Read Oku Heb 3 Bible Online

Heb 3 - Oku bible

Heb 3

¹Ghone-nyii ghɛ Feyine nè jaŋen ge ɛ́ yɛ lu ghel ə wen! Ghɛn kuume Jesus wɛ Feyine nè tumen, əb lu ketuu se ghɛ́ ntaŋlee ɛ kenəə ə Feyin kɛ ghɛsen tiyen ɛ ten.

²Əb nè lô loote fo ɛytem se Feyine è se nɛɛye ɛyfɛl yɛ əb nè choken wen ge əb yɛ fɛl kɛn ka Moses nè foon ɛytem è se nɛɛye ɛyfɛle ɛ ndaa Feyine.

³Ɛ́ lu se yɛ ngvəmle Jesus chia Moses, ghɛɛ-ghɛɛ ka ɛ́ ngvəmlen wel wɛ əb baklen ndaa chia ndaa yɛ̂ ten.

⁴Ndaa lu nɛ bakle wel, nɛ əbfua əbjime lu nɛ bàklè Feyin.

⁵Moses fo ɛytem se ɛyfɛle yɛ́ ndaa-ɛykokse Feyin ɛyjim ka wel əbfɛlen se din əbnəə wɛ Feyine nè bɛɛyen se suuy.

⁶Dî nɛ Christe fó ɛytem, è se toknen nɛ̀ ndaa Feyin ka wán ə wen. Ghɛsen lu ndaa-ɛykokse Feyin nɛ̂ yin ɛ lefɛ ghɛsen kulen ɛytem, è se ke se əbluuy ge Feyine lúnse ɛykak yɛ əb nè kaken ghɛsen so.

⁷Ghɛy kenəə kɛ Keyioy Kelanene nè suuyen ge: “Ghɛne yio giɛ ə Feyin lan vin,

⁸ghàà ghɛn taa ketuu, è tunse ka ɛbaa ɛbaa ə ghɛne nè tunsen Feyin, ɛ əbliy wɛ ghene nè momsen Feyin ɛ əbkwak.”

⁹Feyine suuy ge, “Nè lu əbkwak ghàà ɛbaa ɛbaa ə ghɛne nè momen mɛ dî nɛ ɛ́ ko yɛn əbnəə wɛ mɛ nè feken se ghene se nguk əmkɛɛk.

¹⁰Kii nɛ̂ kine nè lô nɛɛy mɛ yafse ɛytem se ghele ghɛ́ ntem nɛ̂ foo, è suuy ge: Ghele ghɛ́ tene jasmen jii. Ghene baa tese keele jii ə som.

¹¹Ke nè lô yaf mɛ, mɛ lek ge: Ghene jia yî lii se kelike nzəəte nə mɛ.”

¹²Ghone-nyii, ghɛn toknen fɛ wel əblee ɛ ghɛne məm yɛ ki ɛytem ɛybee, è tunse Feyin, è gese nɛɛy ge ghen vəse Feyin fɛ fe chiin.

¹³Wel yɛ tefe wel, nɛ wel tefe wel kechii kejim, nɛ ɛ́ bo toŋte ɛyghele mbi yɛ lan vin, fɛ mbee báà lɛɛse wel se ghɛn é əb taa ketuu è tunse Feyin.

¹⁴Loo lu ghɛsen fó ɛytem è yɛ loote samse Feyin, è ndu è ləysen kɛn ka ɛ́ nè yi kɛɛte, é ghɛsen nɛ̀ Christ yɛ lu se kenəə kemok.

¹⁵Ŋwaale-Feyin suuye ge: Ghɛne yio giɛ ə Feyin lan vin, ghàà ghɛn taa ketuu, è tunse ka ɛbaa ɛbaa ə ghɛne nè tunsen Feyin.

¹⁶Lu ghe ndɛ nɛ̂ ghi ghɛ ɛ́ nè yion giɛ ə Feyin, è tunse? Lu ghel nɛ̂ ghi ɛjim ghɛ Moses nè fəysen se Ejibt.

¹⁷Se lu ghe ndɛ ghɛ Feyine nè yafsen se ghene se nguk əmkɛɛk? Nè lu ghel ghɛ ɛ́ nè jasen se Feyine è kuoke, tegvən ə ghene nyimten ɛ əbkwak.

¹⁸Gese se lu se ghe ndɛ ghɛ Feyine nè leken ge ghene jia yî lii se kelike nzəəte nə yi? Nè lu se ghii dii ghɛ ɛ́ nè tɛnen se yionen se wen.

¹⁹Ghɛsen yɛn yi ge ghene nè mom lolo se lii se kelike nzəəte bek ka ghene nè báà beeme Feyin.