Read Oku 2Ti 3 Bible Online

2Ti 3 - Oku bible

2Ti 3

¹Yɛɛ ke ge ɛ́ náà loo lu əbchii kenləysen é əbnəə yɛ taa.

²Wele yî yɛ diy nɛ lu kɛn ketuu ə wen, koŋe əbkaa, ghaŋse əbghun, kiye wiy ge wel əblee lu kefaa, tɛyle ghel, yionen wiy se ɛbaa ə ghen nɛ̀ ɛnoo ə ghene, foo wiy bɛ́ɛ̀lè se wel, gese fane wiy Feyin.

³Ghene yî yɛ nyame kenyam, koosen wiy ɛysen se ghele, suuy əbnəə əbbee kum ghel, ghale wiy ngeŋse ghen, lonen ka nyamse, koŋe wiy se yɛ yɛne kenəə kejuŋe.

⁴Ɛ́ náà yɛ kal əmnaŋ, fofe, ŋake keŋak, koŋe se yɛ yiɛ əbghun ə ghen, koŋe wiy nɛ lu Feyin.

⁵Ghene yî yɛ nɛɛy əbnəə wɛ əb chioten ge ghene lu ghel ə Feyin, dî nɛɛy wiy kenəə kɛ Feyine kɛŋen ge ghene yɛ nɛɛy. Nyiŋ ɛynkii ghel nɛ̂ ghan.

⁶Ghene ɛlee lóó ɛ́ yɛ jɛle lii ɛ ghele ndaase, bense tekwaate əbkiy ghɛ ɛ́ boolen ka ɛ́ yɛ yio kɛn se ghene; əbkiy nɛ ɛ́ nɛɛymen mbee se ŋaŋ, è se ki nseemese se yɛ jumte ɛynkii əbnəə əbbee əbjim.

⁷Əbkiy nɛ̂ ghine lóó ɛ́ yɛ yióté əbnəə wɛ naa ndɛ dinten, dî nɛ lòó ghene jia keele əbluuy.

⁸Ghene lóó ɛ́ yɛ noo ɛyyíɛ́ke yɛ́ əbluuye kɛn ka Jannes ghene Jambles nè noon yɛ Mosese. Ɛykwaate ə ghene bɛɛy wiy ɛ titiy, nɛ ɛyfɛl ə ghene ka ghel ɛbeemene shi kenəə keyume.

⁹Dî nɛ ghene jia ndu əbtəm nɛ̀ kenɛɛy ə ghene bek ge keyuŋ kɛ ghene nɛɛyen nɛ̂ ki moote è fəy ɛ əmlanen ka kɛ́ Jannes ghene Jamblese.

¹⁰Wɛ̀ nè lô se yiote əbnəə wɛ mɛ dinten se ghele, nɛ̀ ndee ə yom, nɛ̀ kenəə kɛ mɛ chiin bek keghene, nɛ̀ jii yɛ mɛ foon ɛytem ɛ ten se Christ nɛ̀ ka mɛ kulen ɛytem, nɛ̀ jii yɛ mɛ koŋen ghel ɛ ten gese nɛ̀ jii yɛ mɛ wensen ɛ ten.

¹¹Wɛ̀ ke jii yɛ ɛ́ nè nəksen mɛ ɛ ten, ke ngɛk yɛ mɛ nè yɛnen, ke ngɛk sɛ se nè gwiyen san ɛ Antiok, nɛ̀ Ikonium, gese nɛ̀ ɛ Listla. Wɛ̀ ke nəkse sɛ ɛ́ nè yiiken mɛ so, dî Báàba fii mɛ se ngɛkse nɛ̂ ghan sejim.

¹²Əbluuye lu ge naa ndɛ wɛ əb koŋen se yɛ chii ka Feyine kɛŋen, jumte ɛybame Christ Jesus, lu nɛ lòó ɛ́ jia buu ghàà yɛ nəkse wen.

¹³Ghel ɛbee ghene ghel ghɛ ɛ́ dinen ge ghene lu kefaa kɛ ghene wiyen keghene nɛ̂y yɛ befe ndu kɛn nduun, lɛɛse nduu nɛ̀ ghele nɛ ɛ́ lɛɛse sɛy ghene.

¹⁴Dî nɛ se wɛ̀ lu nɛ wɛ̀ lu se yɛ tiy kɛn ketaan ɛ kenəə kɛ wɛ̀ nè yíɛ́ken è loote fo ɛytem se ten. Wɛ̀ ke ndinte ə shiɛ sɛ se nè dinten əbnəə nɛ̂ vin se wɛ̀,

¹⁵gese ke ka wɛ̀ nè yiɛken giɛse Feyin naa se kɛ̀ɛ̀tè se wan əbtɛlɛ. Lu giɛ nɛ̂ shin sɛ se fo ɛytof se wɛ̀, è giamten é wɛ̀ fo ɛytem se Christ Jesus è boy.

¹⁶Kenəə kejim kɛ ɛ́ nyaken ɛ ŋwaale-Feyin lu nɛ ke lòò se Feyine, nɛ shii ten lu se yɛ din nɛ ghele yiɛke əbnəə ten, wamnen ghel so, tiyse ghel so gese dine ka ɛ́ yɛ giamtene ghel nɛ ɛ́ chii ka Feyine kɛŋen,

¹⁷ka wel ɛyfɛl nə Feyine yɛ lu kekwɛnten se yɛ nɛɛye tenkii tefɛl tejuŋe naa tejim.