Read Oku Tay 2 Bible Online

Tay 2 - Oku bible

Tay 2

¹Dî nɛ lu se wɛ̀ Taytus nɛ wɛ̀ lu se yɛ dinte əbnəə se ghele wɛ əb luun ɛ titiy.

²Tef ɛluumen ghɛ ngɛyse ghel ge ghene yɛ loolè ge wɛ̀ɛ̀, chii ɛ jii yɛ ghele yɛ́ ki ɛyngvəmle, ghale ngeŋse ghen, loote foo ɛytem se Feyine, koŋe ghel gese kule ɛytem.

³Tef sɛy əbkiy ghɛ ngɛyse ghel ge ghene yɛ chii ka ghel ghɛ ghɛ́ Feyine. Ghene báà se lu se yɛ make koghoŋ, lɛme wiy ketuu ɛ əmnduk. Ghene lu se yɛ dinte kii dii kɛ ke luun ɛ titiy,

⁴se nɛɛy ge ghondɛɛ ngone yɛ koŋ ɛlum ə ghen, ghene ghon ə ghene,

⁵ghale ngeŋse ghen, chii ɛychii ɛylanene, chii ka əbkiy ɛjuŋe, toknen nɛ̀ ndaase ghene gese yionen se ɛlum ə ghene. Kii nɛ̂ kine lu se nɛɛy ge ghàà wel suŋnen kebee kum giɛse Feyin.

⁶Tef sɛ̂y nsumse ka ghene yɛ ghale ngeŋse ghen.

⁷Kɛ́ ngeŋ nə wɛ̀ Taytus lu ge wɛ̀ lu se yɛ nɛɛy əbnəə əbjim ɛ jii ɛyjuŋ ka əbchəyte se ghene. Wɛ̀ lóò dinte əbnəə se ghene, wɛ̀ yɛ dinte nɛ̀ əbluuye, lɛme ketuu se kenəə kɛ wɛ̀ dinten.

⁸Yɛɛ dinte kɛn əbnəə wɛ́ titiye ka lòó wel jia gham wɛ̀, ka mbanen ə shiɛ yɛ ghuumen bek ka ghene báà se ki kenəə kebee kɛ suuy kum ghɛsen.

⁹Əbkose lu se yɛ yionen se ɛbaa ɛyfɛl nə ghene əbnəə əbjim, nɛɛye nɛ ghene saŋle, suŋnen wiy se ghene se nchɛk,

¹⁰choŋe wiy əbkaa ə ghen. Ghene sɛy lu se yɛ din ge ghene lu ghel ɛjuŋe ghɛ wel samse jii sejim. Ghene loo nɛɛy dì, é ghele yɛ bene kenəə kɛ kum Feyin wɛ Mboyse ə yɛsen.

¹¹Ke lu dî bek ka Feyine dinenmen ɛycham ɛysen se boyse wel əbjim.

¹²Ɛycham ɛysen nɛ̂ yine dine ge ghɛsen maay ɛychii yɛ Feyine banen, nɛ̀ nseemese əbnəə wɛ́ mbi fɛne è me yɛ ghale ngeŋse, chii ɛychii yɛ́ titiye ɛ mbi fɛn ka Feyine kɛŋen,

¹³chii dì, chiyte se yɛne kechii keghakene kɛ Feyin ə Fɛsen fengaŋtene wɛ mboyse yɛsen wɛ Jesus Christ nɛ̂y gwiy ɛ ten.

¹⁴Əb fo ngeŋ ə wen bek ghɛsen se boyse ghɛsen se əbnəə əbbee əbjim, è nɛɛy ghɛsen se lu ghel ɛlanene ghɛ ghɛ́ wene ghɛ ɛ́ shiin se yɛ nɛɛy əbnəə əbjuŋe.

¹⁵Vii nɛ̂ vine lu əbnəə wɛ wɛ̀ yɛ dinte se ghene. Yɛɛ lumse tetem ə ghen gese kwanten ghene nɛ̀ əbtaawe ə viɛ əbjime. Ghàà beeme ge wel se ten yɛ kiye wɛ̀ lòlò.