Read Oku Tay 3 Bible Online

Tay 3 - Oku bible

Tay 3

¹Tamte se ghele ge ghene yɛ ngvəmle ghel ghɛ ɛ́ saken gese nɛ̀ ghele mbiye, yionen se ghene, gese lu kebaaten se nɛɛye naa ghɛ kɛ ke luun kejuŋ.

²Suuy é ghene jia yɛ suuy əbnəə əbbee kum ghel ɛlee, koo wiy ɛyyol, dî è yɛ loolè ge wɛ̀ɛ̀, gese nɛɛy əbnəə ge wɛ̀ɛ̀-wɛ̀ɛ̀ se wel əbjim.

³Ghɛsen se ghɛsene ngeŋse nè lô se jiŋtee, yionen wiy, nɛ ɛ́ lɛɛse ghɛsen. Ghɛsen nè fɛlmen kekos è yio əbjuŋ ɛ tenkii nseemese əbnəə lólò əbjim. Ghɛsen nè chii nɛɛy kɛn əbnəə əbbee gese ghɛke kenghɛk. Ghele nè bane ghɛsen, nɛ ghɛsen bane ghene.

⁴Dî nɛy se lu əbliy wɛ ɛytem ɛyjuŋe nɛ̀ ɛykoŋ ə mboyse ə yɛsen Feyin nè yɛnsen,

⁵əb boyse ghɛsen, nɛ nè báà se lu bek ka ghɛsen nɛɛyen əbnəə wɛ́ titiye, nè lu bek ɛykoosen ɛysen nə wen chia əbghun nə Keyioy Kelanene. Əb nè boyse ghɛsen ka əb nè suun mbee ə sɛsen è fo ɛychii ɛyfɛɛ se ghɛsen.

⁶Əb nè fo keyioy nɛ̂ kin se ghɛsen nchɛk chia əbghun nə mboyse ə yɛsen Jesus Christ,

⁷ka ghɛsene yɛ laane ɛyshiɛ nə Feyine bek ɛycham ɛysen nə wen, è me yɛ ki ɛychii yɛ ɛy jia yî mɛy yɛ ghɛsen chiyten.

⁸Əbnəə nɛ̂ vine lu əbluuy. Mɛ kɛŋe ge ghɛn loote ghal əbnəə vin, ka ghel ghɛ ɛ́ beemen se Feyine è yɛ́ ki shii se yɛ nɛɛy əbnəə əbjuŋe. Əbnəə nɛ̂ vine lu ɛ shii gese lu əbjuŋ se wel əbjim.

⁹Ghàà yɛ lɛme ketuu ə kiɛ ɛ mbeke lólò yɛ kum teghele ɛbaa ɛbaa ə ghel, lɛk ɛykum əbchio nɛ̀ əbnoo wɛ kum nchil. Vii nɛ̂ vine lu əbnəə əbyume, ki wiy ɛyfɛl.

¹⁰Wele gwiye nɛ̀ əbngiabsene, wɛ̀ tef wen se chem kaŋ ɛbaa, əb jia yio, wɛ̀ maay jii ə wen.

¹¹Yɛɛ ke ge ɛynkii wel dì maaymen əbluuy, nɛ mbeese wene dine ge əb befmen.

¹²Nɛ̂y loo lu əbliy wɛ mɛ tinsen Atemas kene Taychikus se wɛ̀, wɛ̀ mom se gwiy fɛn ɛ Nikobolis bek ge mɛ liɛmen ge mɛ chiase beŋ fo.

¹³Mome ketaan se yɛn ge wɛ̀ lu nɛ wɛ̀ giamten Zenas wɛ luun wel wɛ əb loote keen tesak, ghene Abollos é ghene yɛ ndu ɛyjɛl, è yɛn ge ghene ki əbfua əbjim wɛ ghene shiin.

¹⁴Ghel ɛbeemene lu se yiɛke se yɛ nɛɛye njuŋ əbliy əbjim, ka se giamten ghel nɛ̀ əbfua wɛ ghene shiin. Ghene báà se lu se yɛ yese se lólò.

¹⁵Ghel ɛjim ghɛ ɛ́ luun ghɛse ghene tinse ɛychakte se wɛ̀. Chiase ɛychakte ə yɛs se sun ə sɛse se ɛybeeme. Feyine ko cham ɛysen ə yɛn ghel ɛjim.