Read Oku Heb 2 Bible Online

Heb 2 - Oku bible

Heb 2

¹Ke me se lu ge ghɛsen ghal əbnəə nɛ̂ vin wɛ ghɛsen yionmen ka ghɛsene jia bo jas jii.

²Ntum yɛ nchiyse-ndaa nə Feyine nè teefen se ɛbaa ɛbaa ə ghɛsene nè lu əbluuy, nɛ wel nè tɛne se yio ntum nɛ̂ yin, è tɛn se nɛɛy ka ɛy dine, ɛ́ fó ngɛk se wen yɛ ɛ́ tiyen se fo.

³Ke lɛ nè lu ɛ jii nɛ̂ ghan, é ghɛsen yî lɛk è boy se nkan-a, ɛ lefɛ ghɛsen maayen kenəə kɛ kum ɛyboy ka yii nɛ̂ yin-a? Báàba se wene ngeŋ nè lômen fekte se mbiy kenəə ɛyboy nɛ̂ ghan se ghele. Ghel ghɛ ɛ́ nè yion me din əbluuy ten se ghɛsen.

⁴Feyine nè lô ko din sɛy əbluuy sakghɛ nɛ̂ vin nɛ̀ əbchəyte, nɛ̀ əbnəə əbkanene, gese nɛ̀ əbnəə əbchio əbyúméné wɛ əb nè nɛɛyen ɛ jiise ɛ jiise, gese nɛ əbnəə wɛ Keyioy Kelanene yɛ giamtene ghel nɛ ɛ́ nɛɛye kɛn ɛ jii yɛ əb nè kɛŋen ɛ ten.

⁵Feyine nè báà lɛm nɛ lu nchiyse-ndaa nə wen ge ghene yɛ sake mbi ɛyfɛɛ yɛ ghɛse suŋnen ge ɛy lu se gwiy.

⁶Kelike ŋwaale-Feyin kelee sɛy dine ge: “Wel lu naa ghɛ-ɛ Feyine, wɛ wɛ̀ yɛ ki shii se wen, wan wel lu naa ghɛ se kan Wɛ wɛ̀ yɛ toknen so.

⁷Wɛ̀ nè nɛɛy fekɛɛy ə wene səkte se ɛylaay è chia fɛ nchiyse-ndaa nə wɛ̀ se keleŋ əbliy, wɛ̀ nè lô buk wen nɛ̀ əbghaake gese nɛ̀ ɛyvəme,

⁸è lɛm əbfua əbjim ɛ ɛyshaa ɛysak nə wen.” Se lɛm əbfua əbjim ɛ ɛyshaa ɛysak nə wen lu nɛ Feyine dine ge kefaa bo bɛɛy wiy kɛ lòó əb buu ghàà yɛ sak. Dî nɛ ghɛsen ko ke ge báà se lu əbfua əbjim wɛ wel se saken.

⁹Ghɛsen sɛy yɛne nɛ lu Jesus wɛ Feyine nè səksen fekɛɛy ə wen è chia fɛ nchiyse-ndaa nə wene se keleŋ əbliy, wɛ luun ɛ leenen nɛ Feyine bukmen wen nɛ̀ əbghaake gese nɛ̀ ɛyvəme bek ɛykuo yɛ əb nè kuon. Feyine nè cham ɛysene wel əbjim ɛ me vəse ge Jesus kuo bek ghene.

¹⁰Nè lu kenəə kɛ́ titiye ka Feyin nè nɛɛyen, wen wɛ əb nè bomen əbfua əbjim, è gese se nɛɛye nɛ əb lu; əb nè lô nɛɛy Jesus yɛn ngɛk ka əb chan jii ɛyboy, è gwiy nɛ̀ ghone se ɛydio é ghene yɛ lu ɛ məm ɛyban nə Feyine.

¹¹Jesus wɛ əb nɛɛyen nɛ ghele laane lu nɛ ghene ghel ghɛ əb lansen ki bay əbmok. Lu bek kii nɛ̂ kine wɛ əb báà se ghuumen se toŋte ghene ge ghone-nyii.

¹²Əb nè suuy se Feyine ge: “Mɛ nɛ̂y fekte kenəə kɛ kum wɛ̀ se ghone-nyii, Mɛ nɛ̂y fo ɛykokse se wɛ̀ ɛ ghene kenchinten.”

¹³È gese suuy ge: “Mɛ nɛ̂y fo ɛytem se Feyine,” è gese suuy ge: “Mɛ vine ghɛse ghon ghɛ Feyine foon se mɛ.”

¹⁴Ke me se lu ge ka ghon nɛ̂ ghine luun ghele mesoŋ, Jesus se wene ngeŋ nè lô liɛ əbghune wele-mesoŋ è se lu ka ghene. Əb nè nɛɛy kii nɛ̂ kine ka əb kuo, è bese kediak kɛ Satan kiin kum ɛykuo.

¹⁵Lu ɛ jii nɛ̂ ghan yɛ əb nè boysen ghel ghɛ ɛ́ nè fɛ́len kekos əbliy əbjim bek ka ɛ́ nè fanen ɛykuo.

¹⁶Ghɛsen ke se əbluuy ge Jesus nè gwiy se giamtene ghon ə Ablaham, əb nè báà gwiy se giamtene nchiyse-ndaa nə Feyine.

¹⁷Ghɛy kenəə kɛ ke nè nɛɛyen əb liɛ əbghune wel, è se lu ka ghone-nyii jii sejim. Əb nè nɛɛy kii nɛ̂ kine ka əb yɛ lu ketuu se ghɛ́ ntaŋle, koosen ɛysen se ghele, fɛle se Feyine nɛ̀ ɛyteme ka loo Feyine lɛyse mbeese ghel.

¹⁸Ke me se lu ge ka əb nè chianmen ɛ məme ngɛkse, è gese kiile ɛymomse, əb ke ka lòó əb giamten ghel ɛ əbliy wɛ ɛymomse gwiyen se ghene.