Read Oku 2Ti 2 Bible Online

2Ti 2 - Oku bible

2Ti 2

¹Wan ə wome Timoti, yɛɛ tiy ketaan bek ɛycham ɛysen yɛ Christ Jesus chamen ghɛsen bek ka ghɛsen nɛ̀ wen luun kefaa kemok.

²Liɛ ɛyyíɛ́ke yɛ wɛ̀ nè yion nɛ mɛ dinte se ghele se ɛydio è vii se keghoo nə ghel ɛjuŋe ɛ́ yɛ dinte se ghel ɛlee sɛy.

³Yɛɛ yɛne sɛy ngɛk ka wel ɛyghoŋ nə Christ Jesus əbjuŋ.

⁴Wel ɛyghoŋe sɛɛ jia lime ngeŋ ə wen ɛ əbnəə wɛ ghele nɛɛyen. Əb lóó əb yɛ nɛɛy ɛyfɛl ə wen ɛ jii yɛ wele mbiy nə wene yɛ saŋle.

⁵Wel sɛɛnen kenyiŋen, é ɛ́ jia nɛ̂y fo əbmakte se wen nɛ əb báà nyiŋ ka ɛysake kɛŋen.

⁶Wel lem ɛylem ə wen ketaan é ɛy lóó fəyse əbfua-əbyíɛ́ne é yiɛ wen wɛ́ mbiye.

⁷Kase kiynen əbnəə wɛ mɛ suuyen nɛ̂ vin bek ka Báàba nɛɛy é wɛ̀ loote keele ge əbnəə tene əbjime sɛ suuy gee ghɛ-a.

⁸Kô yɛ kuume Jesus Christ wɛ əb nè lômen loole se ɛykuo. Əb lu wel ɛykfəə nə David, ka sakghɛ əbjuŋ wɛ mɛ dintene suuyen,

⁹nɛ lu sakghɛ wɛ ɛ́ kulen mɛ nɛ̀ nchakse bek əbghen, dî ka mɛ jas nɛ lu kenəə. Dî nɛ lòó wel jia yî kul giɛse Feyin naa se nkan.

¹⁰Mɛ me se wensene ɛ məme ngɛk sejim bek ghel ghɛ Feyine nè chokenmen ka ghene fo ɛytem se Christ Jesus è kiile ɛyboy, nɛ̀ njuŋ yɛ ɛy jia yî mɛy.

¹¹Ɛ́ suuy kenəə kin ɛ əbluuy ge: Ghɛsen chinten è kuo ghɛsen nɛ̀ wen, é ghɛsen nɛ̀ wen yɛ chii.

¹²Ghɛsen loo è yɛ wensen, é ghɛsen nɛ wen yɛ sak. Ghɛsen maa wen, é əb maa ghɛsen.

¹³Ghɛsen buu se yɛ nɛɛy ka əb kɛŋen, é əb jia buu se lɛm ɛykak ə wen, bek ge lòó əb jia maa ngeŋ ə wen.

¹⁴Tamte kenəə kin se ghel ə ghiɛ, è tefte ghene ɛyshiɛ nə Feyine ketaan ge fɛ́ ghene yɛ beke mbek kum əbnəə nɛ əb ki wiy ɛygiamten, sɛy bese ghel ghɛ ɛ́ yioten besen.

¹⁵Mome ketaan se nɛɛy ge Feyine yɛn ge wɛ̀ lu wel ɛyfɛl əbjuŋ; wel ɛyfɛl wɛ əb báà se ghuumen se yɛ nɛɛy ɛyfɛl ə wen; wel wɛ əb loote dinten sakghɛ əbluuy nə Feyine.

¹⁶Ghàà yɛ vii əbchio ə viɛ se mbeke lólò; mbek yɛ ɛy kiin wiy əbluuy kum Feyin, nɛ ɛy sɛy nɛɛy nɛ ghele nyiŋe nyiŋen Feyin nduu nɛ̀ əbtəme.

¹⁷Ɛynkii ɛyyíɛ́ke nɛ̂ yin lu ka kenchok kɛ ke kfəlen nduun kɛn nɛ̀ njia əbghun kfəlen. Ghel ɛlee ɛbaa ghɛ ɛ́ dinten ɛyyíɛ́ke nɛ̂ yin lu Himenaeus ghene Filetus.

¹⁸Ghene lu nɛ ɛ́ maaymen jii ɛybeeme yɛ̂ əbluuy è sɛy se suuy ge əbliy wɛ ghele nɛ̂y loole se ɛykuo nè chiamen. Ghene nɛɛy dì me bvəŋse ɛybeeme ghel ɛlee bvəŋsen.

¹⁹Dî nɛ lòó kefaa jia shikse ketiɛ-ndaa kɛ Feyine viin, nɛ ɛ́ nyak ɛ ten ge: “Feyine ke ghel ghɛ luun ghɛ́ wene,” è gese nyak ge: “Naa ndɛ wɛ əb suuyen ge yi lu wel ə Báàba lu se nyiŋ se ɛybame mbee.”

²⁰Loo lu ɛ ndaa nə wel əbghaken əbkaŋe lóó əb ghàà yɛ lu kɛn jii ɛymok. Wɛ ɛ́ fɛlen nɛ̀ kekase nɛ̀ wɛ ɛ́ fɛlen nɛ̀ ɛytiane lu, nɛ wɛ ɛ́ chufen ɛ fekak nɛ̀ wɛ ɛ́ bomen nɛ̀ kechake lu. Nɛ əbkaŋ wɛ ɛ́ yiɛn ɛ ten ɛ əbchii əbtaa lu, nɛ əbkaŋ wɛ ɛ́ yiɛn ɛ əbchii wɛ́ nchɛke nchɛke lu.

²¹Suute naa ndɛ ngeŋ ə wen se mbee è yɛ laane, é əb yɛ lu kekaŋ ketaa, é Feyine me liɛ wen è nɛyte è lɛm ka kefaa ɛyfɛl ketaa, é ke yɛ lu kebaaten ka əb yɛ fɛl ɛyfɛl ə wen ɛyjuŋe so.

²²Ke me se lu ge wɛ̀ nyiŋ əbnəə wɛ əbghune yusen wak nɛ əb nɛɛye, è yɛ mom se yɛ chii ɛychii yɛ ɛy luun ɛ titiy, foo ɛytem se Feyine, ki ɛykoŋ gese nɛ̀ əmnyiaŋe. Yɛɛ nɛɛy əbnəə nɛ̂ vin əbjim ghɛne ghel ghɛ ɛ́ jemen se Báàba nɛ̀ ɛytem ɛylanene.

²³Ghàà yɛ yióté mbekse kengoo, mbekse nɛ kechine wiy ɛ ten. Wɛ̀ ke ge sé lóó se gwiy nɛ̀ ɛykum əbchio.

²⁴Wel əbfɛlen nə Feyine báà se lu se yɛ kum əbchio, əb lu se yɛ ki ɛytem ɛyjuŋe se wel əbjim, lu ndinte ɛyjuŋ, gese kule ɛytem,

²⁵tiyse ghel ghɛ ɛ́ kenen ɛyyíɛ́ke ə wen ge wɛ̀ɛ̀, ki ɛykwaate ge lòó Feyine nɛɛy é ghene kubsen è yɛ ke əbluuy.

²⁶Ke loo lu dî é ɛytofe ghene me teem é ghene soole se ketam kɛ Satan maken ghene liɛ se ten è se yionen se wen.