Read Oku Heb 11 Bible Online

Heb 11 - Oku bible

Heb 11

¹Se fo ɛytem se Feyine lu se yɛ ke se əbluuy ge wɛ̀ nɛ̂y kiile kii dii kɛ wɛ̀ chiyten se kiile, nɛ lu se yɛ ke se əbluuy ge kefaa kɛ wɛ̀ chiyten nɛ wɛ nè bɛɛy ghàà yi yɛne nɛ̂y yɛ lu.

²Nè lu bek ɛytem yɛ ghele ghɛ́ mbiye nè foon se Feyine wɛ Feyine nè benten ghene.

³Lu bek ɛytem yɛ ghɛsen foon se Feyine wɛ ghɛsen keen ge Feyine nè bom mbi kɛn nɛ̀ giɛ ə wen. Dii ge Feyine nè liɛ əbfua wɛ ɛ́ yɛ́nen wiy, è bom wɛ ɛ́ yɛ́nen so.

⁴Nè lu bek ɛytem yɛ Abel nè foon se Feyine wɛ əb nè taŋlen ntaŋle nɛ ɛy chia yɛ̂ Kain. Feyine me yɛn ge əb lu wele titiy bek ɛytem yɛ əb nè foon se yi. Ke lu bek ka Feyin se wene ngeŋ nè lô din ge yi lu nɛ yi fii ntaŋle Abel. Se lu bek ɛytem yɛ Abel nè foon se Feyine wɛ əb ko bo suŋnen lan, chèmè lu ka əb nè kuonmen.

⁵Nè lu bek ɛytem yɛ Enok nè foon se Feyine wɛ Feyine nè koksen wen se ɛyyio nɛ əb báà kuo, ghele jia se ke ghaa əb luun. Ŋwaale ə Feyin dine ge, nɛ Feyine geese kokse wen se ɛyyio lu nɛ əb nè lô nɛɛy Feyine se saŋlee.

⁶Lòó wel jia nɛɛy é Feyine yɛ saŋle se wen báà buu ge əb fo ɛytem se Feyine. Ke lu dî bek ge naa ndɛ wɛ əb gwiyen se Feyine lu se beeme ge Feyine lu, se gese se beeme ge Feyine foo əbmakte se ghel ghɛ ɛ́ biiten wen nɛ̀ ɛyteme.

⁷Nè lu bek ɛytem yɛ Noa nè foon se Feyine wɛ əb nè yion ntef yɛ Feyine nè foon se wen kum kenəə kɛ ke nè bɛɛyen se gan. Noa nè lô yionen se Feyine, è bàklè kenək kɛ ghene ɛyshaa ndaa nə wene nè boyen ɛ ten. Əb nè nɛɛy dî ke me din ge ghele ghɛ́ ketuu ntiɛ lu nɛ ɛ́ jas. Feyine me fiisen wen ge wel wɛ əb luun ɛ titiy bek ɛytem yɛ əb nè foon se yi.

⁸Nè lu bek ɛytem yɛ Ablaham nè foon se Feyine wɛ əb nè yionen se Feyine əbliy wɛ Feyine nè suuyen se wen ge əb ndu se ketum kɛ yi nè kakenmen se fo se wen. Əb loo se nduu dì ke wiy ghaa əb nduun.

⁹Lu bek ɛytem yɛ əb nè foon se Feyine wɛ əb nè chiin ɛ ketum kɛ Feyine nè kaken wen so ka kengwiy, chii əmtaa. Ayzek ghene Jakob ko nɛy se chii dì bek ka ghene nè chiyten sɛy se kiile kii dii kɛ Feyine nè kaken ghene so.

¹⁰Ablaham nè chii dì, chiyte əbliy wɛ əb nɛ̂y yɛ chii ɛylak yɛ Feyine nè nɛyten è bàklè ɛ ketiɛ kɛ ke yî gok è yɛ lu kɛn luun.

¹¹Nè lu bek ɛytem yɛ Sala nè foon se Feyine wɛ əb nè kiilen kediak se chia nɛ̀ əblɛɛ naa nɛ əb ngɛsenmen è chia keleŋ kɛ nè lòó əb bo bii. Ke nè kooy dì ka əb nè samsen ge vi wɛ əb nè kaken yi, yî lunse ɛykak ə wen.

¹²Ghele nɛy me gwiy ɛ ketuu ntiɛ nɛ ɛ́ dio ka əmnjes mɛ əm luun ɛ ɛyyio, dio ka kesɛsɛy ɛ əbghooy jio ɛyghuy, nɛ ɛ́ chia əbghun nə wel wɛ əb ko nè se shiin ka kenkuo kefaa.

