Read Oku Heb 6 Bible Online

Heb 6 - Oku bible

Heb 6

¹Ke me se lu ge ghɛsen loo se əbnəə wɛ ghele kɛɛten keelen kum Christ, è yɛ nduu ɛ mbiy nɛ̀ wɛ əb dinen ge ghɛsen kuymen. Ghɛsen báà se lu se yɛ yese yiy kɛn yiyen əbnəə əbliy nɛ̀ əbliye: Ko ge ɛ́ maay əbnəə lólò, è fo ɛytem se Feyine,

²è gese jia yɛ dinte kɛn ge ɛ́ yɛ fo moo se ghele, lɛm ɛghoo ɛ ghele əbtuu, ge ghele yî loole se ɛykuo, ka Feyine yî mak ngɛk se ghele yɛ ɛy jia yî mɛy.

³Feyine ko giamten, é ghɛsen loo se əbnəə nɛ̂ ghan è yɛ ndu kɛn naa ɛ mbiy.

⁴Ke taa naa se ŋaŋ se ghel ghɛ ɛ́ fɛyenmen se kase se fiile se Feyine, dii ghel ghɛ Feyine bansenmen əbtuu ə ghen, ghɛ ɛ́ momenmen fomɛ ə Feyin wɛ əb lòòn ɛ ɛyyio, ghɛ Keyioy ə Feyine kumenmen ghene sɛy,

⁵ghene mom è yio əbjuŋ wɛ giɛ ə Feyine foon è gese yɛn əbtaawe wɛ Feyine shiin se yɛ sake mbi so, è kase fɛy.

⁶Ghel nɛ̂ ghine lòò è maay ɛybeeme ə ghen ɛ jii nɛ̂ ghan, é ke yɛ taa se kase se fise ghene ge ɛ́ kubsen bek ge ke dine ka ghene kasemen è gese se bante wán ə Feyin ɛ kentam, choksen wen ɛ ɛyshiɛ nə ghele.

⁷Ɛyghuu gwiye ntiɛ zəəle, əbfua loo kuy ɛ ten nɛ ghele yiɛ, fene Feyine lu nɛ əb bose ntiɛ yɛ̂ ten.

⁸Dî nɛ lòò è yɛ kuye kenjoonjoŋ ghene əbgii ɛ ten fene lu ntiɛ lólò nɛ lòó ɛ́ me sasen è liŋ liŋen, nɛ kenləysene lu ge ɛ́ nyok nyoken.

⁹Sun ə sɛse, ka ghɛs chèmè suuyen lɛ mba, ghɛs ke se əbluuy ge kɛne lu ndun bek ka ghɛn tiyen ɛ əbnəə wɛ əb gwiyen nɛ̀ ɛyboye se ghɛn.

¹⁰Feyine buu wiy se nɛɛye kenəə kɛ́ titiye nɛ əb jia nɛ̂y lɛysen ɛyfɛle yɛn gese nɛ̀ ɛykoŋ yɛ ghɛn nè dinen se wen ɛ ɛygiamten yɛ ghɛn nè giamten ghel ə wen kɛn ka ghɛn bo nɛɛyen dì.

¹¹Shii ə wɛse wɛ̂ ŋaŋ lu ge naa ndɛ ɛ ghɛne məm ko ndu kɛn ɛ mbiy se fɛl ketaan ɛ kenəə nɛ̂ ghan se chin se kenləysen ka ghɛne kiile kii dii kɛ ghɛne chiin ki ɛykwaate ge ɛ́ náà kiile.

¹²Ghɛse báà se kɛŋe ge ghɛn yɛ lu əbnkwen. Ghɛse kɛŋe ge ghɛn yɛ lu ka ghel ghɛ ɛ́ foon ɛytem se Feyine, è se bonen chiyte ka ɛ́ kiile kefaa kɛ Feyine kaken.

¹³Nè lu ka Feyine nè kaken Ablaham əb laa kelek ge yi nɛ̂y lunse ɛykak ə yi. Ka wele báà se lu wɛ əb chian Feyin, wɛ Feyine nè lòó əb kan ɛyghel ə wen, Feyine me kan kɛn yɛ wene yɛ ɛyghel,

¹⁴è suuy ge: Kɛ əbluuye, mɛ nɛ̂y bose wɛ̀, è nɛɛy é ɛyshaa ndaa nə wɛ̀ kuy.

¹⁵Ablaham me se bosen chiytee, Feyine naa me lunse ɛykak yɛ əb nè əb nè kaken wen so.

¹⁶Wele sɛɛ loo laa kelek, əb kan ɛyghele wel wɛ əb chian wen. Əb kane dì, ghàà ɛ́ gese yɛ chokte.

¹⁷Feyine nè kɛŋe se din kelanen se ghel ghɛ əb nè kaken ghene ge lòó yi jia bo kubsen kenəə kɛ yi luun se nɛɛy. Ghɛy kenəə kɛ ke nè nɛɛyen, əb loo foo ɛykak nɛ̂ yin, è laa kelek ɛ ketuu ten.

¹⁸Əbnəə nɛ̂ vin əbbua me se lu nɛ lòó əb jia kubsen bek ka ke taan se Feyine se lɛme kenəə se jia se liɛ. Ke me se lu ge ghɛsen ghɛ ɛ́ lɛken è bɛ̀ɛ̀ wen yɛ loote lu keyayten chiyte se kiile nkakma nɛ̂ yin yɛ ghɛsen lɛmmen ɛykwaate ə yɛ́sen ɛyjim ɛ ten.

¹⁹Ghɛsen fomen ɛytem è se chiytee, kii nɛ̂ kine me ghal ɛychii ə yɛ́sen è loote ghof ketaan ɛy teem è jia gese se shɛŋe. Ɛykwaate nɛ̂ yine me liɛ ghɛsen, è chia fekeŋele so è lii è ndu ghaa Feyine luun.

²⁰Jesus lu nɛ əb liɛmen kelik ə kɛ́sen, è lii, è ndu fo se mbiy, è me se lu ketuu se ghɛ́ ntaŋlee əbliy əbjim kɛn ka Melchizedek nè luun.