Read Oku Heb 4 Bible Online

Heb 4 - Oku bible

Heb 4

¹Ke me se lu ge ka nkakma ə Feyin se ghɛsen kum kelike nzəəte nə wen bo tiyen ɛ ɛyfeŋ, ghɛsen yɛ toknen fɛ wel se ghɛn nɛ̂y buu ghàà lii se ten.

²Ghɛsen yiomen sakghɛ əbjuŋ kɛn ka ghene nè yion. Ghene nè yio, əb jia giamten ghene bek ge ɛ́ nè yio, è jia fo ɛytem se ten.

³Ke me se lu nɛ ghɛsen ghɛ ɛ́ yion è beeme nɛ̂y lii se kelike nzəəte nə Feyine. Əb nè suuy se ghel ghɛ ɛ́ báà beeme wen ge: “Mɛ nè lô yafse ɛytem è lek ge: Ghene jia nɛ̂y lii se kelike nzəəte kɛ mɛ nè kaken.” Əb nè suuye dì nɛ ɛyfɛl ə wene nè mɛymen ɛ əbliy wɛ əb nè bomen mbi.

⁴Kelike ŋwaale-Feyin kelee suŋnen kum kechii kɛ saamba ge: “Feyine nè bom mbi ɛyjim əbchii loo lun saamba, əb miimen.”

⁵Ko se lu nɛ Feyine gese suŋnen kum kenəə nɛ̂ kin fɛn ge: Ghene jia yî lii ɛ kelike nzəəte nə mɛ.

⁶Ke ko bo tiy ge ghele ɛlee nɛ̂y lii se kelik nɛ̂ fɛn. Ghel ghi ghɛ ɛ́ nè kɛɛten yio sakghɛ əbjuŋ nɛ̂ vi əbliy wɛ ɛ́ nè fekten, nè báà lii bek ka ghene nè báà se yionen se Feyine.

⁷Feyine me kase lɛm kechii kɛ əb nè toŋten ge lan vin, se lu ɛybame ngukse se ɛydio, David teefe ka Feyine nè tumen wen ge: “Ghɛne yio giɛ ə Feyin lan vin, ghàà ghɛn taa ketuu.”

⁸Joshua nè boy se lii nɛ̀ ghene se kelike nzəəte kɛ Feyine nè kaken, fene Feyine nè báà gese se suŋnen kum kechii kelee ɛybame ten.

⁹Ke me se lu nɛ kechii ɛybam kɛ ghel ə Feyine zəəlen ɛ ten bo tiy ɛ ɛyfeŋ,

¹⁰bek ge naa ndɛ wɛ əb liin se kelike nzəəte kɛ Feyine nè kaken lu nɛ əb miimen se wen ɛyfɛl kɛn ka Feyine nè miimen se yɛ́ wene.

¹¹Ghɛsen mom ketaan se lii se kelike nzəəte nɛ̂ fo fɛ wel se ghɛsen báà fɛy ka ghene ghɛ ɛ́ nè baa fo ɛytem se Feyine.

¹²Giɛ Feyin di chii gese ki kediak. Ɛy tofe chia naa fiake əbkɛ wɛ ɛ́ sɛyen tebee tejim. Ɛy soo wel lii è nduu chine naa ghaa ɛychii ə wele chinten ghene keyioye, nduu chine ghaa əbyuŋe wel nɛ̀ bòŋ luun, kaake fəyse kenəə kejim kɛ wele kwaaten ɛ wen ɛytem lɛme ɛ ndan.

¹³Kefaa báà se lu kɛ Feyine nè bomen kɛ ke luun ɛ kenlete se wen. Əb loote yɛne kefaa kejim kɛ əb nè bomen nɛ ke lu ɛ ngɛngɛ. Lu wen wɛ ghɛsen yî taŋle əbchio ə wɛsen ɛ wen ɛyshiɛ.

¹⁴Ka ghɛsen se kiin wel əbghaken wɛ luun ketuu se ghɛ́ ntaŋlee nɛ əb liimen è ndu ɛyshiɛ nə Feyine ɛyyio lɛ, kɛn naa Jesus wɛ luun wán ə Feyin, ghɛsen me teem ketaan ɛ kenəə kɛ ghɛsen foon ɛytem se ten.

¹⁵Ghɛsen báà se ki ketuu se ghɛ́ ntaŋlee nɛ lu wel wɛ lòó əb jia koosen ɛysen se ghɛsen ɛ əbliye ɛymomse. Ghɛsen ki nɛ lu wel wɛ ɛymomse nè gwiyen se wen ɛ jiise ɛ jiise ka ɛy gwiyen se ghɛsen, dî əb jia nɛɛy mbee.

¹⁶Ke me se lu kejuŋ ge ghɛsen fiɛ́lé fiɛ́lén se ndu se kelik əbfon nə Feyine, ke se əbluuy ge əb cham ɛysen ə yɛ́sen ka əb koosen ɛysen se ghɛsen, é əb cham ɛysen ə yɛ́sen, è fo ɛygiamten naa ɛ leghɛ wɛ ghɛsen shiin.