Read Oku 2Ti 1 Bible Online

2Ti 1 - Oku bible

2Ti 1

¹Ŋwaale yin lòò se mɛ Bool. Mɛ lu wele ntum nə Christ Jesus, nɛ nè tum Feyin mɛ ɛ wen ɛykoŋ ge mɛ yɛ fekte ntum ɛychii yɛ əb nè kaken ghɛsen so. Ɛychii nɛ̂ yine lu yɛ ghɛsen kiilen ka ghel ghɛ luun ghɛ́ Christ Jesuse.

²Mɛ nyake se wɛ̀ Timoti, wan ə wom wɛ mɛ koŋen naa se ŋaŋ. Feyin Fɛ Bay ghene Christ Jesus wɛ Báàba ə wɛsen kô cham ɛysene yiɛ, è koosen ɛysen se wɛ̀, è nɛɛy é wɛ̀ yɛ chii ki ɛyzəəte.

³Mɛ bɛ́ɛ̀lè Feyin Fɛ mɛ fɛ́len se wen bek wɛ̀ nɛ̀ ɛytem ɛylaanene, kɛn ka ɛbaa ɛbaa ghome nè fɛ́len. Mɛ lóò jem naa ɛ leghɛ mɛ yɛ kuume wɛ̀, bɛ́ɛ̀lè Feyin bek wɛ̀, nɛ̀ nchuy nɛ̀ ntəke.

⁴Mɛ kuume ka wɛ̀ nè səksen əmshiɛ, è me se kɛŋe naa se ŋaŋ se yɛne wɛ̀, ka mɛ yɛ saŋle.

⁵Mɛ kuume ɛytem yɛ wɛ̀ foon se Feyine, nɛ lu sɛy ɛynkii ɛytem yɛ no-no ə viɛ Lois ghene no ə viɛ Yunis nè foon se Feyine. Se lu ɛ leenen nɛ mɛ ke ge lu kɛn ɛyghene yɛ wɛ̀ foon se Feyine.

⁶Mɛ me se tamte se wɛ̀ ge wɛ̀ yɛ lumse fomɛ wɛ Feyine nè foon se wɛ̀ əbliy wɛ mɛ nè lɛmen ɛghoo ə ghom ɛ wɛ̀ ketuu.

⁷Mɛ suuy lɛ bek ge keyioy kɛ Feyine nè buken ghɛsen so dì báà se nɛɛy nɛ ghɛsen fane ɛyfan. Ke nɛɛy nɛ ghɛsen ki kediak, nɛ̀ ɛykoŋe, gese nɛ se yɛ ghale ngeŋ ə sɛsen.

⁸Ke me se lu ge ghàà wɛ̀ yɛ ghuumen se yɛ suŋnen kum Báàba ə wɛsen, kene se yɛ ghuumen kum mɛ wɛ mɛ luun ɛ nchak bek wen. Yɛɛ lu sɛy kebaaten se yɛne ngɛk bek sakghɛ əbjuŋ nɛ̀ kediake kɛ ke lòòn se Feyine,

⁹əb nè boyse ghɛsen se ngɛk è chok ghɛsen ge ghel ɛlanene. Əb nè báà nɛɛy dì bek njuŋ ɛylee yɛ ghɛsen nè nɛɛyen. Əb nè nɛɛy dî bek ɛysiyse wen gese nɛ̀ ɛytem ɛyjuŋe nə wen yɛ əb nè dinen se ghɛsen bek Christ Jesus, naa se əbməən.

¹⁰Kɛ́ leenene lu nɛ Feyine dinmen ɛytem ɛyjuŋe nə wen se ghɛsen bek ɛygwiye Mboyse yɛsen Christ Jesus. Christ nè gwiy è mɛyse əbtaawe ɛykuo, è din se ghɛsen ɛ məme sakghɛ əbjuŋ ge ghɛsen nɛ̂y kiile ɛychii yɛ ɛy jia yî mɛy.

¹¹Lu bek sakghɛ nɛ̂ vin wɛ Feyine nè choken mɛ ge wele ntum gese nɛ̀ ndinte ge mɛ yɛ fekte.

¹²Di ghɛy kenəə kɛ mɛ yɛ́nen ngɛk bek keghene, dî nɛ mɛ báà se ghuumene bek ge mɛ ke wel wɛ mɛ foon ɛytem se wen. Mɛ ke se əbluuy ge əb yɛ́ toknen nɛ̀ mɛ se kok se chin se kechii kenləysen.

¹³Loote ghal kenəə kɛ mɛ nè dinten se wɛ̀ ka əbchəyte, è yɛ dinte nɛ lu əbluuy, nɛ wɛ samse se Feyine gese koŋe ghel ɛlee ka wel wɛ əb shiin kefaa kemok ghene Christ Jesus.

¹⁴Yɛɛ toknen nɛ̀ əbluuy wɛ ɛ́ nè foonmen se wɛ̀ nɛ̀ əbtaawe ə Keyioy Kelanene kɛ ke luun ɛ ghɛsene məm.

¹⁵Wɛ̀ ke ge ghel ɛbeemene ɛjim ghɛ ɛ́ luun ɛ ɛylake Asia nyiŋmen è maay mɛ, naa nɛ̀ Figelus ghene Helmogenes sɛy.

¹⁶Feyine kô cham ɛysene ɛyshaa ndaa nə Onesifolus, bek ge əb nè lumse ɛytem ə yom ɛ kaŋ ɛ kaŋ. Əb nè báà se ghuumene ge mɛ lu ɛ nchak.

¹⁷Nè lu əbliy wɛ əb nè gwiyen ɛ Lûm, əb nè lô kɛŋ mɛ se chin se ka əb nè yɛnen mɛ.

¹⁸Mɛ jeme ge Feyine kô cham ɛysene wen ɛ kechii kenləysen. Wɛ̀ ke ka əb nè giamten mɛ ɛ Ɛfesos.