Read Oku 2Ti 4 Bible Online

2Ti 4 - Oku bible

2Ti 4

¹Timoti, mɛ suuy se wɛ̀ ɛ ɛyshiɛ nə Feyine ghene Christ Jesus wɛ əb nɛ̂y sak ghel ɛjim, kene ghɛ ɛ́ bo kumen ɛ ɛyyio, kene ghɛ ɛ́ nè kuonmen, gese bek ka Christ gwiyen se yɛ sak əbfon ə wen ge:

²Yɛɛ fekte sakghɛ əbjuŋ se ghele əbliy əbjim, kene ghele yɛ yiote, kene ɛ́ jia yɛ yiote, toose əbluuy se ghene, kwanten ghene so. Yɛɛ lumse tetem ə ghen, gese dinte ka ke luun se ghene ge wɛ̀ɛ̀.

³Yɛɛ ke ge əbliye gwiye wɛ ghele jia nɛ̂y yɛ koŋ se yɛ yióté ɛyyíɛ́ke yɛ́ titiye. Ghene nɛ̂y yɛ jumte nɛ lu əbnəə wɛ ghene semten, è me yɛ kuuy ndintese se ɛydio se ɛydio ka ghene yɛ suuy əbnəə wɛ ghene koŋen se yɛ yióté.

⁴Ghene nɛ̂y vəse se yɛ yióté əbluuy è yɛ lɛm əbtuu ə ghen nɛ lu əmngaan əmyum.

⁵Se lu se wɛ̀, nɛ wɛ̀ lu se loote se ghale ngeŋ ə yiɛ jii sejim, è yɛ wensen ɛ əbliye ngɛkse, fekte sakghɛ əbjuŋ, fɛle ɛyfɛl ə yiɛ ɛyjim ka wel ɛyfɛl nə Feyine.

⁶Lu se mɛ nɛ əbliye se kwɛne wɛ ɛ́ yúy mɛ bek kenəə Feyin, əbliy wɛ mɛ vəse ketuu ntiɛ kin.

⁷Mɛ lu nɛ mɛ noo əbnoo ten kejuŋ. Mɛ lu nɛ mɛ mɛyse ɛyfɛl ə yom. Mɛ lu nɛ mɛ loote ghal ɛybeeme ə yom.

⁸Me se lu nɛ Feyine lɛmmen əbmakte ə wom, əbmakte ə wele titiy wɛ Báàba wɛ əb saken ghel ɛ titiy náà fo se mɛ ɛ kechii kɛ əb kase gwiyen ɛ ten. Əb jia náà fo kɛn se mɛ, əb náà fo sɛy se naa ndɛ wɛ əb nè foon ɛytem è se chiyte kechii kɛ əb náà kase gwiy ɛ ten.

⁹Mome ketaan se gwiy se yɛne mɛ chikiy chikiy,

¹⁰bek ka Demas koŋmen əbnəə wɛ́ mbi fɛne è vəse mɛ, è ndu se Tessalonika. Klessens lu nɛ əb ndu ɛ Galashia, Taytuse ndu kɛ́ wene ɛ ntɛke Dalmatia.

¹¹Shi kɛn Luk ghɛse wen fɛn. Wɛ̀ lóò gwiy, wɛ̀ liɛ Mak ka əb giamten mɛ nɛ̀ ɛyfɛle.

¹²Mɛ tumen Taychikus se Ɛfesos.

¹³Wɛ̀ lóò gwiy, wɛ̀ liɛ ndəyse kenton nə mɛ sɛ mɛ nè vəsen se Kalbus ɛ Tloas; liɛ sɛy ŋwaalese è yɛ gwiy so. Yɛɛ ke se vəse sɛ́ guo.

¹⁴Alesanda wɛ ba-kelam nè lô mom kenəə se mɛ nɛ ke bɛme ge; nɛ̂y lak Báàba wen se kenəə kɛ əb nɛɛyen.

¹⁵Yɛɛ toknen kum wen bek ge əb nè lô se tunse ɛ jii ɛybee sakghɛ wɛ ghɛsen fekten.

¹⁶Nè lu əbliye wɛ́ mbiye wɛ mɛ nè teem ɛ ɛytiye nsak se taŋle əbchio ə wom, ghel ɛjime nyiŋ mɛ. Mɛ jeme ge Feyine kô lɛyse se ghene.

¹⁷Dî Báàba ko teem ɛ mɛ ɛybam è fo kediak se mɛ ka mɛ yɛ loote fekte sakghɛ əbjuŋ so se ghel əbtume, è fii mɛ se bvələkse.

¹⁸Báàba nɛ̂y fəyse mɛ se əbnəə əbbee naa əbjim, è boyse mɛ è lise se wen ə kelik əbfon ɛ ɛyyio. Ghɛsen yɛ kokse wen əbliy əbjim! Amen.

¹⁹Chakte Blisilla ghene Akwuila gese nɛ̀ ghel ə Onesifoluse se mɛ.

²⁰Elastus nè lô gok ɛ Kolɛn, mɛ lòò è vəse Tlofimus ɛ Miletus, nɛ əb yafe.

²¹Mome ketaan se gwiy fɛn nɛ ɛyghuu geese guo. Yubulus ghene Budens, nɛ̀ Linus gese nɛ̀ Klaudia, nɛ̀ ghone-nyii ɛlee tinse ɛychakte se ghɛn.

²²Mɛ lone ge Báàba bose wɛ̀, lone ge Feyine cham ɛysen ə yɛn ghel ɛjim.