Read Oku Heb 12 Bible Online

Heb 12 - Oku bible

Heb 12

¹Ka feliɛ wel fine kaalemen ghɛsen è tas ɛ jii nɛ̂ ghan, è se dine əbnəə wɛ Feyine nɛ̀ɛ̀yen, ghɛsen maay əbnəə wɛ əb jefsen ghɛsen, è gese maay mbee sɛ se yâŋsèn tâŋlèn ghɛsen, è kul ɛytem è yɛ nyiŋe kenyiŋen kɛ ghɛsen kiin se nyiŋ.

²Ɛ́ loo nyiŋ, ɛ́ lɛm ɛshiɛ nɛ lu ɛ Jesus əbghun wɛ əb nè nɛɛyen ghɛsen fó ɛytem se Feyine, è gese se nɛɛye ge ghɛsen yɛ loote ki ɛytem se Feyine se chin se kenləysen. Əb nè lô yɛn ngɛk è chiɛy kenghuumen, è kuo ɛ kentam. Əb nè nɛɛy dî bek njuŋ yɛ əb nè chiyten se kiile, se lu ɛ leenen nɛ əb diommen ɛ ɛybee əbkoy əbtaa ɛ kelik əbfon nə Feyine.

³Ghɛn yɛ kuume jii yɛ əb nè yɛnen ngɛk ɛ ten ɛ ɛghoo nə ghele mbee fɛ ghɛn baa bol nɛ tetem ə tɛne kuo.

⁴Ghɛne bɛɛy ghàà luŋ ɛ məme əbnəə əbbee wɛ ɛ́ nɛɛyen se ghɛn è chem ɛ keleŋ kɛ ɛ́ yúy ghɛn yúyén.

⁵Ghɛn chèmè lɛysenmen giɛse ntef sɛ Feyine foon se ghɛn ka ghon ə wen-a? Əb suuy ge: “Wan ə wom, yɛɛ ke se liɛ ɛytiyse yɛ Bay Feyine tiysen wɛ̀ ge kenəə kebole əb loo wamnen wɛ̀, ghàà wɛ̀ yɛ koosene nken.

⁶Bek ka Baye tiysen nɛ lu ghel ghɛ əb koŋen, wefte wel ɛjim wɛ əb liɛn ge lu wan ə vi.”

⁷Ghɛne loo yɛne ngɛk, ghɛn yɛ kul ɛytem, ke ge lu ɛytiyse ka Feyine tiysen ghɛn ka ghon ə wen. Wan lɛ lu wɛ lòó ba ə ten jia tiyse-a?

⁸Loo lu Feyine jia yɛ tiyse ghɛn ka əb tiysen ghon ə wen ɛjim, fene ghɛn lu ghon ghɛ ghàà bay, nɛ wiy nkante ghon nə wen.

⁹Ghɛn keele sɛy ge ghɛsen ki ɛbaa ə ghɛsen ɛ ketuu ntiɛ fɛn ghɛ ɛ́ lóó ɛ́ yɛ tiyse ghɛsen, nɛ̀ ghɛsen ngvəmle ghene se kii nɛ̂ kii. Ke me se lu kejuŋ ge ghɛsen yɛ loote yionen se Ba ə wɛsen ɛyyio è yɛ ki ɛychii yɛ ɛy jia yî mɛy.

¹⁰Ɛbaa ə ghɛsene nè lóó ɛ́ yɛ tiyse ghɛsen se keleŋ əbliy ɛ jii yɛ ɛy nè jofen ghene, dî nɛ Feyine lóó əb yɛ tiyse ghɛsen ɛ jii yɛ əbnəə jof se ghɛsen ɛ ten ka ghɛsene yɛ lu ghel ɛlanene ka wen.

¹¹Ɛ́ lóò tiyse wel əb yɛ yɛn di-a ka lu kenəə nɛ ke gwiye kɛn se nɛɛy ge əb yɛ yio ɛylum. Loo lu se ɛybame ten ghel ghɛ ɛ́ kooyen kenəə kɛ ke tiyse ghene ɛ məme ngɛkse nɛ̂ ghan me yɛ chii əmnyiaŋ bek ka ghene nɛɛyen kenəə kɛ ke luun ɛ titiy.

¹²Ke me se lu ge ghɛn ghaa beeme ge ɛykoy yɛne boole, ghɛn softe nkfəyse, fɛ́ ɛləy ə ghɛne bo yɛ chiŋ.

¹³Ghɛn yɛ jɛle ndu ɛ jii yɛ ɛy luun ɛ titiy, ka ghel ghɛ ngɛsen ɛ jia ləm ləmen, dî è bonen bonen.

¹⁴Ghɛn yɛ mom ketaan se yɛ chii ghɛne ghele nɛ̀ əmnyiaŋe, è gese yɛ mom se yɛ chii ɛychii ɛylanene bek ge lòó wel jia náà yɛn Feyin buu ge əb chii ɛ jii nɛ̂ ghan.

