Read Oku Heb 13 Bible Online

Heb 13 - Oku bible

Heb 13

¹Ghɛn yɛ koŋe ngeŋ ə sɛn ka ghone-nyii nduu kɛn ɛ mbiy.

²Ghàà ghɛn lɛysen se yɛ fiisene ghel ɛyghan ɛ ghɛne ndaase bek ge ghel ɛlee nè fiisemen nchiyse-ndaa nə Feyine ke wiy ge lu ghene.

³Ghɛn yɛ kuume ghel ghɛ ɛ́ luun ɛ nchak dî-a ka lu ghɛne ghene fo, gese kuume ghii dii ghɛ ɛ́ nəksen di-a ka ɛ́ nəkse nɛ lu ghɛne ghene.

⁴Ghɛn lu se yɛ ngvəmle kenəə kɛ kum əbvii ghene lum, é əbvii ghene lum yɛ́ lɛm əbkun ə ghen əb laanen dii ge ghene yɛ ke kɛn nɛ lu ngeŋse ghen, bek ge Feyine náà sak ghel ghɛ ɛ́ jaŋen kenjaŋ gese nɛ̀ əbvii kene əbluumen wɛ əb jɛ́len.

⁵Ghàà ghɛn fo tetem ə tɛn nɛ lu se əbkaa. Wel əbjim yɛ lu kekulen nɛ̀ kefaa kɛ əb kiin bek ge Feyine nè suuymen ge: “Mɛ jia yî maay ghɛn, mɛ jia yî vəse ghɛn,

⁶é ghɛsen me fiɛlé fiɛ́lén se suuy ge: Bay Feyin lu ngiamte ə yom nɛ lòó mɛ jia fan kefaa lòó wele-mesoŋ nɛɛy ghɛ san?”

⁷Ghɛn yɛ kuume ghele mbiy nə ghɛn, ghii dii ghɛ ɛ́ nè kɛɛten è fekte kenəə ə Feyin se ghɛn. Ghɛn yɛ kuume jii yɛ ghene nè fɛlen ɛ ten è kuo, è yɛ jumte jii yɛ ghene nè foon ɛytem ɛ ten se Feyine.

⁸Jesus Christ lu lan ghɛɛ-ghɛɛ kɛn ka əb nè luun se mbiy, nɛ̀ lu kɛn ka əb yî yɛ lu.

⁹Ghàà ghɛn beeme nɛ tenkii teyiɛke tɛ te luun ndun nɛɛy é ghɛn jas jii. Ke lu kejuŋ ge tetem ə tɛne yɛ taa bek ka Feyine chamen ɛysen ə yɛn, nɛ̀ wiy bek ka ghɛne lɛmen nchil sɛ kum əbfua-əbyíɛ́ne. Nchil nɛ̂ shine giamten wiy ghel ghɛ ɛ́ lɛmen seghene.

¹⁰Ghɛsen ki kɛ́sen kɛ ketatane ntaŋle kɛ ghɛ́ ntaŋlee ghɛ́ fɛ́len ɛ əbtaa-ɛykokse báà se ki əbtaawe se yiɛ kefaa fo.

¹¹Ke lu dî bek ka ketuu se ghɛ́ ntaŋlee nɛ̂ kine liɛn əmnduŋ mə nyamse, əb lii so se Kelik kɛ ke Lanene è Chia, se taŋle mbeese ghel so, è liɛ nyame sɛ tene, əb fəy è ndu è nyok nɛ lu əbkwak.

¹²Di ghɛy kɛn ka ɛ́ ko nè fəyen nɛ̀ Jesus, əb ndu è kuo nɛ lu əbkwak ka əb lanse ghel nɛ̀ əmnduŋ mə wen.

¹³Ghɛsen me fəy è ndu è baksen wen ɛ əbkwak, è kiile sɛ́y kenchoksen kɛ əb nè kiilen.

¹⁴Ghɛsen dì báà se ki ɛylak yɛ ghɛsene nɛ̂y gok ɛ ten ɛ ketuu ntiɛ fɛn. Ghɛsen biite nduu nɛ̀ ɛylak yɛ ɛy bo bɛɛyen se gwiy.

¹⁵Ghɛsen me yɛ foo ɛykokse se Feyine yɛ luun yɛ́sen yɛ ntaŋle yɛ Jesuse nduun so se Feyine. Ghɛsen foo ntaŋle yɛsen nɛ̀ lu giɛ ə sɛsen ɛ əbliy wɛ ghɛsen toŋten wen ge Báàba.

¹⁶Ghàà ghɛn lɛysen se yɛ nɛɛy njuŋ, nɛ wel giamten əblee nɛ əbfua wɛ əb kiin. Ghɛne lóò nɛɛy əbnəə vin, yɛ lu tenkii ntaŋle sɛ Feyine saŋlen se ten.

¹⁷Ghɛn yɛ yionen se ghele mbiy nə ghɛne, nɛɛye kenəə kɛ ghene suuyen. Ghene lu ghel ghɛ ɛ́ kiynen se ghɛn əbliy əbjim, nɛ ghene náà taŋle əbchio ghen ɛ Feyine ɛyshiɛ. Ghɛn yɛ yionen se ghene ka ghene yɛ nɛɛy ɛyfɛl ə ghen nɛ̀ ɛysaŋlee, yio wiy nɛ lu ɛyyaf, bek ka ghene lòò è yɛ yio ɛyyaf é kii nɛ̂ kine jia giamten ghɛn.

¹⁸Ghɛn yɛ jem se ghɛs. Ghɛs ke se əbluuy ge ghɛs ki ɛytem ɛylaanene bek ka ghɛse koŋen se yɛ nɛɛy əbnəə wɛ əb luun ɛ titiy əbliy əbjim.

¹⁹Mɛ lone ghɛn ge ghɛn yɛ jem ketaan ge Feyine ko tinse mɛ é mɛ kase yaŋse gwiy è yɛn ghɛn.

²⁰Feyin wɛ əb nɛɛyen ge ghele yɛ lu nyiaŋ, ko fo əbfua əbjuŋe əbjim wɛ ghɛne shiin se yɛ fɛl əbnəə wɛ əb koŋen. Lu wen wɛ əb nè losen Báàba ə wɛsen Jesus se ɛykuo; Jesus nɛ̂ vin lu nchiy bvəyse ɛytaa bek kelek kɛ əb nè bɛyten nɛ̀ əmnduŋ mə wen kɛ ke jia yî mɛy. Feyine ko fɛl əbnəə nɛ̂ vin əbjim wɛ əb koŋen ɛ məm nə ghɛsen ɛ əbtaawe nə Jesus Christ. Ɛykokse nduu se Jesus əbliy əbjim nɛ ɛymɛye wiy. Amen.

²²Ghone-nyii, mɛ lone ghɛn ge ghɛn ko liɛ giɛse ntef shin sɛ mɛ foon se ghɛn bek ka mɛ nyakten kɛn lɛ ketəm ketəm.

²³Mɛ kɛŋe ge ghɛn keele ge ɛ́ nè lômen fəyse wán-no wɛsen Timoti se nchak, nɛ loo lu əb yaŋse gwiy è baksen mɛ é ghɛse wen gwiy è yɛn ghɛn.

²⁴Ghɛn chakte ghele mbiy nə ghɛn ɛjim gese nɛ̀ ghele Feyin ɛjim. Ghone-nyii ghɛ Itali tinse ɛychakte se ghɛn.

²⁵Feyine ko yɛ cham ɛysen ə yɛn ghel ɛjim. Amen.