Read Oku Heb 5 Bible Online

Heb 5 - Oku bible

Heb 5

¹Naa ndɛ wɛ luun ketuu se ghɛ́ ntaŋlee lu nɛ ɛ́ chok ɛ ghele məm, è lɛm ge əb yɛ tiy ɛ Feyine ɛyshiɛ ɛ kelik nə ghele, foo ɛyfoo se Feyine gese taŋle ntaŋlese ka Feyine lɛyse mbeese ghel.

²Ka əb luun sɛy wel nɛ əbnəə taa wen, lu nɛ lòó əb keele se giamtene ghel ghɛ ɛ́ jasen ke wiy ge lu kejas.

³Lu bek kii nɛ̂ kine kɛ əb tiyen se yɛ taŋle ntaŋle ketuu nə wen gese nɛ̀ yɛ̂ ketuu nɛ̀ ghele.

⁴Sɛɛ jia suuye wel ge ɛ́ buk yi ge ketuu se ghɛ́ ntaŋlee. Sɛɛ choke Feyin wel ge ketuu se ghɛ́ ntaŋlee kɛn ka əb nè choken Aalon.

⁵Lu ghɛɛ-ghɛɛ ka Christ nè báà buk ngeŋ ə wen ge ketuu se ghɛ́ ntaŋlee. Nè chok Feyin wɛ əb nè suuyen se wen ge: “Wɛ̀ lu wán ə wom; lan vin lu nɛ mɛ shi ba ə viɛ.”

⁶Əb lu nɛ əb gese suuy ɛ kelike ŋwaale-Feyin kelee ge: “Wɛ́ yɛ lu wele ntaŋle əbliy əbjim, kɛn ka Melchizedek nè luun.”

⁷Nè lu əbliy wɛ Jesus nè luun ɛ ketuu ntiɛ, əb se jeme toŋe ɛ giɛ ɛytaa, səkse əmshiɛ gese lone Feyin wɛ əb nè lòó əb boyse wen se ɛykuo. Feyine yio ɛyjem ə wen bek ka əb nè yionen se wen.

⁸Chèmè lu ka əb nè luun wán ə Feyin dì nɛ əb ko nè lô yiɛke se yɛ yionen se Feyine əbliy wɛ əb nè yɛnen ngɛk.

⁹Se lu ka əb nè lootenmen è mɛyse ɛyfɛl yɛ əb nè luun se fɛl, əb me se lu wel wɛ əb foon ɛyboy yɛ ɛy jia yî mɛy se ghel ghɛ ɛ́ yionen se wen.

¹⁰Feyine me lɛm wen ge ketuu se ghɛ́ ntaŋlee, əb me se lu kɛn ka Melchizedek nè luun.

¹¹Əbnəə lu se ɛydio wɛ kè lòó ghɛs yɛ suuy kum kenəə nɛ̂ kin, dî nɛ ke taa se ghɛs se sanse bek ka ghɛne báà se yaŋse yio kenəə.

¹²Kè lu se yɛ lu ɛ leenen nɛ dinte ghɛn əbnəə se ghele, se lu nɛ ke dine ge jof é wel kase din se ghɛn əbnəə wɛ ghele sɛɛ kɛɛte keele kum kenəə ə Feyin. Ghɛn bo bɛɛy se yɛ nyoŋ nɛ lu ɛyghen, ghɛne bɛɛy ghàà kwɛn se yɛ yíɛ́ əbfua əbtaa.

¹³Naa ndɛ wɛ əb bo nyoŋen nɛ lu ɛyghen bo bɛɛy wán əbbol wɛ əb báà tese keele əbnəə wɛ kum ndee ghel ghɛ kuyenmen.

¹⁴Əbfua-əbyíɛ́ne əbtaa lu se ghel ghɛ ɛ́ kuyenmen; ghii dii ghɛ ghene yiɛkenmen, è keenten se yɛ ke ndun-ndun kum njuŋ ghene mbee.