Read Oku Heb 10 Bible Online

Heb 10 - Oku bible

Heb 10

¹Ɛysak ə Mosese lu kɛn kenjimnjim əbnəə əbjuŋe wɛ əb bo bɛɛyen se gwiy, nɛ wiy nkante əbnəə wɛ tene. Lu ɛysak nɛ̂ fɛn nɛ ɛ́ nè taŋle ntaŋlese əbliy nɛ̀ əbliye, ɛ nguk ɛ nguk dî nɛ se nè báà se loote nɛɛy ghel ghɛ gwiyen se Feyine ge ɛ́ yɛ lu ɛlanen.

²Nè bóy se yɛ lu ge ntaŋle shin nɛ̀ lô se suu mbeese ghel ghɛ ɛ́ nè gwiyen se kokse Feyin se əbluuy, fene teteme ə ghene nè bo sake wiy ghene, fene ghene ko nè yalmen se yɛ taŋle ntaŋle sɛ tene.

³Ntaŋlese nɛ̂ shine sɛy nɛɛy nɛ ghele kuume mbeese ghen nguk nɛ̀ nguk.

⁴Ke lu dî bek ge əmnduŋ mə nase nɛ̀ mɛ̂ bvəyse lòó əm jia suu mbeese ghɛy.

⁵Lu bek kii nɛ̂ kine kɛ Christ nè loo lu se gwiy ɛ mbi fɛn è suuy se Feyine ge: “Wɛ̀ báà se lu ɛ shii ntaŋlese nɛ̀ ɛyfoo yɛ ɛ́ foon se wɛ̀, wɛ̀ siysemen nɛ lu əbghun wɛ luun wome ka mɛ fo se wɛ̀.

⁶Wɛ̀ báà se saŋle kum nyam sɛ ɛ́ nyoken ɛ ketatane ntaŋle, saŋle wiy kum ɛyfô yɛ ɛ́ foon bek mbeese.

⁷Mɛ me suuy ge: Mɛ vine Feyine, Mɛ lu kebaaten se nɛɛye kenəə kɛ wɛ kɛŋen, ghɛɛ-ghɛɛ ka ɛ́ nyaken kum mɛ ɛ wɛ ŋwaale.”

⁸Christ nè kɛɛte suuy ge: Wɛ̀ báà se lu ɛ shii ntaŋlese, nɛ̀ ɛyfô yɛ ɛ́ foon se wɛ̀ kene nyam sɛ ɛ́ nyoken ɛ ketatane ntaŋle gese nɛ̀ ntaŋle sɛ ɛ́ taŋlen mbeese so; chèmè lu ka ɛysak ə Moses nè dinen ge ɛ́ yɛ nɛɛy dì.

⁹Əb me suuy se Feyine ge: Mɛ gwiymen se nɛɛye kenəə kɛ wɛ̀ kɛŋen. Christ me buuse tenkii ntaŋle sɛ́ mbiye, è lɛm yɛ̂ kenkumten yɛ luun ngeŋ ə wen.

¹⁰Jesus Christ nè kuo ɛ kentam se nɛɛy ge ghɛsen ghel ɛjime yɛ lu ɛlanen kɛn ka Feyine nè kɛŋen. Əb fo ngeŋ ə wen ka ntaŋle kaŋ ɛymok, ke kwɛn dî.

¹¹Se lu nɛ ghɛ́ ntaŋlee teem nɛɛye ɛyfɛl ə ghen kechii nɛ̀ kechii, taŋle ntaŋle ɛymok ɛ kaŋ ɛ kaŋ yɛ lòó ɛy jia suu mbeese.

¹²Christ nè fo yɛ̂ wen yɛ ntaŋle nɛ lu ngeŋ wen kaŋ ɛymok ɛy se lu ɛykwɛnen se taŋle mbeese ghel əbliy əbjim. Əb me diom ɛ ɛybee əbkoy əbtaa nə Feyine.

¹³Əb lu fo, chiye ka Feyine náà lɛm mbanense wen ka əbgokten wɛ əb yɛ tom ɛvəə ɛ ten.

¹⁴Lu nɛ̀ ntaŋle nɛ̂ yin ɛymok yɛ əb looten siyse ghel ghɛ Feyine liɛn lansen ge ghele ghí ka ɛ́ yɛ lu ghaa jas əbliy əbjim.

¹⁵Keyioy Kelanene dine əbluuy əbnəə ghan se ghɛsen. Kɛ mbiye lu nɛ əb suuye ge:

¹⁶“Bay nè suuy ge: Lɛɛ kelek ke mɛ nɛ̂y laa ghɛse ghene, ɛ əmchii mɛ əm gwiyen: Mɛ náà nɛɛy é ghene loote keele tesak ə tom è gese vii se ghene tekwaate.”

¹⁷Əb gese suuy ge: “Mɛ jia bo yî yɛ kuume mbeese ghen nɛ̀ əbjas ə ghene naa se nkan.

¹⁸Feyine lɛ̂ysè mbeese ghel, ghaa shii gese yɛ lu se yɛ taŋle ntaŋlese.”

¹⁹Ghone-nyii, əmnduŋ mə Jesus nè nɛɛymen, ghɛsen kiile jii yɛ fiɛle fiɛlen è lii se kelik kɛ ke Lanen è Chia.

²⁰Jesus lu nɛ əb sasmen ndəy sɛ se nè keŋten ghɛsen fɛ ɛ́ lii se kelik kelanene, əb sas nɛ əbghune wene, è din jii ɛyfɛɛ yɛ ɛy foon ɛychii.