¹⁵Ghɛn yɛ toknen fɛ wel se ghɛn soy se kiile ɛycham ɛysen nə Feyine, è yɛ toknen fɛ wel se ghɛn fəy nə kenəə kɛ ke yɛ luyse tetem ə ghel, foo ngɛk gese bese tetem ə ghel se ɛydio;

¹⁶è yɛ toknen fɛ wel se ghɛn yɛ chii ɛychii kenjaŋ, toknene fɛ wel se ghɛn yɛ kiye kenəə ə Feyin se nchɛk ka Esau wɛ əb nè feenen əmngɛse wen se wan-no ə wen se əbfua-əbyíɛ́ne wɛ əb nè yiɛn kɛn kaŋ ɛymok.

¹⁷Ghɛn ko ke ka Esau nè kasen è se luŋe ge ba ə wen bose wen, bay maa wen bek ka jii nè bo bɛɛyen wiy yɛ lòó əb kubsen kenəə kɛ ke kè kooyenmen, chèmè lu ka əb nè kɛŋen dî səkse əmshiɛ.

¹⁸Ghɛne báà gwiy se baksene kfən ɛ ketuu ntiɛ fɛn ka ghele Islaele nè gwiyen è baksen kfən Sinai yɛ ɛy nè fuon nɛ keleeme əbvəse loole ɛ ten ketaan, ghaa kebɛye loo ke yɛ fin ge bik nɛ̀ nfəme dəkse əblik,

¹⁹nɛ ɛyshoŋe suŋnene, nɛ giɛ ə Feyin gwiye. Ghele Islael nè yio giɛ ten è se fane, lone ge ghàà əb gese suŋnen se ghene.

²⁰Ghene nè fane, bek ka Feyine nè suuy ge: Chèmè kum nyam əbkwak kfən yin fene ɛ́ lu se təmle nɛ̀ ɛtiye se yuy.

²¹Əbnəə wɛ ghene nè yɛnen fo nè bɛ́ɛ́me naa se ŋaŋ wɛ Moses nè suuyen ge: Mɛ fane gese chiŋe.

²²Se lu nɛ ghɛne gwiy nɛ lu ɛ kfən Zion, ntɛk yɛ yɛ̂ Feyin fɛ fe chiin, Jolesalem wɛ̂ ɛyyio nɛ nchiyse-ndaa nə Feyine chinten fo ɛ nkamse ɛ nkamse è se saŋlee.

²³Ghɛn gwiymen ɛ kelik kɛ ghon ə Feyine ghɛ́ mbiye chinten ɛ ten. Lu ghene ghɛ ɛ́ nyakenmen teghel ə ghen ɛ ɛyyio. Ghɛn gwiymen se Feyin wɛ əb saken ghel ɛjim, è gese gwiy se ghel ɛjuŋe ghɛ ɛ́ nè lootenmen nɛɛy ɛ́ se lu titiy.

²⁴Ghɛn gwiymen se Jesus wɛ əb tiyen ɛ nsan nə Feyine ghene ghele se siyse nkakma ɛyfɛɛ, gese gwiy se əmnduŋ mə wen mɛ əb nè misen ka ghene yɛ lu ɛlanen. Əmnduŋ nɛ̂ mine dine əbnəə wɛ əb chian wɛ mɛ́ Abel nè dinen.

²⁵Ghɛn yɛ ke fɛ wel tɛn se yio kenəə kɛ Jesuse suuyen se wen. Ghel Islael ghɛ ɛ́ nè tɛnen se yio kenəə se Moses wɛ Feyine nè lɛmen ɛ ketuu ntiɛ ge əb yɛ tefe ghene nè báà se ki jii se nyiŋ. Ghɛn lɛ kwaate ge ghɛsen tɛn se yio vi wɛ əb tefen ghɛsen ɛ ɛyyio, é ghɛsen nɛ̂y yɛ ki jii yɛ boy se ngɛkse-a?

²⁶Nè lu ka Feyine nè suŋnene ɛ kfən Sinai nɛ ketuu ntiɛ shikene, se lu ɛ leenen nɛ əb kakmen ge: “Mɛ lu se kase se shik nɛ wiy kɛn ketuu ntiɛ, mɛ lu se shik sɛy ɛyyio.”

²⁷Giɛ sɛ ge: “Kase shik” shine dine ge ɛ́ yɛ shikse əbfua, me chakse əblee ɛ məme əbfua wɛ ɛ́ nè bomen nɛ̂ vi chaksen, ka wɛ lòó əb jia shiken me gok.

²⁸Ke me se lu ge ghɛsen yɛ chɛkle bek ka ghɛsen kooyen ɛylak yɛ lòó ɛy jia shiken, gese foo ɛykokse se Feyin nɛ̀ ɛyngvəmle, nɛ̀ ɛyfane, ɛykokse yɛ lòó Feyine fiisen,

²⁹bek ka Feyin ə Fɛsene luun kɛn naa ka əbvəs wɛ əb kfəlen əbfua mɛyse kɛn mɛysen.