Read Oku Heb 7 Bible Online

Heb 7 - Oku bible

Heb 7

¹Melchizedek nɛ̂ vin nè lu əbfone kelik kelee nɛ ɛ́ toŋte ge Salem, gese lu wele ntaŋle nə Feyin Fɛ Fe ngaŋten è chia. Nɛy se lu əbliy wɛ Ablaham nè kfəəyen ɛ əbkwak ɛyghoŋ yɛ ghene nè shiken è yiɛ tefon tɛ tekɛɛk, ghene Melchizedek konen, əb bose Ablaham.

²Ablaham giate əbfua wɛ əb nè kfəəyen so əblik ɛyvəm, è fo kɛ kemoke se wen. (Ɛyghel yɛ Melchizedek yin lu ge: Əbfon wɛ əb luun ɛ titiy, nɛ ka əb nè luun əbfone Salem, dii ge əmnyiaŋ, ɛ́ ko me se toŋte wen ge: Əbfon əmnyiaŋ.)

³Melchizedek nè báà se ki bay, ki wiy nyii, ki wiy ɛykfəə. Kefaa báà se dine əbliy wɛ ɛ́ nè biin wen ɛ ten, kene əbliy wɛ əb nè kuon ɛ ten. Əb lu ka wán ə Feyin bek ka əb luun wel ɛytaŋle ntaŋle əbliy əbjim.

⁴Ghɛn yɛn yì jii yɛ Melchizedek nè luun wel əbtaa ɛ ten! Ablaham wɛ nè luun naa ba ə wɛsen əbtaa nè lô giate əbfua wɛ əb nè kfəəyen so əbkwak ɛyghoŋ əblik ɛyvəm, è fo kɛ kemoke se wen.

⁵Ɛysake Moses nè dine ge ghel ɛykfəə nə Levi ghɛ luun ghel ɛytaŋle ntaŋle lu se yɛ fii kefaa kemok ɛ məme wɛ ɛyvəm se ghele Islaele, dii ge ghene nè fii se ghel ɛykfəə nə ghene, chèmè lu ka ghene ghel ɛjim nè luun ɛykfəə Ablaham.

⁶Melchizedek nè báà se lu wel ɛykfəə nə Levi, dî Ablaham giate əbfua əblik ɛyvəm è fo kɛ kemoke se wen, əb fii è bose Ablaham, wɛ Feyine nè kakenmen se bose.

⁷Ɛymaanene wiy ge wel wɛ əb bosen wel chia wel wɛ ɛ́ bosen.

⁸Lu se ghɛ́ ɛytaŋle ntaŋle nɛ ghene fii kefaa kemok ɛ məme wɛ ɛyvəme nɛ ghene ko náà kuo, se lu ɛ kenəə nə Melchizedek nɛ kefaa kemok se wɛ ɛyvəme lu nɛ fii wel wɛ ŋwaale Feyine suuyen ge əb nè baa yì kuo.

⁹Lòó wel ko suuy ge Levi wɛ ɛ́ foon kefaa kemok ɛ məme wɛ ɛyvəme se wen ko nè lô fo sɛy se Melchizedek ɛ əbliy wɛ Ablaham nè foon.

¹⁰Ke lu dî bek ka Levi nè luun wán ə wan Ablaham wɛ əb nè foon ɛyfô nə yin se Melchizedek.

¹¹Nè lu əbliy wɛ Feyine nè foon nchil se ghele Islaele əb se kunte kɛn nɛ lu ɛyfɛle ntaŋle. Ɛyfɛle ntaŋle nə ghel ɛyshaa ndaa nə Levi lɛ nè bóy se yɛ lu ɛ titiy; é shii bo yɛ lu wɛ̂ ɛ́ kase è yɛ kɛŋe wele ntaŋle əbchin wɛ əb luun ka Melchizedek nɛ wiy wel ɛyshaa ə ndaa nə Aalon-a?

¹²Ɛ́ lòò è kubsen ghele ntaŋle fene ɛ́ ko lu se kubsen sɛy nchil.

