Read Oku Heb 1 Bible Online

Heb 1 - Oku bible

Heb 1

¹Nè lu se mbiy nɛ Feyine suŋnen se ɛbaa ɛbaa ə ghɛsene ɛ əbliy nɛ̀ əbliye, ɛ jiise ɛ jiise, nɛ teefe ghɛ ntum nə wene.

²Se lu ɛ leenen əbchii kenləysen ghan nɛ əb suŋnenmen se ghɛsen chia əbghun nɛ wan wen wɛ əb nè chokenmen è vii əbfua əbjim ɛ wen ə keghoo. Feyine nè bom mbi chia əbghun nə wan nɛ̂ vin.

³Əb dine ɛyban yɛ Feyine kiin gese lu kɛn naa ge Feyine vine. Lu wen wɛ əb kiilen mbi nɛ̀ giɛ ə wen yɛ ɛy kiin kediak. Nè lu ka əb nè kuomen è suu mbeese ghel, əb diom ɛ ɛyyio ɛybee əbkoy əbtaa nə Feyine wɛ kediake wene chian kediak kejim.

⁴Wan ə Feyin me se lu nɛ əb chia nchiyse-ndaa nə Feyine kɛn ghɛɛ-ghɛɛ ka ɛyghel yɛ əb nè foon se wen chian yɛ́ ghene.

⁵Feyine dì né bɛɛy ghàà suuy se nchiy ndaa nə wen ɛylee ge: “Wɛ̀ lu wán ə wom, Lan vin lu nɛ mɛ liɛ wɛ̀ ge wán ə wom Nɛ Feyine né bɛɛy ghàà suŋnen kum nchiy-ndaa nə wen ɛykɛ ge: Mɛ yɛ lu ba ə wen, nɛ əb lu wán ə wom.”

⁶Əb loo tinse wán ə wen wɛ əb chian ɛjim se mbi è suuy ge: Nchiyse-ndaa nə yi sejim lu se yɛ kokse wen.

⁷Əb suŋnen kum nchiyse-ndaa nə wen ge: Mɛ nɛɛye nɛ nchiyse-ndaa nə mɛ lu əblam əbfiɛf nɛɛye nɛ ghene ghɛ ghel ɛyfɛl nə mɛ lu əblam əbvəs.

⁸Dî è suŋnen kum wán ə wen ge: “Feyine, wɛ̀ yî gok è yɛ lu ɛ wɛ̀ kaba əbliy əbjim, wɛ̀ sake ghel ə ghiɛ kɛn ɛ titiy.

⁹Wɛ̀ koŋe əbnəə wɛ əb luun ɛ titiy, bane wɛ əb luun nɛ̀ ɛybame, ke me se lu ge Feyin ə fiɛ siysemen wɛ̀, è fo ɛykokse se wɛ̀ yɛ ɛy nɛɛyen ge wɛ̀ yɛ saŋle chia ghele ngoo nə wɛ̀ ɛjim.”

¹⁰Əb nè lô gese suuy ge: “Báàba, wɛ̀ nè bom mbi yin naa se kenkɛɛte, è bom ɛyyio kɛn naa nɛ̀ ɛghoo ə ghiɛ.

¹¹Əbfua vine yî mɛy, dî é wɛ̀ yɛ lu kɛn luun, əb yî fəy naa əbjim ka ndəyse,

¹²é wɛ̀ kaale ka ɛ́ kaale ndəy se makene, è kubsen ka ɛ́ kubsen ndəy sɛ se dənenmen. Dî nɛ wɛ̀ yî gok è yɛ lu kɛn ɛyfeŋ, nɛ̀ ɛychii ə yiɛ jia yî mɛy.”

¹³Feyine di né bɛɛy ghaa suuy se nchiy ndaa nə wen ɛylee ge: “Diom fɛn ɛ mɛ ɛybee əbkoy əbtaa, se chin se ka mɛ nɛ̂y nɛɛy é mbanen ə shiɛ yɛ lu kegokten kɛ wɛ̀ tom ɛvəə ə ghiɛ ɛ ten.”

¹⁴Nchiyse ndaa nə Feyine di lu kɛn əbyioy wɛ əb fɛ́len se Feyine, nɛ Feyine ko nè tum ghene ge ɛ́ gwiy è yɛ giamtene ghel ge ghene kiile ɛyboy.