²¹Ka ghɛsen se kiin ketuu se ghɛ́ ntaŋlee ketaa ka kii nɛ̂ kine kɛ ke kiynen se ghele Feyine;

²²ghɛsen me kokte è baksen se Feyine nɛ̀ tetem te lanene, nɛ ɛ́ loote fo ɛytem se wen è jia se maanen kenəə, bek ka Jesus suunmen tetem ə tɛsen nɛ̀ əmnduŋme wen ka ghɛsene jia bo yɛ fane njio, è gese suu ɛyghun nə yɛ́sen nɛ̀ moo əmlaanen.

²³Ghɛsen teem ketaan, è yɛ chiyte kii dii kɛ ghɛsen suuyen ge ghɛsen fó ɛytem se ten. Ghàà ghɛsen yɛ shikle, bek ka ghɛsen keen se əbluuy ge Feyine sɛɛ lɛm ɛykak ə wen, əb lunse.

²⁴Wel se ghɛsen yɛ mom se yɛ lumse əblee, ka ghɛsen é yɛ ki ɛykoŋ se ghele gese nɛɛye əbnəə əbjuŋe.

²⁵Ke báà se jofe ge ghɛsen yɛ lɛysen se yɛ konen ka ghel ɛlee se nɛɛyen. Naa ndɛ ɛ ghɛsene məm kô yɛ mom se yɛ lumse əblee nduu kɛn ɛ mbiy, bek ka ghɛn ko yɛne ge kechii kɛ Báàba kase gwiyen ɛ ten se baksene.

²⁶Nɛ loo lu ghɛsen liɛ ge ɛ́ yɛ nɛɛye ndu nɛ̀ əbnəə əbbee, nɛ ɛ́ ko nè lômen keele əbluuy, fene ntaŋle ɛylee bo bɛɛy wiy yɛ lòó ɛ́ kase taŋle mbee ə sɛsen so.

²⁷Wele chii ɛ jii nɛ̂ fɛn fene kenəə bo bɛɛy wiy kɛ əb yɛ chiyte chia kɛn kechii nsak gese nɛ̀ kemboo əbvəs kɛ ɛ́ yî mak ghel əbbaanese nə Feyine ɛ ten.

²⁸Ghɛn ko ke ge wel jas nchil ə Moses, yɛ lu wɛ ghele teem ɛbaa kene ɛtal è suuy ge ghene lu nɛ ɛ́ yɛn ge ghɛy kenəə kɛ əb nɛɛyen, fene ɛ́ yúy wen, bo chame wiy ɛysen.

²⁹Lòò è yɛ lu ge wel yɛ kiye wán ə Feyin lolo, liɛ əmnduŋ mə kelek mɛ əm nè suun wen se mbee so ge lu kefaa lólò, tɛylee keyioy ə Feyin kɛ ke gwiyen nɛ̀ ɛycham ɛysene, é wɛ̀ yɛ ke ge ngɛk yɛ ɛ́ fo se wene yɛ lu lɛɛy?

³⁰Ghɛsen ko ke wel vi wɛ əb nè suuyen ge: Wel nɛ̀ɛ̀y mbee fene seese mɛ; mɛ nɛ̂y lak ghele mbee; è gese suuy ge: Bay Feyine nɛ̂y sak ghele wen.

³¹Lu kenəə kebɛɛmene se lii ɛghoo nə Feyin wɛ əb chiin.

³²Ghɛn kase kuume ka ke nè luun se mbiy ɛ əbchii wɛ ghɛn nè kiilen ɛyban ə Feyin è beeme. Ghɛn nè lô se yɛne ngɛk ɛ əbnəə naa se ɛydio, dî è ko teem ketaan.

³³Nè lóò lu əbliy əblee ɛ́ yɛ tɛyle ghɛn gese nyable nɛ̀ ghɛn ɛ dɛɛne, è loo lu əbliy əblee ghɛn yɛ baksen ndu nɛ̀ ghel ghɛ ɛ́ ko nɛɛyen se ghene dî.

³⁴Ghɛn nè lô se koosen ɛysen se ghele nchake, è se saŋle se vəse ge ɛ́ fii əbfua ə wɛn bek ge ghɛn ke ge ghɛn ki əbfua wɛ əb chian vii nɛ̂ vine nɛ lu wɛ əb jia yî mɛy.

³⁵Ke me se lu ge ghàà ghɛn bol se ghɛne tetem, bek ka ghɛn kulen tetem é ghɛn kiile əbmakte naa se ɛydio.

³⁶Ke jofe ge ghɛn kul ɛytem ka ghɛne yɛ nɛɛye kenəə kɛ Feyine kɛŋen, è nɛ̂y me kiile kii dii kɛ əb nè kaken.

³⁷Ke lu kɛn ghɛɛ-ghɛɛ ka ŋwaale-Feyine suuyen ge: “Moote kɛn lɛ é vi wɛ əb luun se gwiy, gwiy, nɛ əb jia moote se gwiy.

³⁸Ghel ə ghom ghɛ ɛ́ luun ɛ titiy me se lu se yɛ chii bek ka ghene foon ɛytem se mɛ. Dî nɛ wel se ten kase ben jim se mɛ, é mɛ jia yɛ saŋle kum wen.”

³⁹Ghɛsen dì báà se lu ghel ghɛ kase fiile è lɛy. Ghɛsen lu nɛ ɛ́ fó ɛytem se Feyine, è kiile ɛyboy.