¹³Ghel nɛ̂ ghine naa ɛjim nè kuo nɛ ɛytem ə ghene ko bo bɛɛy ka ɛ́ foon se Feyine. Ghene nè bɛɛy ghàà kiile kii dii kɛ Feyine nè kaken ghene so. Ghene nè teem è yɛn kɛn yɛ́nen naa əbtəm, dî è ko se saŋle suuye ge, lu əbluuy ge ghene lu əbngwiy chia chian ɛ ketuu ntiɛ fɛn.

¹⁴Ghel ghɛ ɛ́ suŋnen ɛ jii nɛ̂ ghan dine ge ghene biite nduu nè ɛylak yɛ yɛ́ ghene.

¹⁵Ghene nè báà se kuume nɛ lu ketum kɛ ghene nè lòòn ɛ ten, buu dì fene ghene nè lô kɛŋ jii yɛ ɛ́ kase fiile se ghô.

¹⁶Ghene nè kiye nduu nɛ lu nɛ̀ ketum kɛ ke chian kii nɛ̂ kine, ketum nɛ lu kɛ́ ɛyyio. Bek kii nɛ̂ kine Feyine jia se ghuumene ge ɛ́ yɛ toŋte yi ge Feyin ə ghen bek ka əb luun nɛ əb siyse ɛylak se ghene.

¹⁷Nè lu bek ɛytem yɛ Ablaham nè foon se Feyine wɛ nè luun ɛ əbliy wɛ Feyine nè momen wen ge əb fó Ayzek ka ntaŋle, Ablaham wɛ Feyine nè kaken wen ge ɛykfəə ə wene yî yɛ lu se ɛydio ko se lu se liɛ kenjoŋe wan nə wen ki ge yi taŋle Feyin so.

¹⁸Ke lu dî nɛ Feyine nè suuy se Ablaham ge: Wan ə viɛ Ayzek lu wel wɛ əb nɛ̂y bii ɛykfəə yíɛ́ ɛy dio.

¹⁹Ablaham nè yɛne ge wel kuo, é Feyine kase lose se ɛykuo, ke me ko se yɛnsene ge Ayzek nè lô kuo, Feyine kase fise wen se Ablaham.

²⁰Nè lu bek ɛytem yɛ Ayzek nè foon se Feyine wɛ əb nè suuyen se ghon ə wene ghɛ Jakob ghene Esau ge ghene náà kiile ɛybose yɛ Feyine nɛ̂y fo.

²¹Lu bek ɛytem yɛ Jakob nè foon se Feyine wɛ əb nè dənenmen loo lu se kuo, è bose ghon ə Josɛf, bose dì nɛ əb ngvəlen ɛ wene mbàŋ è se kokse Feyin.

²²Lu bek ɛytem yɛ Josɛf nè foon se Feyine wɛ əb nè loo lu se kuo, è suuy ge ghele Islaele yî lòò se Ejibt, è gese din jii yɛ ɛ́ yî jɛl nɛ̀ ɛygvən ə wen ɛ ten.[2]

²³Lu bek ɛytem yɛ no ə Moses ghene ba ə Moses nè foon se Feyine wɛ ɛ́ nè biin wen, è me lete se njoŋ setal, bo fane wiy ɛysak əbfone Ejibt bek ka ghene nè yɛnen ge wan ten jofe naa se ŋaŋ.

²⁴Se lu bek ɛytem yɛ Moses nè foon se Feyine wɛ nè loo lu nɛ əb kuymen, è tun ge ghàà ɛ́ yɛ toŋte yi ge wán ə wan ə ntoke Ejibt.

²⁵Əb nè lô yɛn ge ke jofe ge yi yɛ yɛne ngɛk ghene ghel ə Feyine chia ka kè lòó yi yɛ yio nɛ lu əbjuŋ ɛ məme mbee se feleeŋese əbliy.

²⁶Əb nè lô yɛn ge ke jofe ge yi yɛ yɛne ngɛk, kiile kenchoksen bek Vi wɛ Feyine nè Yiosen chia ka yi kiile əbghaake wɛ́ Ejibt nɛ̂ vi. Ke nè lu dî bek ka əb nè kiyen nduun ɛ mbiy se kiile əbmakte wɛ Feyine nɛ̂y fo se wen.

²⁷Ko se lu bek ɛytem yɛ Moses nè foon se Feyine wɛ əb nè lòòn se Ejibt, bo fane wiy ge əbfone sɛ lóó yafse ɛytem, è jɛl lɛɛy nɛ̀ yi-a? Əb nè lô kul ɛytem è se nduu kɛn ɛ mbiy dî-a ka əb yɛne Feyin, nɛ wel nè bɛɛy ghàà yɛn.

