuŋe ten.

¹⁸Suuy é ghene yɛ nɛɛy əbnəə əbjuŋe, é əbghaake ghene yɛ lu əbnəə əbjuŋe nɛ̂ vin. Ghene lu se yɛ ki keghoo keyii, gese foo əbfua se ghel ghɛ ɛ́ tanen.

¹⁹Lu ɛ jii nɛ̂ ghan yɛ lòó ghene baate əbghaake wɛ əb luun ka ketiɛ ə ndaa kɛ ke nɛ̂y giamten ɛ əbliy wɛ əb bo gwiyen, é ghene me kiile ɛychii yɛ luun nkante ɛychii.

²⁰Timoti, loote ghal kii dii kɛ Feyine viinmen se wɛ̀ keghoo. Lɛk se ɛybame əbnfiɛle lólò wɛ əb báà se foo ɛykokse se Feyine nɛ̀ mbek sɛ se gwiyen nɛ̀ kenjefe, nɛ ɛ́ bee ge lu sɛ ɛytofe.

²¹Ghel ɛlee lu nɛ ɛ́ ndumen ɛ ɛybam əbnəə nɛ̂ ghan è maay ɛybeeme ghen. Feyine kô cham ɛysene yɛn.