Read Oku Flm 1 Bible Online

Flm 1 - Oku bible

Flm 1

¹Nyake mɛ Bool, mɛ lu ɛ nchak bek kenəə ə Jesus Christ. Mɛ lu ghɛse wan-nyii wɛ Timoti. Mɛ nyake se wɛ̀ Filemon, wan-nyii wɛ ghɛse koŋen naa se ŋaŋ nɛ ghɛsen fɛle se Christ.

²Ɛychakte yome nduu sɛy se jɛmte yɛsen Abfia, gese nduu se Alkibbus wɛ ghɛsen nɛ̀ ghene chinten è se noo kum kenəə ə Báàba ə wɛsen Jesus Christ, nduu sɛy se kenchintene ghel ɛbeemene kɛ ke konen ɛ wɛ̀ ndaa.

³Feyin wɛ Ba ə wɛsen nɛ̀ Báàba ə wɛsen Jesus Christ ko cham ɛysene yɛn, è fo ɛytem ɛyzəətene se ghɛn.

⁴Mɛ lóó jem naa ɛ leghɛ, mɛ yɛ kuume wɛ̀, bɛɛlè Feyin,

⁵bek ka mɛ yion kum ɛytem yɛ wɛ̀ foon se Báàba Jesus gese nɛ̀ ɛykoŋ yɛ wɛ̀ kiin se ghel ə Feyine ɛjim.

⁶Mɛ jeme ge wɛ loo fekte kenəə kɛ wɛ̀ foon ɛytem se ten se ghele ɛlee, ɛ́ kii nɛ̂ kine nɛɛy ɛ wɛ keele əbnəə əbjuŋe əbjim wɛ ghɛsene yɛ nɛɛy se foo ɛykokse se Christ.

⁷Mɛ suuy lɛ wan-nyii bek ge ɛykoŋ yɛ wɛ̀ kiin se ghone-nyii lu nɛ ɛy nɛɛy mɛ se saŋle naa se ŋaŋ gese koo kelumten ka wɛ̀ losen tetem ə ghel ə Feyin.

⁸Ke me se lu ge chèmè lu ka mɛ kiin əbtaawe ka wele Christ se suuy ge wɛ̀ nɛɛy kenəə kɛ titiye;

⁹bek ɛykoŋ yɛ ghɛsen kiin mɛ se beŋte wɛ beŋten. Suuy mɛ Bool wɛ mɛ ngɛsenmen lɛ, gese lu ɛ nchak bek kenəə Jesus Christ.

¹⁰Mɛ beŋte wɛ̀ bek Onesimus wɛ mɛ nè kiilen Ka wán ɛ nchak fɛn.

¹¹Nè lu se mbiy nɛ əb lu wele lólò se wɛ̀, se lu ɛ leenen nɛ əb se shi wel wɛ loo əb yɛ giamtene ghɛsoo.

¹²Mɛ kase tinse wen se wɛ̀ ɛ leenen, tinse nɛ lu ka mɛ ten nɛ lu ɛybee əbghun nɛ mɛ ɛylee.

¹³Kè lòó mɛ yɛ koŋ se vəse wen fɛn ka əb liɛ kelike kiɛ, è yɛ giamtene mɛ nɛ mɛ lu ɛ nchak bek sakghɛ əbjuŋ.

¹⁴Dî nɛ mɛ kè báà se kɛŋe se nɛɛye kenəə nɛ wɛ̀ baa beeme fɛ wɛ̀ loo giamtene mɛ é ke yɛ lu ka ɛ́ kane wɛ̀ kanen, nɛ wɛ̀ giamten wiy ɛ wɛ̀ ɛykoŋ.

¹⁵Tam fene Onesimus nè vəse wɛ̀ se keleŋ əbliy ka əb nɛ̂y kase gwiy è yɛ lu ghɛne wen əbliy əbjim.

¹⁶Kɛ ɛ leenene lu nɛ əb bɛɛy wiy kekos se wɛ̀, dî chia kekos: Əb lu wán-nyii əbjuŋ. Əb lu ɛ mɛ ɛytem, nɛ kè loo əb yɛ lu ɛ wɛ ɛytem chia, lu ka kekos ə kiɛ, gese lu Ka wán-nyii se ɛybeeme.

¹⁷Loo lu nɛ wɛ̀ yɛn ge ghɛsoo fɛle ɛyfɛl ɛymok se Jesus Christ, wɛ̀ fiisen wen kɛn ka kè lòó wɛ̀ fiisen mɛ.

¹⁸Yɛ lu wɛ ge əb nè lô nɛɛy kenəə kebee se wɛ̀ kene əb ki ɛykaa se wɛ̀, wɛ̀ yɛ bif se mɛ.

¹⁹Nyakte kɛn naa mɛ kine nɛ keghoo ə kome ge: Mɛ nɛ̂y lak ɛykaa ten se wɛ̀. Mɛ jia yɛ tamte tamten se wɛ̀ ge wɛ̀ ki ɛykaa san yɛ luun kɛn naa ngeŋ ə yiɛ.

²⁰Kiy wɛ̀ wan-nyii, ko nɛɛy kenəə kɛ mɛ kɛŋen bek ka ghɛsoo luun ghele Báàba, nɛɛy ka ɛytem ə yome yɛ saŋle ka wán-nyii ɛ kenəə nə Christ.

²¹Mɛ nyake lɛ ke se əbluuy ge wɛ̀ nɛɛ́y kenəə kɛ mɛ kɛŋe gese ke ge wɛ̀ nɛɛ́y naa è chia ka mɛ kwaaten.

²²Kenəə kelee lu ge, wɛ̀ siyse ndaa se mɛ. Mɛ ke se əbluuy ge Feyine nɛ̂y fise ɛyjem ə yɛn ghel ɛjim ka mɛ fəy è gwiy se ghɛn.

²³Ebaflas wɛ ghɛse ghene luun ɛ nchak fɛn bek Christ Jesuse chakte wɛ̀.

²⁴Mak, nɛ̀ Alistalkus, nɛ̀ Demas gese nɛ̀ Luk ghɛ ghɛse ghene fɛ́len ɛ kenəə nə Christe chakte sɛy wɛ̀.

²⁵Báàba Jesus Christ ko cham ɛysene yɛn ghel ɛjim.