¹³Báàba ə wɛsen wɛ ɛ́ suŋnen əbnəə vin kum wen nè lu wel ɛykfəə ɛychine, nɛ wel ɛykfəə nə wen nè bɛɛy ghàà yi fɛl ka wele ntaŋle.

¹⁴Ke loote lu ke keelen ge ɛ́ nè bii wen ɛ ɛykfəə nə Juda, nɛ Moses nè báà toŋte ɛykfəə yin ɛ əbliy wɛ əb nè suŋnen kum ghɛ́ ntaŋlee.

¹⁵Kenəə tene me se loote lu kelaanen ka wele ntaŋle əbchin yɛnsenmen, wɛ əb luun ka Melchizedek.

¹⁶Feyine nè lɛm wen ka wele ntaŋle nɛ wiy bek tesak tɛ ghele lɛmen, nè lu bek ka əb nè kiin əbtaawe ɛychii yɛ ɛy mɛyen wiy.

¹⁷Ke lu dî bek ge ŋwaale-Feyine suuy ge: Wɛ̀ yî yɛ lu wele ntaŋle əbliy əbjim, kɛn ka Melchizedek nè luun.

¹⁸Ɛ́ tintemen ɛysak ɛyməə è lɛm ɛybam bek ka ɛy nè báà se ki əbtaawe, nɛ ɛy báà se ki ɛyfɛl.

¹⁹Ɛysake Moses nè báà loote siyse əbnəə. Me se lu nɛ Feyine fomen nkante kefaa kɛ ghɛsen lɛm ɛykwaate ə yɛ́sene ɛ ten, nɛ lu jii yɛ ghɛsene chia ɛ ten è kokte è baksen se Feyine.

²⁰Gese se lu nɛ Feyine nè lô laa kelek ɛ kenəə nə Christ. Dî nɛ ɛ́ nè loo lɛme ghel ɛlee ge ghɛ́ ntaŋlee ghàà əb laa kelek.

²¹Se lu ɛ kenəə nə Christ nɛ Feyine laa kelek è suuy ge: “Báàba lu nɛ əb lek kenəə nɛ əb jia yî kubsen ɛykwaate wen: Wɛ̀ yɛ lu wele ntaŋle əbliy əbjim.”

²²Kum kelek nɛ̂ kin, Jesus se tiy ka əbchəysen se din ge nkakma yɛ̂ ten lu nkante kenəə.

²³Ghel ghɛ ɛ́ nè luun ghele ntaŋle se mbiy nè lu se ɛydio bek ka ɛ́ nè kuon.

²⁴Se lu se Jesus nɛ əb lu ɛ wene kelik ka wele ntaŋle nɛ əb gokmen fô bek ge əb yî yɛ chii nduu kɛn nduun.

²⁵Me se lu nɛ əb lu kekwɛnten əbliy əbjim se boyse ghel ghɛ ɛ́ gwiyen baksen se Feyine, bek ge əb yese lu kɛn luun lone Feyine se ghene.

²⁶Jof kenəə ka ghɛsen kiin ketuu se ghɛ́ ntaŋlee ka kine, wel əblanen, ghàà jas, ki wiy fentik. Feyine loote lɛm əb se tiy ndun se ghele mbee, è fo kelik ke ngaŋtene se wen ɛyyio.

²⁷Shii báà se lu wɛ əb yɛ yese taŋle ntaŋle kechii nɛ̀ kechii ka əbtuu se ghɛ́ ntaŋlee əblee; ghii dii ghɛ ɛ́ nè taŋlen sɛ ghene me gese taŋle sɛ ghele. Jesus nè taŋle mbee ə sɛsen kaŋ ɛymok ɛ əbliy wɛ əb nè foon ngeŋ ə wen è kuo ɛ kentam.

²⁸Ɛ́ nè lɛme wel ka ketuu se ghɛ́ ntaŋlee ka ɛysak dinen yɛ lu nɛ wele tene ko yɛ jas. Dî nɛ kenəə kelek kɛ Feyine nè suuyen se ɛybam nɛ ɛysake nè se shi, nè lɛm nɛ lu wan wen ka əb yɛ lu titiy əbliy əbjim.