Read Oku Tay 1 Bible Online

Tay 1 - Oku bible

Tay 1

¹Ŋwaale yin lòò se mɛ Bool. Mɛ lu wel ɛyfɛl nə Feyine gese lu wele ntum nə Jesus Christ, giamten ghel ghɛ Feyine nè choken ka ghene yɛ taa ɛytem yɛ ghene foon se Feyine, è gese keele əbluuy wɛ kum wen, è me yɛ chii ka ghel ə wen.

²Kii nɛ̂ kine nɛɛy ge ghene yɛ chiyte, ke se əbluuy ge ghene náà kiile ɛychii yɛ ɛy jia yî mɛy, yɛ Feyin wɛ lòó əb jia yia əbbuam nè yimen kak ghɛsen so se geese bome mbi.

³Əbliy wɛ əb nè lɛmen kwɛn, əb nɛɛy ɛ́ se fekte sakghɛ əbjuŋ, ghele me keele kum ɛychii nɛ̂ yi. Lu ɛyfɛl nɛ̂ yin yɛ Feyin wɛ mboyse ə yɛsen viin ɛ mɛ keghoo, mɛ me se fɛle ka əb làmen.

⁴Mɛ nyake se wɛ̀ Taytus, wɛ̀ lu wán ə wom se nkan bek ka ghɛsoo kiin ɛybeeme ɛymok. Bay Feyin ghene Christ Jesus wɛ mboyse ə yɛsen kó cham ɛysen ə yiɛ, fo əmnyiaŋ se wɛ̀.

⁵Mɛ nè lòò è vəse wɛ̀ ɛ Klet ge wɛ̀ mɛyse siyse əbnəə wɛ əb nè bɛɛsen fo, è gese chokte chɛɛ sɛ ndaa-Feyin ɛ ntɛk sejim kɛn ka mɛ nè dinen se wɛ̀ ge:

⁶Chɛɛ ndaa-Feyin báà se lu se yɛ ki kenəə kɛ lòó ɛ́ gham wen se ten. Əb lu se yɛ ki kɛn əbvii əbmok, nɛ ghon ə wene lu ghel ɛbeemene, chɛfke wiy, kene yionen wiy.

⁷Wele mbiy ɛ kenchintene ghel ɛbeemene fɛle nɛ lu se Feyine, nɛ əb báà se lu se yɛ ki kenəə kɛ lòó ɛ́ gham wen se ten. Əb báà se lu se yɛ ghaŋse əbghun, yaŋse yafse wiy ɛytem, kene nəə əmnduk nɛ əm koo, shike wiy ɛyshik, gese baŋe wiy ɛshiɛ əbfua.

⁸Əb lu se yɛ fiisene ghel kejuŋ, gese koŋe kii dii kɛ luun kejuŋe. Əb lu se yɛ lu wel ghale ngeŋ ə wen, nɛɛye əbnəə wɛ́ titiye, chii ɛychii ɛylanene, gese tome kevəə yiote.

⁹Əb lu se yɛ lu wel wɛ loote ghal kenəə kɛ́ əbluuye kɛ ɛ́ dinten se wen se me se yɛ lumse tetem ə ghel ɛlee nɛ̀ jii ɛyjuŋ nɛ̂ yin, gese dine jase ghel ghɛ ɛ́ tunsen keghene.

¹⁰Mɛ suuy lɛ bek ge ghele lu se ɛydio ghɛ ɛ́ tunsenmen kenəə kɛ́ titiye, è se suuy nɛ lu əbnəə lólò, lɛɛse ghel, ɛ ŋaŋ ɛ ŋaŋ ghele Juus ghɛ ɛ́ benlen è se jumte Christ.

¹¹Ke lu ɛ shii se chìle ghel ghin bek ge ghene bese tesaa ndaa nɛ̀ əbnəə wɛ ghene dinten nɛ wiy əbnəə wɛ́ titiye, dinte dì ka ɛ́ kiile əbkaa.

¹²Wele ntum əblee ɛ ghene məm nè lô suuy ge: Ghele Klet lu ghel əbbuam, lu ka nyamse əbkwak, kwene gese yiɛ se ŋaŋ.

¹³Kenəə kɛ əb nè suuyen lu əbluuy. Lu bek kii nɛ̂ kine kɛ wɛ̀ luun se yɛ kwantene ghene ka ghene loote fo ɛytem se Feyine,

¹⁴è jia yɛ yɛkte əbghun əmngaanme lólò mɛ máàn ghele Juus gese nɛ̀ tesak tɛ foon ghel ghɛ ɛ́ tunsen əbluuy.

¹⁵Lu se ghel ghɛ ɛ́ luun ɛlanen nɛ əbnəə əbjime lu se ghene əblanen, dî nɛ lu se ghel ghɛ ɛ́ laanen wiy nɛ ɛ́ báà beeme, nɛ əbnəə əbjime befe befen se ghene bek ka ɛytof ə ghene nɛ̀ ɛytem ə ghene tiy nɛ lu əbnəə əbbee.

¹⁶Ghene lóó ɛ́ yɛ bee ge ɛ́ ke Feyin, dî tunse Feyin ɛ ghene nchiine. Nchiine ə ghen nyiile, nɛ ghene yionen wiy, gese wiy kekwɛnten se nɛɛye kenəə kejuŋe.