²⁸Nè lu bek ɛytem yɛ əb nè foon se Feyine wɛ əb nè yiyten ɛyyiɛ Kechii Ɛyboyse è làm ghele Islaele yiose əmnduŋ se ɛychio ndaa ka Nchiy-ndaa Nyuy-wel nə Feyin yɛ ɛy nè jɛ́len yúyten ghon ɛluumene ghɛ́ mbiye nɛ̂y loo gwiy è jia yuyte ghɛ ghene.

²⁹Nè lu bek ɛytem yɛ ghele Islael nè foon se Feyine wɛ Jio-ɛyghuy Ɛybaŋen nè tenen ghene diaŋ ɛ ntiɛ, ghele Ejibt nɛ̂y se mome se diaŋ ɛy me kase chite ghene, ghene kuoke.

³⁰Ko se lu bek ɛytem yɛ ghele Islaele nè foon se Feyine wɛ ghene nè kaalen ntɛke Jeliko se əbchii saamba, kengɛy kɛ ɛ́ nè bomen è kaale ntɛke ten so me kɛ̀sèn.

³¹Nè lu bek ɛytem yɛ Lahab wɛ nè luun kejɛl nè foon se Feyine wɛ əb nè báà kuo ghene ghel ghɛ ɛ́ nè báà se yionen se Feyine. Ke lu dî bek ka əb nè fiisen ɛ jii ɛyjuŋ gwɛ̀y sɛ ɛ́ nè tumen ɛ Islael ge se gwiy è loote kaake ntɛke ghen.

³²Lòó mɛ bo suuy gee ghɛ? Mɛ báà se ki əbliy wɛ yɛ fiɛl əbnəə wɛ kum Gideon, nɛ̀ Balak, nɛ̀ Samson, nɛ̀ Jefta, nɛ̀ David, nɛ̀ Samuel gese nɛ̀ ghele ntum nə Feyine.

³³Ghene ɛlee nè noo əbtum yiɛ bek ɛytem yɛ ghene nè foon se Feyine, nɛ ɛlee toose kenəə kɛ titiye, kiile kii dii kɛ Feyine nè kaken, nɛ ɛlee chite ɛychio bvələkse,

³⁴nɛ ɛlee limse əbvəs wɛ əb nè baalen naa se ŋaŋ, ɛlee boy se ɛghoo nə ghel ghɛ ɛ́ nè kɛŋen se yuye ghene nɛ̀ əmfiakme. Ghene nè lu ghel ɛbole, Feyine nɛɛy ghene se ki kediak kɛ noo è yiɛ ɛyghoŋ so. Ghene nè lòò è sɛɛ se ghel ɛyghoŋ ɛtaa ghɛ yɛ fɛɛse ghel ɛyghoŋe ghɛ́ əbtume fɛ́ɛ́sen.

³⁵Se lu bek ɛytem yɛ əbkiye nè foon se Feyine wɛ ghel ə ghene ghɛ ɛ́ nè kuonmen nè kase loole se ɛykuo. Ghele ɛlee nè lóó ɛ́ tɛn se fəy se nchak, ɛ́ nəkse ghene, ghene kuote ka ghene nɛ̂y loole è yɛ ki ɛychii yɛ ɛy chian yɛ leenene.

³⁶Ɛ́ nè buu ɛlee tɛle, kule ɛlee vii se nchak.

³⁷Ɛ́ nè yuyte ghene ɛlee nɛ̀ ɛtiye, bayte ɛlee gianene əbwaŋ əbbua, yuyte ɛlee nɛ̀ əmfiakme. Ghene nè kule chia nɛ̀ guose bvəyse, kuo ketan nɛ ɛ́ nəkse ghene gese foo ngɛk se ghene.

³⁸Mbi yin nè báà se lu kelik kejuŋe se ghene! Ghene nè jɛle jiŋe nɛ lu əbkwak, nɛ̀ se kfənse, chii ɛ mbvəkse nɛ̀ se əbbuk ɛ ntiɛ.

³⁹Ghel nɛ̂ ghin nè lô fəy è kok ka ghel ghɛ ɛ́ looten fo ɛytem se Feyine. Dî è jia chèmè kiile kii dii kɛ Feyine nè kaken se ghene.

⁴⁰Ke nè lu dî bek ka Feyine nè yɛnen ge yi siyse kenəə se ghɛsen kɛ ke jofen chian, ka ghene nɛ̂y chinten ghɛsen é Feyine me loote siyse ghene.